ಗ್ರಾಮಸ್ಥರ ರಸ್ತೆ  ಬೇಡಿಕೆ: ಕೊಡಾಬೈಲ್‌ಗೆ ಎ.ಸಿ. ಭೇಟಿ: ಪರಿಶೀಲನೆ

Team Udayavani, Feb 22, 2017, 4:56 PM IST

ಕುಂದಾಪುರ:  ಕುಂದಾಪುರ ತಾಲೂಕಿನ ಹೆಂಗವಳ್ಳಿ ಗ್ರಾ.ಪಂ.ವ್ಯಾಪ್ತಿಯ ತೊಂಬತ್ತು ಸಮೀಪದ ನಕ್ಸಲ್‌ ಪ್ರದೇಶದ ಹಣೆಪಟ್ಟಿ ಕಟ್ಟಿಕೊಂಡ ಕೊಡಾಬೈಲ್‌ ಪ್ರದೇಶದ ಜನರು ಅನೇಕ ವರ್ಷಗಳಿಂದ ರಸ್ತೆ ಸಂಪರ್ಕಕ್ಕಾಗಿ ಬೇಡಿಕೆ ಇಟ್ಟಿದ್ದು  ಈ ಬಗ್ಗೆ ಸ್ಥಳ ಪರಿಶೀಲನೆಗಾಗಿ ಕುಂದಾಪುರ ಸಹಾಯಕ ಕಮಿಷನರ್‌ ಶಿಲ್ಪಾ ನಾಗ್‌ ಅವರು ಮಂಗಳವಾರ ಸ್ಥಳಕ್ಕೆ  ಭೇಟಿ ನೀಡಿದರು.

ರಸ್ತೆ ಬೇಡಿಕೆ ಇನ್ನೂ ಬೇಡಿಕೆ ಯಾಗಿಯೇ ಉಳಿದಿದ್ದು,  ರಸ್ತೆ ನಿರ್ಮಾಣಕ್ಕೆ ಹಲವಾರು ಬಾರಿ ಬೇಡಿಕೆ ಯನ್ನು  ನೀಡಿದರೂ ಯಾವುದೇ ಫಲ ಸಿಗದೆ ಇರುವ ಹಿನ್ನೆಲೆಯಲ್ಲಿ  ಗ್ರಾಮಸ್ಥರು  ಪ್ರತಿಭಟನೆಯ ಹಾದಿ ಹಿಡಿದಿದ್ದರು.

ಸ್ಥಳಕ್ಕೆ ಭೇಟಿ ನೀಡಿದ ಎ.ಸಿ. ಅವರು ಜನರ ಅಹವಾಲುಗಳನ್ನು ಸ್ವೀಕರಿಸಿ, ಪ್ರತಿ ಮನೆಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ ಅವರು ಕಡತಗಳ ಮಾಹಿತಿಯನ್ನು ಪಡೆ ದಿದ್ದು, ಈ ಜಾಗದಲ್ಲಿ  ಇರುವ ಕಾನೂನು ತೊಡಕನ್ನು ನಿವಾರಿಸಿ ಸ್ಥಳೀಯರ ರಸ್ತೆ ಬೇಡಿಕೆ  ಈಡೇರಿಸಲಾಗುವುದು ಎಂದು ಅವರು ಗ್ರಾಮಸ್ಥರಿಗೆ ತಿಳಿಸಿದರು. 

ಈ ಸಂದರ್ಭ ಕಂದಾಯ ಪರಿವೀಕ್ಷಕರು, ಗ್ರಾಮ ಕರಣಿರು, ಸರ್ವೆಯರ್‌ಗಳು  ಹಾಗೂ ಗ್ರಾಮಸ್ಥರು ಹಾಜರಿದ್ದರು.