ಧೋನಿ ಗೈರು; ಅಭಿಮಾನಿಗಳಿಗೆ ಬೇಜಾರು

Team Udayavani, Mar 15, 2017, 10:59 AM IST

ರಾಂಚಿ: ರಾಂಚಿ! ವಿಶ್ವ ಭೂಪಟದಲ್ಲಿ ಈ ಹೆಸರನ್ನು ಮಿಂಚುವಂತೆ ಮಾಡಿದ್ದು ಕ್ರಿಕೆಟಿಗ ಮಹೇಂದ್ರ ಸಿಂಗ್‌ ಧೋನಿ. ಜಾರ್ಖಂಡ್‌ ರಾಜ್ಯದ ಈ ರಾಜಧಾನಿಯೀಗ ಭಾರತದ ನೂತನ ಟೆಸ್ಟ್‌ ಕೇಂದ್ರ. ಆದರೆ ಇದರಲ್ಲಿ ರಾಂಚಿಯ ಹೆಮ್ಮೆಯ ಪುತ್ರ ಧೋನಿ ಆಡದಿರುವುದು ಅಭಿಮಾನಿಗಳ ಪಾಲಿಗೆ ಅತ್ಯಂತ ಬೇಸರದ ಸಂಗತಿ. ಅಷ್ಟೇ ಅಲ್ಲ, ಈ ಪಂದ್ಯವನ್ನು ವೀಕ್ಷಿಸುವ ಅವಕಾಶವನ್ನೂ ಅವರು ತಪ್ಪಿಸಿಕೊಳ್ಳಲಿದ್ದಾರೆ. ಇದಕ್ಕೆ ಕಾರಣ, ವಿಜಯ್‌ ಹಜಾರೆ ಟ್ರೋಫಿ ಕ್ರಿಕೆಟ್‌. ಜಾರ್ಖಂಡ್‌ ತಂಡವನ್ನು ಮುನ್ನಡೆಸುತ್ತಿರುವ ಧೋನಿ ಸದ್ಯ ಹೊಸದಿಲ್ಲಿಯಲ್ಲಿದ್ದಾರೆ. 

ಆದರೆ ಧೋನಿ ಕುಟುಂಬದ ಸದಸ್ಯರು ಈ ಟೆಸ್ಟ್‌ ಪಂದ್ಯದ ವೇಳೆ ಉಪಸ್ಥಿತರಿರುವರು ಎಂಬುದಾಗಿ ತಿಳಿದು ಬಂದಿದೆ. ಇವ ರಿಗೆ ಈಗಾಗಲೇ ರಾಜ್ಯ ಕ್ರಿಕೆಟ್‌ ಮಂಡಳಿ ಆಹ್ವಾನ ನೀಡಿದೆ.”ರಾಂಚಿಯಲ್ಲಿ ಟೆಸ್ಟ್‌ ನಡೆಯುವಂತಾಗಲು ಧೋನಿಯೇ ಕಾರಣ. ಅವರಿಂದಾಗಿಯೇ ವಿಶ್ವ ಭೂಪಟದಲ್ಲಿ ರಾಂಚಿ ರಾರಾಜಿಸಿದೆ. ಆದರೆ ಇಲ್ಲಿ ಚೊಚ್ಚಲ ಟೆಸ್ಟ್‌ ನಡೆಯುವ ಈ ಐತಿಹಾಸಿಕ ಗಳಿಗೆಯಲ್ಲಿ ಅವರ ಗೈರು ಎದ್ದುಕಾಣುತ್ತಿದೆ. ಏನೇ ಇರಲಿ, ರಾಂಚಿ ಟೀಮ್‌ ಇಂಡಿಯಾ ಪಾಲಿಗೆ ಅದೃಷ್ಟ ತರಲಿ…’ ಎಂದವರು ಧೋನಿಯ ಬಾಲ್ಯದ ಕೋಚ್‌ ಕೇಶವ ಬ್ಯಾನರ್ಜಿ.

ಈ ಟೆಸ್ಟ್‌ ಧಿಂದ್ಯದ ವೇಳೆ ಧೋನಿಯನ್ನು ಸಮ್ಮಾನಿಸುವುದು ಜೆಎಸ್‌ಸಿಎ ಉದ್ದೇಶವಾಗಿತ್ತು. ಆದರೆ ವಿಜಯ್‌ ಹಜಾರೆ ಪಂದ್ಯಾವಳಿಯಲ್ಲಿ ಜಾರ್ಖಂಡ್‌ ತಂಡದ ಓಟದಿಂದ ಈ ಯೋಜನೆ ಸದ್ಯಕ್ಕೆ ಸ್ಥಗಿತಗೊಂಡಿದೆ. ಧೋನಿ ತಂಡ ಈ ಟ್ರೋಫಿ ಯನ್ನು ಹೊತ್ತುತರಬೇಕೆಂಬುದೇ  ಅಭಿಮಾನಿಗಳ ಬಯಕೆ.

ವಿದ್ಯಾರ್ಥಿಗಳಿಗೆ ಉಚಿತ ಪ್ರವೇಶ
ಧೋನಿ ಕಲಿತ “ಜವಾಹರ್‌ ವಿದ್ಯಾ ಮಂದಿರ್‌’ ಶಾಲೆಯ ವಿದ್ಯಾರ್ಥಿಗಳೂ ಸೇರಿದಂತೆ ರಾಂಚಿ ಟೆಸ್ಟ್‌ ಪಂದ್ಯದ ವೇಳೆ ವಿದ್ಯಾರ್ಥಿಗಳಿಗೆ ಉಚಿತ ಪ್ರವೇಶ ನೀಡಲು ಜೆಎಸ್‌ಸಿಎ ನಿರ್ಧರಿಸಿದೆ. ದಿನಂಪ್ರತಿ 10 ಸಾವಿರ ವಿದ್ಯಾರ್ಥಿಗಳು ಈ ಪಂದ್ಯಕ್ಕೆ ಸಾಕ್ಷಿಯಾಗಲಿದ್ದಾರೆ ಎಂದು ರಾಜ್ಯ ಕ್ರಿಕೆಟ್‌ ಮಂಡಳಿ ಕಾರ್ಯದರ್ಶಿ ದೇಬಶಿಷ್‌ ಚಕ್ರವರ್ತಿ ಹೇಳಿದ್ದಾರೆ.ರಾಂಚಿ ಸ್ಟೇಡಿಯಂ 40 ಸಾವಿರ ವೀಕ್ಷಕರ ಸಾಮರ್ಥ್ಯ ಹೊಂದಿದ್ದು, ಪ್ರತಿ ದಿನ 30 ಸಾವಿರ ಮಂದಿ ಜಮಾಯಿಸುವ ನಿರೀಕ್ಷೆ ಇರಿಸಿಕೊಳ್ಳಲಾಗಿದೆ.