ಪುನೀತ್‌ ಹೊಸ ಚಿತ್ರ ಅಂಜನಿ ಪುತ್ರ

Team Udayavani, Feb 6, 2017, 11:22 AM IST

ನಿರ್ದೇಶಕ ಹರ್ಷ, ಪುನೀತ್‌ ರಾಜಕುಮಾರ್‌ಗೆ ಸಿನಿಮಾ ಮಾಡುವ ವಿಷಯ ನಿಮಗೆ ಗೊತ್ತೇ ಇದೆ. ಆದರೆ ಆ ಸಿನಿಮಾದ ಟೈಟಲ್‌ ಏನು, ಯಾವಾಗ ಆರಂಭವಾಗುತ್ತದೆಂಬುದು ಪಕ್ಕಾ ಆಗಿರಲಿಲ್ಲ. ಈಗ ಎಲ್ಲವೂ ಅಂತಿಮವಾಗಿದೆ.

ಪುನೀತ್‌ ಹಾಗೂ ಹರ್ಷ ಕಾಂಬಿನೇಶನ್‌ನ ಚಿತ್ರಕ್ಕೆ “ಅಂಜನಿ ಪುತ್ರ’ ಎಂದು ಹೆಸರಿಡಲಾಗಿದೆ. ಅಲ್ಲಿಗೆ ಹರ್ಷ ಮತ್ತೂಮ್ಮೆ ಆಂಜನೇಯನ ಮೊರೆ ಹೋದಂತಾಗಿದೆ. ಈಗಾಗಲೇ ಹರ್ಷ “ಭಜರಂಗಿ’, “ವಜ್ರಕಾಯ’, “ಜೈಮಾರುತಿ 800′ ಚಿತ್ರಗಳನ್ನು ಮಾಡಿದ್ದು, “ಕಪಿಚೇಷ್ಟೇ’ ಎಂಬ ಚಿತ್ರವನ್ನೂ  ಆರಂಭಿಸಿದ್ದಾರೆ. ಈ ನಡುವೆಯೇ ಹರ್ಷ ಶಿವರಾಜಕುಮಾರ್‌ ಗಾಗಿ “ಮೈ ನೇಮ್‌ ಇಸ್‌ ಆಂಜಿ’ ಎಂಬ ಸಿನಿಮಾ ಮಾಡುತ್ತಾರೆಂದು ಹೇಳಲಾಗಿತ್ತು.

ಸದ್ಯಕ್ಕೆ ಹರ್ಷ, ಪುನೀತ್‌ ಗೆ ಚಿತ್ರ ನಿರ್ದೇಶನ ಮಾಡುತ್ತಿದ್ದು, ಆ ಚಿತ್ರಕ್ಕೆ “ಅಂಜನಿ ಪುತ್ರ’ ಎಂದು ಹೆಸರಿಡಲಾಗಿದೆ. ಚಿತ್ರದ ಮುಹೂರ್ತ ಇಂದು ಯಡಿಯೂರು ಬಳಿಯ ಪ್ರಸನ್ನ ಆಂಜನೇಯ ದೇವಸ್ಥಾನದಲ್ಲಿ ನಡೆಯಲಿದೆ. ಅಂದಹಾಗೆ, ಇದು ತಮಿಳಿನ “ಪೂಜೈ’ ಚಿತ್ರದ ರೀಮೇಕ್‌ ಆಗಿದ್ದು, ಬಹುತೇಕ ಬದಲಾವಣೆ ಮಾಡಿಕೊಳ್ಳಲಾಗಿದೆಯಂತೆ. “ಕಿರಿಕ್‌ ಪಾರ್ಟಿ’ ಚಿತ್ರದಲ್ಲಿ ನಾಯಕಿಯಾಗಿದ್ದ ರಶ್ಮಿಕಾ ಮಂದಣ್ಣ “ಅಂಜನಿ ಪುತ್ರ’ದ ನಾಯಕಿ. ಈ ಚಿತ್ರವನ್ನು ಎಂ.ಎನ್‌. ಕುಮಾರ್‌ ಹಾಗೂ ಜಯಶ್ರೀದೇವಿ ನಿರ್ಮಿಸುತ್ತಿದ್ದಾರೆ.