ಜಗಳೂರಲ್ಲಿ ನೀರಿಗಾಗಿ ನಿತ್ಯ ಜಗಳ!

Team Udayavani, Mar 6, 2017, 12:49 PM IST

ಜಗಳೂರು: ಶಾಂತಿಸಾಗರದಿಂದ ಪೂರೈಕೆಯಲ್ಲಿ ಆಗುತ್ತಿರುವ ಕುಡಿಯುವ ನೀರಿನ ವ್ಯತ್ಯಯ ಮತ್ತು ಕೊಳವೆ ಬಾವಿಗಳಲ್ಲಿ ಜಲ ಪಾತಾಳ ಸೇರಿರುವ ಪರಿಣಾಮ ಅಕ್ಷರಶಃ ಜಗಳೂರು ಪಟ್ಟಣದಲ್ಲಿ ಕುಡಿಯುವ ನೀರಿಗಾಗಿ ಸಾರ್ವಜನಿಕರು ಪರದಾಡುತ್ತಿದ್ದಾರೆ.

ಮತ್ತೂಂದು ಕಡೆ ದಿನ ಬೆಳಗಾದರೆ ಸಾಕು ಶುದ್ಧ ಕುಡಿಯುವ ನೀರಿನ ಘಟಕದ ಮುಂದೆ ಬಿಂದಿಗೆ ಇಲ್ಲವೇ ಕ್ಯಾನ್‌ ಗಳನ್ನು ಹಿಡಿದು ಸರದಿಯ ಸಾಲಿನಲ್ಲಿ ನೀರಿಗಾಗಿ ಕಾಯಬೇಕಾದ ಪರಿಸ್ಥಿತಿ ಸಾಮಾನ್ಯವಾಗಿದೆ. ಖಾಸಗಿ ವ್ಯಕ್ತಿಗಳು ಸ್ಥಾಪಿಸಿರುವ ನಾಲ್ಕೆದು ಶುದ್ಧ ಕುಡಿಯುವ ನೀರಿನ ಘಟಕಗಳ ಕೊಳವೆ ಬಾವಿಗಳಲ್ಲೂ ಕೂಡಾ ಜಲ ಪಾತಾಳ ಸೇರಿರುವುದರಿಂದ ಸಹಜವಾಗಿ ಶುದ್ಧ ಕುಡಿಯುವ ನೀರಿನ ಪ್ರಮಾಣ ಇಳಿಮುಖವಾಗಿದೆ. 

ಹೀಗಾಗಿ ಇನ್ನು ಕೆಲ ಘಟಕಗಳು ತಾತ್ಕಾಲಿಕವಾಗಿ ಸ್ಥಗಿತಗೊಂಡಿವೆ. ಸದ್ಯ ಕೊಳಚೆ ನಿರ್ಮೂಲನಾ ಮಂಡಳಿ ಸ್ಥಾಪಿಸಿರುವ ಎರಡು ಶುದ್ಧ ಕುಡಿಯುವ ನೀರಿನ ಘಟಕಗಳು ಕಾರ್ಯ ನಿರ್ವಹಿಸುತ್ತಿರುವುದರಿಂದ ಸಾರ್ವಜನಿಕರು ಸ್ವಲ್ಪ ಮಟ್ಟಿಗೆ ನಿರಾಳರಾಗಿದ್ದಾರೆ.15 ವಾರ್ಡ್‌ಗಳನ್ನು ಹೊಂದಿರುವ  ಜಗಳೂರು ಪಟ್ಟಣದಲ್ಲಿ 28 ಸಾವಿರ ಜನಸಂಖ್ಯೆ ವಾಸ ಮಾಡುತ್ತಿದೆ.

ಪ್ರತಿಯೊಬ್ಬ ವ್ಯಕ್ತಿಗೆ ಸರಿ ಸುಮಾರು 100 ಲೀಟರ್‌ ನೀರು ಪೂರೈಕೆ ಮಾಡಬೇಕು. ಅಂದರೆ ಜಗಳೂರು ಪಟ್ಟಣಕ್ಕೆ ಪ್ರತಿದಿನ ಬರೋಬ್ಬರಿ 30 ಲಕ್ಷ ಲೀಟರ್‌ ನೀರು ಪೂರೈಕೆಯಾಗಬೇಕು. ಆದರೆ ಜಲ ಮೂಲವಿಲ್ಲದ ಪರಿಣಾಮ ಅಷ್ಟೊಂದು ನೀರು ಪೂರೈಕೆ ಮಾಡಲು ಪಟ್ಟಣ ಪಂಚಾಯಿತಿಗೆ ದೊಡ್ಡ ತಲೆ ನೋವಾಗಿದೆ. 

ಆದರೂ ಕೂಡಾ ಕುಡಿಯುವ ನೀರಿನ ಸಮಸ್ಯೆ ಬಗೆಹರಿಸಲು ಹರಸಾಹಸಪಡುತ್ತಿದ್ದು, ಶಾಂತಿಸಾಗರದಿಂದ ವಾರಕ್ಕೊಮ್ಮೆ ಜಗಳೂರಿಗೆ ಹರಿದು ಬರುವ ಅಲ್ಪಸ್ವಲ್ಪ ನೀರಿನ್ನು ಪಾಳೆಯಂತೆ ಪೂರೈಕೆ ಮಾಡಲಾಗುತ್ತಿದೆ. ಉಳಿದ ದಿನಗಳಲ್ಲಿ ಸಮಸ್ಯೆ ಉಲ್ಪಣಿಸಿರುವ ಪ್ರದೇಶಗಳಲ್ಲಿ ಟ್ಯಾಂಕರ್‌ನಿಂದ ನೀರು ಪೂರೈಕೆ ಮಾಡುವ ಮೂಲಕ ಬಿಗಾಡಿಯಿಸಿರುವ ಕುಡಿಯುವ ನೀರಿನ ಸಮಸ್ಯೆಯನ್ನು ಬಗೆಹರಿಸುವ ಪ್ರಯತ್ನದಲ್ಲಿದೆ.

ಒಟ್ಟಾರೆ ಜಗಳೂರು ಪಟ್ಟಣದಲ್ಲಿ ಉಂಟಾಗಿರುವ ಕುಡಿಯುವ ನೀರಿನ ಹಾಹಾಕಾರದ ನಡುವೆ ಜಗಳೂರು ಪಪಂ ಲಭ್ಯವಿರುವ ನೀರನ್ನು ಬಳಸಿಕೊಂಡು ಸಾರ್ವಜನಿಕರಿಗೆ ಪೂರೈಕೆ ಮಾಡುವ ಮೂಲಕ ಬಿಗಾಡಿಯಿಸಿರುವ ಸಮಸ್ಯೆಯನ್ನು ಶಮನಗೊಳಿಸುತ್ತಿದ್ದು, ಇದು ಪ್ರಯತ್ನ ನಿರಂತರವೋ ಅಥವಾ ತಾತ್ಕಾಲಿಕವೋ ಎಂಬುದು ಮಾತ್ರ ತೀವ್ರ ಕುತೂಹಲ ಮೂಡಿಸಿದೆ. 

* ಸಿ.ಬಸವರಾಜ್‌