ಕೃಷ್ಣ ರಾಜೀನಾಮೆ ವಿಚಾರದಲ್ಲಿ  ಮಧ್ಯೆ ಪ್ರವೇಶಿಸಲ್ಲ: ಖರ್ಗೆ

Team Udayavani, Feb 6, 2017, 3:45 AM IST

ಬೆಂಗಳೂರು: “ಎಸ್‌.ಎಂ. ಕೃಷ್ಣ ಪಕ್ಷದ ಪ್ರಾಥಮಿಕ ಸದಸ್ಯತ್ವಕ್ಕೆ ರಾಜೀನಾಮೆ ನೀಡಿದ ವಿಚಾರ ಮಾಧ್ಯಮಗಳ ಮೂಲಕ ನನ್ನ ಗಮನಕ್ಕೆ ಬಂದಿದೆ. ನಾನು ಇದುವರೆಗೆ ನೇರವಾಗಿ ಕೃಷ್ಣ ಅವರೊಂದಿಗೆ ಈ ಬಗ್ಗೆ ಮಾತನಾಡಿಲ್ಲ’ ಎಂದು ಕಾಂಗ್ರೆಸ್‌ ಸಂಸದೀಯ ನಾಯಕ ಮಲ್ಲಿಕಾರ್ಜುನ ಖರ್ಗೆ ಸ್ಪಷ್ಟಪಡಿಸಿದರು.

ದೆಹಲಿಗೆ ತೆರಳುವ ಮುನ್ನ ನಗರದಲ್ಲಿ ಭಾನುವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ” ಅವರು ಯಾಕೆ ರಾಜೀನಾಮೆ ಕೊಟ್ಟಿದ್ದಾರೆ ಅನ್ನೋದು ಗೊತ್ತಿಲ್ಲ. ಅವರೊಂದಿಗೆ ಹೈಕಮಾಂಡ್‌ ಮಾತುಕತೆ ನಡೆಸಿದೆ. ಹಾಗಾಗಿ, ನಾನು ಮಧ್ಯಪ್ರವೇಶಿಸುವುದು ಸರಿ ಅಲ್ಲ’ ಎಂದರು. 

ಸದಾಶಿವನಗರದಲ್ಲಿರುವ ತಮ್ಮ ನಿವಾಸದಿಂದ ಮಲ್ಲಿಕಾರ್ಜುನ ಖರ್ಗೆ ದೆಹಲಿಗೆ ಹೊರಟುನಿಂತಿದ್ದರು. ಈ ಸಂದರ್ಭದಲ್ಲಿ ಅವರ ಮೊಮ್ಮಗ “ಬಾಯ… ತಾತ’ ಎಂದು ವಿದಾಯ ಹೇಳಿದ. ಆಗ ಪ್ರೀತಿಯಿಂದಲೇ ಗದರಿದ ಖರ್ಗೆ ಅವರು, “ಕನ್ನಡದಲ್ಲಿ ಮಾತನಾಡಬೇಕು. ಇಲ್ಲದಿದ್ದರೆ ಹೊರಗೆ ಹಾಕ್ತೀನಿ’ ಎಂದು ಹೇಳಿದರು.