ಸಿದ್ಧಗಂಗಾ ಮಠದಲ್ಲಿ “ಟಗರು’ ಚಿತ್ರೀಕರಣ

Team Udayavani, Mar 8, 2017, 11:27 AM IST

ಶಿವರಾಜಕುಮಾರ್‌ ಅಭಿನಯದ “ಟಗರು’ ಚಿತ್ರತಂಡವು ಮಂಗಳವಾರ ತುಮಕೂರಿನಲ್ಲಿ ಬೀಡುಬಿಟ್ಟಿತ್ತು. ತುಮಕೂರಿನ ಸಿದ್ಧಗಂಗಾ ಮಠದಲ್ಲಿ “ಟಗರು’ ಚಿತ್ರದ ಚಿತ್ರೀಕರಣ ನಡೆಯಿತು. “ಟಗರು’ ಚಿತ್ರ ಶುರುವಾಗಿ ಹಲವು ದಿನಗಳಾದರೂ, ಶಿವರಾಜಕುಮಾರ್‌ ಅವರ ಪಾತ್ರದ ಬಗ್ಗೆ ರಹಸ್ಯ ಕಾದುಕೊಳ್ಳಲಾಗಿತ್ತು.

ಆದರೆ, ಮಠದಲ್ಲಿ ಶಿವರಾಜಕುಮಾರ್‌ ಅವರು ಪೊಲೀಸ್‌ ಸಮವಸ್ತ್ರದಲ್ಲಿ ಕಾಣಿಸಿಕೊಳ್ಳುವ ಮೂಲಕ, ಚಿತ್ರದಲ್ಲಿ ತಮ್ಮ ಪಾತ್ರವೇನು ಎಂಬುದನ್ನು ಸೂಚಿಸಿದರು. ಈ ಸಂದರ್ಭದಲ್ಲಿ ಅವರು ಶ್ರೀ ಶಿವಕುಮಾರ ಸ್ವಾಮೀಜಿ ಅವರ ಕಾಲಿಗೆ ನಮಸ್ಕರಿಸಿ, ಆಶೀರ್ವಾದ ಪಡೆಯುವ ದೃಶ್ಯವನ್ನು ಚಿತ್ರೀಕರಿಸಿಕೊಳ್ಳಲಾಯಿತು.

ಮಠಕ್ಕೆ ಬಂದಿದ್ದ ಶಿವರಾಜಕುಮಾರ್‌ ಅವರನ್ನು ಮಠದ ವತಿಯಿಂದ ಶಾಲು ಹೊದಿಸಿ ಸನ್ಮಾನಿಸಲಾಯಿತು. ಈ ಸಂದರ್ಭದಲ್ಲಿ ನಿರ್ದೇಶಕ “ದುನಿಯಾ’ ಸೂರಿ, ನಿರ್ಮಾಪಕ ಕೆ.ಪಿ. ಶ್ರೀಕಾಂತ್‌ ಸೇರಿದಂತೆ ಹಲವರು ಭಾಗವಹಿಸಿದ್ದರು. ಶಿವರಾಜಕುಮಾರ್‌ ಅವರನ್ನು ನೋಡುವುದಕ್ಕೆ ಮಠದ ಆವರಣದಲ್ಲಿ ಸಾಕಷ್ಟು ಜನ ಸೇರಿದ್ದು ವಿಶೇಷವಾಗಿತ್ತು.