ವಿದ್ಯೆಯನ್ನು ಯಾರೂ ಕಸಿಯಲು ಸಾಧ್ಯವಿಲ್ಲ

Team Udayavani, Feb 9, 2017, 12:27 PM IST

ಕಲಬುರಗಿ: ಇವತ್ತು ಎಲ್ಲಕ್ಕಿಂತ ಶ್ರೇಷ್ಠವಾದ ಆಸ್ತಿ ವಿದ್ಯೆ. ಅದನ್ನು ಯಾರೂ ಹಾಳು ಮಾಡಲು ಮತ್ತು ಕದಿಯಲು ಸಾಧ್ಯವಿಲ್ಲ. ಆದ್ದರಿಂದ ವಿದ್ಯಾರ್ಥಿಗಳು ಕಲಿಕಾ ಜೀವನದಲ್ಲಿ ಉತ್ತಮ ಕಲಿಕೆ ಮೂಲಕ ಒಳ್ಳೆಯ ಆಸ್ತಿ ಸಂಪಾದಿಸಿಕೊಳ್ಳಬೇಕು ಎಂದು ಜಿಲ್ಲಾ ಮತ್ತು ಸತ್ರ ನ್ಯಾಯಾಧೀಶ ಬಿ.ವಿ.ಪಾಟೀಲ ಹೇಳಿದರು. 

ಇಲ್ಲಿನ ಸಿದ್ದೇಶ್ವರ ಡಿವೈನ್‌ ಪ್ಯಾಲೇಸ್‌ ಕೋಟನೂರುನಲ್ಲಿ ಶ್ರೀರಾಮ ಟ್ರಾನ್ಸ್‌ಪೊàರ್ಟ್‌ ಫೈನಾನ್ಸ್‌ ಪ್ರಾದೇಶಿಕ ಕಚೇರಿ ಹಮ್ಮಿಕೊಂಡಿದ್ದ ಪ್ರೌಢಶಾಲೆ ವಿದ್ಯಾರ್ಥಿಗಳಿಗೆ ಪ್ರೋತ್ಸಾಹ ಧನ ವಿತರಿಸುವ ಕಾರ್ಯಕ್ರಮ ಉದ್ಘಾಟಿಸಿ ಅವರು ಮಾತನಾಡಿದರು. ಸಂಘ, ಸಂಸ್ಥೆಗಳು ಹಾಗೂ ಫೈನಾನ್ಸ್‌ನವರು ಸಮಾಜದಿಂದಲೇ ಹಣವನ್ನು ಗಳಿಸುತ್ತಾರೆ.

ಅಂಹತ ಹಣದಲ್ಲಿ ಸ್ವಲ್ಪವನ್ನು ಪುನಃ ಸಮಾಜದ ಒಳಿತಾಗಿ ಖರ್ಚು ಮಾಡುವುದು ಉತ್ತಮ ನಡೆಯಾಗಿದೆ. ಇದನ್ನು ಎಲ್ಲಾ ಸಂಸ್ಥೆಗಳು, ಸಂಘಗಳು ಅನುಸರಿಸಬೇಕು. ಇದರಿಂದ ಸಮಾಜದ ಪ್ರತಿ ಜವಾಬ್ದಾರಿ ಬೆಳೆಯುತ್ತದೆ. ಜನರು ಕೂಡ ಬಹುಕಾಲದವರೆಗೆ ಇಂತಹ ಸಂಸ್ಥೆಯೊಂದಿಗೆ ವ್ಯವಹಾರ ಮಾಡಲು ಇಚ್ಛೆ ಪಡುತ್ತಾರೆ ಎಂದರು. 

ಅಧ್ಯಕ್ಷತೆ ವಹಿಸಿದ್ದ ಶ್ರೀರಾಮ ಫೈನಾನ್ಸ್‌ನ ವಿಭಾಗೀಯ ಬಿಜಿನೆಸ್‌ ಮುಖ್ಯಸ್ಥ ಪಂಚಾಕ್ಷರಪ್ಪ ಜಿ. ಮಾತನಾಡಿ, ವಾಹನ ಚಾಲಕರು ಹಾಗೂ ಮಾಲೀಕರ ಮಕ್ಕಳಿಗೆ ನಮ್ಮ ಸಂಸ್ಥೆಯಿಂದ ವಿದ್ಯಾಭ್ಯಾಸಕ್ಕೆ ಅನುಕೂಲವಾಗಲು 3 ಸಾವಿರ ರೂ.ಗಳನ್ನು ನೀಡಲಾಗುತ್ತಿದೆ. ಜಿಲ್ಲೆಯ ಆಳಂದ, ಶಹಾಬಾದ, ಸೇಡಂ ಶಾಖೆಗಳಿಂದ ಒಟ್ಟು 60ಕ್ಕಿಂತ ಹೆಚ್ಚು ಅಂಕ ಪಡೆದ  790 ವಿದ್ಯಾರ್ಥಿಗಳಿಗೆ ಪ್ರೋತ್ಸಾಹ ಧನ ನೀಡಿ ಗೌರವಿಸಲಾಗಿದೆ ಎಂದರು. 

ಸಾರಿಗೆ ಆಯುಕ್ತ ಸಿದ್ದಪ್ಪ ಎಸ್‌.ಕಲ್ಲೇರ್‌, ಲಾರಿ ಮಾಲಿಕರ ಸಂಘದ ಅಧ್ಯಕ್ಷ ಮಹಮ್ಮದ್‌ ಮೈನೋದ್ದಿನ್‌, ಉದ್ದಿಮೆದಾರ ರಾಮಚಂದ್ರ ಟಿ.ರಘೋಜಿ, ಗುತ್ತಿಗೆದಾರರ ದಯಾನಂದ ಮುಖ್ಯ ಅತಿಥಿಗಳಾಗಿ ಆಗಮಿಸಿದ್ದರು. ಮೌನೇಶ ಪೂಜಾರಿ ಪ್ರಾಸ್ತಾವಿಕವಾಗಿ ಮಾತನಾಡಿದರು. ವಿದ್ಯಾರ್ಥಿಗಳು, ಪಾಲಕರು, ಶಿಕ್ಷಕರು, ಸಂಸ್ಥೆಯ ಸಿಬ್ಬಂದಿ ಇದ್ದರು. ಶಿವಕುಮಾರ ಹುಜರತಿ ನಿರೂಪಿಸಿ, ವಂದಿಸಿದರು.