ಪಶು ವೈದ್ಯ ಪಟದಯ್ಯನವರ ಸ್ಮರಣಾರ್ಥ ಗುಡಿ ನಿರ್ಮಾಣ!

Team Udayavani, Feb 8, 2017, 12:44 PM IST

ನವಲಗುಂದ: ಮೂಕ ಪ್ರಾಣಿಗಳೇ ದೇವರೆಂದು ಜೀವನವಿಡೀ ನಿಸ್ವಾರ್ಥ ಸೇವೆಗೈದ ಡಾ| ಪಟದಯ್ಯ ಹಿರೇಮಠ ಅವರ ಸ್ಮರಣಾರ್ಥ ತಾಲೂಕಿನ ಖನ್ನೂರ ಗ್ರಾಮದ ಹೊರ ವಲಯದಲ್ಲಿ ನಂದಿ-ಈಶ್ವರ ದೇವಸ್ಥಾನ ನಿರ್ಮಿಸಲಾಗಿದೆ. ಫೆ.8ರಂದು ಅವರ 5ನೇ ಪುಣ್ಯತಿಥಿ ನಿಮಿತ್ತ ಈ ದೇವಸ್ಥಾನದಲ್ಲಿ  ಈಶ್ವರ-ನಂದಿ ಮೂರ್ತಿ ಪ್ರತಿಷ್ಠಾಪನೆ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿದೆ. 

ಬ್ರಿಟಿಷರ ಆಡಳಿತ ಅವಧಿಧಿಯಲ್ಲಿ ಮೊದಲು ಮಹಾರಾಷ್ಟ್ರ ರಳಿ ಎಂಬ ಪಟ್ಟಣದಲ್ಲಿ ಪಶು ವೈದ್ಯರಾಗಿ ಸೇವೆ ಆರಂಭಿಸಿದ ಅವರು, ದೇಶಕ್ಕೆ ಸ್ವಾತಂತ್ರ್ಯ ದೊರೆತ ನಂತರ ನವಲಗುಂದ ಪಟ್ಟಣದಲ್ಲಿ ಸೇವೆ ಮುಂದುವರಿಸಿದರು. ನಂತರದ ದಿನಗಳಲ್ಲಿ ಕಲಘಟಗಿ, ಹೊಸರಿತ್ತಿ, ಬೆಳವಣಿಕಿ, ಹುಬ್ಬಳ್ಳಿ, ಬೆಳಗಾವಿ ಹಾಗೂ ಶಲವಡಿ ಗ್ರಾಮಗಳಲ್ಲಿ ಸೇವೆ ಸಲ್ಲಿಸಿ 1979ರಲ್ಲಿ ನಿವೃತ್ತಿ ಹೊಂದಿದರು. 

ನಿವೃತ್ತಿ ನಂತರವೂ ವೈದ್ಯಕೀಯ ಸೇವೆ ಮುಂದುವರಿಸಿದ ಡಾ| ಪಟದಯ್ಯ ಹಿರೇಮಠ ಅವರು, ಸರಿ ಸುಮಾರು 32 ವರ್ಷಗಳ ಕಾಲ ತಾಲೂಕಿನ ಖನ್ನೂರ ಗ್ರಾಮದ ಮತ್ತು ರೋಣ ತಾಲೂಕಿನ ಮಲ್ಲಾಪುರ ರೈಲ್ವೆ ನಿಲ್ದಾಣ ಹತ್ತಿರ ತಮ್ಮ ನಿಸ್ವಾರ್ಥ ಸೇವೆ ಮುಂದುವರಿಸಿದರು. 

ದೂರದ ಊರು, ನಗರ ಪ್ರದೇಶಗಳಿಂದ ಬರುವ ರೈತರ ಜಾನುವಾರುಗಳಿಗೆ ಬೇಕಾಗುವ ಹೊಟ್ಟು, ಮೇವು ಕೂಡ ಸಂಗ್ರಹಿಸಿಟ್ಟು ಉಚಿತವಾಗಿ ನೀಡುತ್ತಿದ್ದರು. ವಾರಾನುಗಟ್ಟಲೇ ಚಿಕಿತ್ಸೆ ನೀಡಿ ಗುಣವಾಗುವವರೆಗೂ ರೈತರಿಗೆ ಊಟ ನೀಡುತ್ತಿದ್ದರಲ್ಲದೇ ಖನ್ನೂರ ಗ್ರಾಮದ ನಾಲ್ವರಿಗೆ ಪಶು ವೈದ್ಯಕೀಯ ಚಿಕಿತ್ಸೆ ಕುರಿತು ತಿಳಿವಳಿಕೆ, ಅನುಭವ ನೀಡಿ ಶಿಷ್ಯರನ್ನು ತಯಾರಿಸಿದ್ದಾರೆ.

ಅವರು ಕೂಡ ನಿಸ್ವಾರ್ಥ ಸೇವೆ ಮುಂದುವರಿಸಿಕೊಂಡು ಹೋಗುತ್ತಿದ್ದಾರೆ. ಮೂಕ ಪ್ರಾಣಿಗಳೆಂದರೆ ಅವರಿಗೆ ಪಂಚಪ್ರಾಣ. ದೂರದಿಂದ ಬರುವ ಎತ್ತುಗಳನ್ನು ನೋಡಿದರೆ ಸಾಕು ಆ ಎತ್ತಿಗೆ ಇದೇ ಕಾಯಿಲೆ ಇದೆ ಎಂದು ಹೇಳುತ್ತಿದ್ದರು ಎಂದು ನೆನಪಿಸಿಕೊಳ್ಳುತ್ತಾರೆ ಶಲವಡಿ ಗ್ರಾಮದ ಫಕ್ಕೀರಗೌಡ್ರ ಮುದಿಗೌಡರ.

* ಇಸ್ಮಾಯಿಲ್‌ ನದಾಫ್‌