ಟೋಲ್‌: ಮಾ. 3ರ ವರೆಗೆ ಯಥಾಸ್ಥಿತಿಗೆ ಸೂಚನೆ

Team Udayavani, Mar 1, 2017, 3:09 PM IST

ಮಂಗಳೂರು: ಟೋಲ್‌ ಗೇಟ್‌ನಲ್ಲಿ ಶುಲ್ಕ ಪಡೆಯುವ ವಿಚಾರಕ್ಕೆ ಸಂಬಂಧಿಸಿದಂತೆ ಮಾ. 3ರಂದು ಬೆಂಗಳೂರಿನಲ್ಲಿ ಸಭೆ ನಡೆಯಲಿದೆ. ಅಲ್ಲಿಯವರೆಗೆ ಯಥಾಸ್ಥಿತಿ ಮುಂದುವರಿಸುವಂತೆ ಸಂಸದ ನಳಿನ್‌ ಕುಮಾರ್‌ ಕಟೀಲು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದ ಅಧಿಕಾರಿಗಳಿಗೆ ಸೂಚಿಸಿದ್ದಾರೆ.

ದ.ಕ. ಜಿಲ್ಲಾಧಿಕಾರಿ ಕಚೇರಿ ಸಭಾಂಗಣದಲ್ಲಿ ಈ ಸಂಬಂಧ ನಡೆದ ಸಭೆಯಲ್ಲಿ ಅವರು ಮಂಗಳವಾರ ಮಾತನಾಡಿದರು. ಲೋಕೋಪಯೋಗಿ, ಬಂದರು ಮತ್ತು ಒಳನಾಡು ಜಲಸಾರಿಗೆ ಪ್ರಧಾನ ಕಾರ್ಯದರ್ಶಿ ಅಧ್ಯಕ್ಷತೆಯಲ್ಲಿ ಮಾ. 3ರಂದು ಸಭೆ ನಡೆಯಲಿದೆ ಎಂದರು.

ಸಭೆಯ ತೀರ್ಮಾನ ಉಲ್ಲಂ ಸಿ ಟೋಲ್‌ನಲ್ಲಿ ಶುಲ್ಕ ವಸೂಲಿ ನಡೆಸಿದರೆ ಸೂಕ್ತ ಕ್ರಮ ಕೈಗೊಳ್ಳಲಾಗುವುದು. ಸೂಚನೆ ಪಾಲಿಸದೆ ನಿರ್ಲಕ್ಷé ತೋರಿದರೆ ಸಂಬಂಧಪಟ್ಟವರ ವಿರುದ್ಧ ಕ್ರಿಮಿನಲ್‌ ಮೊಕದ್ದಮೆ ದಾಖಲಿಸುವಂತೆ ಪೊಲೀಸ್‌ ಅಧಿಕಾರಿಗಳಿಗೆ ಅವರು ನಿರ್ದೇಶ ನೀಡಿದರು.

ಏಕಾಭಿಪ್ರಾಯ ಸಲ್ಲಿಸಿ
ಜಿಲ್ಲಾಧಿಕಾರಿ ಡಾ| ಕೆ. ಜಿ. ಜಗದೀಶ್‌ ಮಾತನಾಡಿ, ಉಡುಪಿ ಜಿಲ್ಲೆಯ ಗುಂಡ್ಮಿ ಮತ್ತು ಹೆಜಮಾಡಿ ಹಾಗೂ ದ.ಕ. ಜಿಲ್ಲೆಯ ತಲಪಾಡಿಯಲ್ಲಿ ನವಯುಗ ಟೋಲ್‌ ಪ್ಲಾಜಾಗಳಲ್ಲಿ ಶುಲ್ಕ ವಸೂಲಿ ಸಂಬಂಸಿದಂತೆ ಜನರ ಸಮಸ್ಯೆ ಬಗೆಹರಿಸುವ ಅವಶ್ಯವಿದೆ. ಈ ನಿಟ್ಟಿನಲ್ಲಿ ಬೆಂಗಳೂರು ವಿಕಾಸ ಸೌಧದಲ್ಲಿ ನಡೆಯುವ ಸಭೆಯಲ್ಲಿ ಭಾಗವಹಿಸುವ ಸಂಘಟನೆ ಪ್ರತಿನಿಧಿಗಳು ತಮ್ಮ ಪಟ್ಟಿಯನ್ನು ನೀಡಬೇಕು. ಅಲ್ಲದೇ ಟೋಲ್‌ ಶುಲ್ಕ ಕ್ರಮದ ಬಗ್ಗೆ ಆಕ್ಷೇಪಗಳಿರುವವರು ಸಭೆಯಲ್ಲಿ ಏಕಾಭಿಪ್ರಾಯ ವ್ಯಕ್ತಪಡಿಸುವಂತೆ ಅವರು ಸೂಚಿಸಿದರು.

ಪರ್ಯಾಯ ರಸ್ತೆ
ಟೋಲ್‌ ಮಾರ್ಗ ಸಮೀಪದಲ್ಲೇ ಇರುವ ಚೆರ್ವತ್ತೂರು ರಸ್ತೆಗೆ ತಲಪಾಡಿ ಹೊಳೆ ಬಳಿ ಸೇತುವೆ ನಿರ್ಮಿಸಿದರೆ ಸ್ಥಳೀಯರು ಪರ್ಯಾಯ ರಸ್ತೆಯನ್ನೇ ಅವಲಂಬಿಸಬಹುದು ಎಂದು ಸ್ಥಳೀಯರು ಸಚಿವ ಖಾದರ್‌ ಅವರಿಗೆ ತಿಳಿಸಿದರು.

ನಿಯಮ ಉಲ್ಲಂಘನೆ ಆರೋಪ
ಫೆ. 27ರ ತನಕ ಸ್ಥಳೀಯ ಬಸ್‌ಗಳಿಗೆ ತುರ್ತು ನಿರ್ಗಮನ ರಸ್ತೆಯಲ್ಲಿ ಪ್ರಯಾಣಿಸಲು ಅವಕಾಶ ಒದಗಿಸಿದ್ದರೂ ಫೆ. 23ರಿಂದಲೇ ನವಯುಗ ಸಂಸ್ಥೆಯವರು ಈ ಮಾರ್ಗ ಬಂದ್‌ ಮಾಡಿದ್ದಾರೆ. ಇದರಿಂದ ಬೆಳಗ್ಗೆ ಪರೀಕ್ಷೆ ಬರೆಯಲಿದ್ದ ಮಕ್ಕಳು ತೊಂದರೆ ಅನುಭವಿಸಿದ್ದಾರೆ ಎಂದು ಸ್ಥಳೀಯರು ಆಕ್ಷೇಪಿಸಿದರು.

ಇದಕ್ಕೆ ಸಹಮತ ವ್ಯಕ್ತಪಡಿಸಿದ ಸಚಿವ ಯು.ಟಿ. ಖಾದರ್‌, ಗಡಿ ಪ್ರದೇಶದಲ್ಲಿ ಆರ್ಥಿಕವಾಗಿ ಹಿಂದುಳಿದ ಜನರಿದ್ದಾರೆ. ಅವರಿಗೆ ಹೊರೆಯಾಗದ ರೀತಿಯಲ್ಲಿ ಶುಲ್ಕ ನಿಗದಿಪಡಿಸಬೇಕಾಗಿದೆ ಎಂದು ಸಲಹೆ ನೀಡಿದರು.

ಅಪರ ಜಿಲ್ಲಾಧಿಕಾರಿ ಕುಮಾರ್‌, ಡಿಸಿಪಿ (ಕಾನೂನು ಸುವ್ಯವಸ್ಥೆ) ಶಾಂತರಾಜು, ಮಂಗಳೂರು ತಾಪಂ ಅಧ್ಯಕ್ಷ ಮಹಮ್ಮದ್‌ ಮೋನು ಉಪಸ್ಥಿತರಿದ್ದರು.