ಗೂಗಲ್ ಸರ್ಚ್ ಮಾಡಿ, ಈ ವ್ಯಕ್ತಿ ಬಗ್ಗೆ ಹೆಚ್ಚು ಜೋಕ್ಸ್ ಇದೆ! ಮೋದಿ

Team Udayavani, Feb 10, 2017, 4:13 PM IST

ಲಕ್ನೋ:ತಮ್ಮ ಬಾಲಿಶ ಹೇಳಿಕೆ, ನಡವಳಿಕೆ ಮೂಲಕವೇ ಈ “ಕಾಂಗ್ರೆಸ್’ ಮುಖಂಡ ಜನಪ್ರಿಯರಾಗಿದ್ದಾರೆ! ಒಂದು ವೇಳೆ ನೀವು ಗೂಗಲ್ ಸರ್ಚ್ ಮಾಡಿದರೆ ನಿಮಗೆ ಈ ವ್ಯಕ್ತಿಯ ಬಗ್ಗೆಯೇ ಅತೀ ಹೆಚ್ಚು ಜೋಕ್ಸ್ ಸಿಗುತ್ತದೆ. ಕಾಂಗ್ರೆಸ್ ಪಕ್ಷದಲ್ಲಿ ಈ ಕಾಂಗ್ರೆಸ್ ಮುಖಂಡನ ಬಗ್ಗೆ ಇದ್ದಷ್ಟು ಜೋಕ್ಸ್ ಗಳು ಬೇರಾವ ಮುಖಂಡರು ಟಾರ್ಗೆಟ್ ಆಗಿಲ್ಲ ಎಂದು ಪ್ರಧಾನಿ ನರೇಂದ್ರ ಮೋದಿ ಅವರು ಎಐಸಿಸಿ ಉಪಾಧ್ಯಕ್ಷ ರಾಹುಲ್ ಗಾಂಧಿ ಹೆಸರನ್ನು ಹೇಳದೆ ತಿರುಗೇಟು ನೀಡಿದ ಪರಿ ಇದು!

ಉತ್ತರಪ್ರದೇಶದ ಬಿಜ್ನೋರ್ ಜಿಲ್ಲೆಯಲ್ಲಿ ಶುಕ್ರವಾರ ಚುನಾವಣಾ ಪ್ರಚಾರ ರಾಲಿಯನ್ನು ಉದ್ದೇಶಿಸಿ ಮಾತನಾಡಿದ ಪ್ರಧಾನಿ, ಕಾಂಗ್ರೆಸ್ ಪಕ್ಷದ ಒಬ್ಬ ಮುಖಂಡನ ಬಗ್ಗೆಯೇ ಅತೀ ಹೆಚ್ಚು ಜೋಕ್ಸ್ ಗಳು ಗೂಗಲ್ ನಲ್ಲಿ ಸಿಗುತ್ತದೆ ಎಂದು ಟಾಂಗ್ ನೀಡಿದರು. ಈ ಹೇಳಿಕೆಗೆ ನೆರೆದ ಜನಸ್ತೋಮ ನಗೆಗಡಲಲ್ಲಿ ತೇಲಿದರು.

ಇಂತಹ ಬಾಲಿಶ ಹೇಳಿಕೆಯಿಂದಾಗಿಯೇ ಕಾಂಗ್ರೆಸ್ ಪಕ್ಷದ ಹಿರಿಯ ಮುಖಂಡರು ಆತನಿಂದ ಅಂತರ ಕಾಯ್ದುಕೊಂಡಿದ್ದಾರೆ. ಆದರೆ ವಿಪರ್ಯಾಸ ಎಂಬಂತೆ ಅಖಿಲೇಶ್ ಯಾದವ್ ಮಾತ್ರ ಅವರನ್ನು ಹತ್ತಿರಕ್ಕೆ ಬಿಟ್ಟುಕೊಂಡಿದ್ದಾರೆ. ಹಾಗಾಗಿ ನನಗೀಗ ಅಖಿಲೇಶ್ ಜ್ಞಾನದ ಬಗ್ಗೆಯೇ ಅನುಮಾನ ಮೂಡುತ್ತಿದೆ ಎಂದು ವ್ಯಂಗ್ಯವಾಡಿದರು.

ಮಾಜಿ ಪ್ರಧಾನಿ ಡಾ.ಮನಮೋಹನ್ ಸಿಂಗ್ ಅವರಿಗೆ ರೇನ್ ಕೋಟ್ ಹಾಕಿ ಸ್ನಾನ ಮಾಡೋದು ಗೊತ್ತು ಎಂದು ರಾಜ್ಯಸಭೆಯಲ್ಲಿ ಹೇಳಿಕೆ ನೀಡಿದ್ದ 2 ದಿನಗಳ ತರುವಾಯ ಮೋದಿ ಮತ್ತೆ ಕಾಂಗ್ರೆಸ್ ಮುಖಂಡ ರಾಹುಲ್ ಗಾಂಧಿ ವಿರುದ್ಧ ಪರೋಕ್ಷವಾಗಿ ಟೀಕಾಪ್ರಹಾರ ನಡೆಸಿದ್ದಾರೆ.