ಸುಪ್ರೀಂಕೋರ್ಟಲ್ಲಿ ಒಬ್ಬರೇ ಮಹಿಳಾ ನ್ಯಾಯಮೂರ್ತಿ!

Team Udayavani, Feb 18, 2017, 3:45 AM IST

ನವದೆಹಲಿ: ಕರ್ನಾಟಕದ ಹೈಕೋರ್ಟಿನ ನ್ಯಾ.ಎಸ್‌.ಅಬ್ದುಲ್‌ ನಜೀರ್‌ ಮತ್ತು ಕೇರಳ ಹೈಕೋರ್ಟಿನ ಮುಖ್ಯ ನ್ಯಾಯಮೂರ್ತಿ, ರಾಜ್ಯದವರೇ ಆದ ನ್ಯಾ. ಮೋಹನ ಎಂ. ಶಾಂತನಗೌಡರ್‌ ಸೇರಿದಂತೆ ಐವರು ಸುಪ್ರೀಂಕೋರ್ಟ್‌ ನ್ಯಾಯಮೂರ್ತಿಗಳಾಗಿ ಶುಕ್ರವಾರ ಪ್ರಮಾಣ ಸ್ವೀಕಾರ ಮಾಡಿದ್ದಾರೆ. 

ಇದರಿಂದಾಗಿ ಸುಪ್ರೀಂಕೋರ್ಟಲ್ಲಿನ ಒಟ್ಟು ನ್ಯಾಯಮೂರ್ತಿಗಳ ಸಂಖ್ಯೆ 28ಕ್ಕೆ ಏರಿಕೆಯಾಗಿದೆ. ಗಮನಾರ್ಹ ಅಂಶವೆಂದರೆ ಈ ಪೈಕಿ ನ್ಯಾ.ಆರ್‌. ಭಾನುಮತಿ ಒಬ್ಬರೇ ಮಹಿಳಾ ಜಡ್ಜ್ಗಳಾಗಿದ್ದಾರೆ. 2014ರ ಆಗಸ್ಟ್‌ನಿಂದ ಅವರು ಸುಪ್ರೀಂಕೋರ್ಟಲ್ಲಿದ್ದಾರೆ. ಎರಡು ಹೈಕೋರ್ಟುಗಳಲ್ಲಿನ ಮಹಿಳಾ ಮುಖ್ಯ ಜಡ್ಜ್ ಗಳು ಸುಪ್ರೀಂಗೆ ನೇಮಕವಾಗಲಿಲ್ಲ ಎಂದು ಮೂಲಗಳು ತಿಳಿಸಿವೆ. ಈ ಬಗ್ಗೆ ಪ್ರತಿಕ್ರಿಯೆ ನೀಡಿದ ಹಿರಿಯ ನ್ಯಾಯವಾದಿ ಇಂದಿರಾ ಜೈಸಿಂಗ್‌ ಅವರಿಬ್ಬರನ್ನು ಯಾಕೆ ನ್ಯಾಯಮೂರ್ತಿಗಳ ಸಮಿತಿ ಪರಿಗಣಿಸಲಿಲ್ಲ ಎಂದು ಗೊತ್ತಾಗುತ್ತಿಲ್ಲ ಎಂದು ಹೇಳಿದ್ದಾರೆ. 1950ರಲ್ಲಿ ಸುಪ್ರೀಂಕೋರ್ಟು ಆರಂಭವಾದ ಬಳಿಕ ಒಟ್ಟಾರೆ 6 ಮಹಿಳಾ ಜಡ್ಜ್ಗಳು ನೇಮಕಗೊಂಡಿದ್ದಾರೆ.