ಯುಪಿ 6ನೇ ಹಂತದಲ್ಲಿ ಶೇ.60ರಷ್ಟು, ಮಣಿಪುರದಲ್ಲಿ ಶೇ.84ರಷ್ಟು ಮತದಾನ

Team Udayavani, Mar 4, 2017, 7:12 PM IST

ಲಕ್ನೋ/ಇಂಫಾಲ್: ಉತ್ತರಪ್ರದೇಶದ 6ನೇ ಹಂತದ ವಿಧಾನಸಭೆ ಚುನಾವಣೆಯಲ್ಲಿ ಶೇ.60ರಷ್ಟು ಮತದಾನವಾಗಿದ್ದರೆ, ಮಣಿಪುರದ ವಿಧಾನಸಭಾ ಚುನಾವಣೆಯ ದಾಖಲೆ ಎಂಬಂತೆ ಶೇ.84ರಷ್ಟು ಮತದಾನವಾಗಿರುವುದಾಗಿ ಚುನಾವಣಾ ಆಯೋಗ ತಿಳಿಸಿದೆ.

ಮಣಿಪುರದ ಮೊದಲ ಹಂತದ ಚುನಾವಣೆಯ ಮತದಾನ ಶನಿವಾರ ಸಂಜೆ ಮುಕ್ತಾಯವಾಗಿದೆ. ವರದಿಯ ಪ್ರಕಾರ, ಅಂದಾಜು ಶೇ.84 ಮತದಾನವಾಗಿದೆ ಎಂದು ತಿಳಿಸಿದೆ. ಮಣಿಪುರದ 6 ಜಿಲ್ಲೆಗಳ 38 ವಿಧಾನಸಭಾ ಕ್ಷೇತ್ರಗಳಿಗೆ ಮೊದಲ ಹಂತದಲ್ಲಿ ನಡೆದ ಚುನಾವಣೆಯಲ್ಲಿ ದಾಖಲೆಯ ಮತದಾನ ನಡೆದಿದೆ ಎಂದು ಹೇಳಿದೆ.

ಅಂತಿಮ ವರದಿ ಇನ್ನಷ್ಟೇ ಬರಬೇಕಾಗಿದೆ. ಮಣಿಪುರದಲ್ಲಿ ನಡೆದ ಚುನಾವಣೆಯಲ್ಲಿ ಯಾವುದೇ ಅಹಿತಕರ ಘಟನೆ ಸಂಭವಿಸಿದ ಬಗ್ಗೆ ವರದಿಯಾಗಿಲ್ಲ. 

ಉತ್ತರ ಪ್ರದೇಶದ 6ನೇ ಹಂತದ ಚುನಾವಣೆಯಲ್ಲಿ 49 ಕ್ಷೇತ್ರಗಳಲ್ಲಿ ಶೇ.60ರಷ್ಟು ಮತದಾನವಾಗಿದೆ. 635 ಅಭ್ಯರ್ಥಿಗಳ ಭವಿಷ್ಯವನ್ನು 1.72 ಕೋಟಿ ಮತದಾರರು ನಿರ್ಧರಿಸುವ ಮೂಲಕ ಮತಯಂತ್ರದಲ್ಲಿ ಭದ್ರವಾಗಿದೆ.