ಕಟಾವಿಗೆ ಬಂದಿದ್ದ ಜೋಳ, ದ್ರಾಕ್ಷಿ ಹಾನಿ

Team Udayavani, Mar 17, 2017, 3:14 PM IST

ಕಲಬುರಗಿ: ಜಿಲ್ಲೆಯಾದ್ಯಂತ ಬುಧವಾರ ಹಾಗೂ ಗುರುವಾರ ಬೆಳಗ್ಗೆ ಸುರಿದ ಅಕಾಲಿಕ ಮಳೆಗೆ ಕಟಾವು ಆಗದೇ ಉಳಿದ ಜೋಳ, ದ್ರಾಕ್ಷಿ ಬೆಳೆಗೆ ಹಾನಿಯುಂಟಾಗಿದ್ದು, ಬೆಂಬಲ ಬೆಲೆಯಲ್ಲಿ ಖರೀದಿ ಕೇಂದ್ರಕ್ಕೆ ಮಾರಾಟಕ್ಕಾಗಿ ತರಲಾದ ತೊಗರಿಯು ಹಸಿಯಾಗಿದ್ದರಿಂದ ರೈತರು ನಷ್ಟ ಅನುಭವಿಸುವಂತಾಗಿದೆ. 

ಅಫಜಲಪುರ ತಾಲೂಕಿನ ಕರ್ಜಗಿ ಗ್ರಾಮದ ಸೀಮಾಂತರದಲ್ಲಿ ಬುಧವಾರ ಸಂಜೆ ಹೊಲದಲ್ಲಿ ಕೆಲಸ ಮಾಡುತ್ತಿದ್ದ ಯುವಕ ದಾವೂಲ್‌ ರಸೂಲ್‌ಸಾಬ (22) ಸಿಡಿಲಿಗೆ ಬಲಿಯಾಗಿದ್ದಾನೆ. ಗುರುವಾರ ಬೆಳಗ್ಗೆ ಜಿಲ್ಲೆಯಾದ್ಯಂತ 12.01 ಮಿ.ಮೀ. ಮಳೆಯಾಗಿದೆ. ಮಳೆಯಿಂದಾಗಿ ಒಂದೆರಡು ದಿನ ಹಾಗೂ ಮುಂದಿನ ವಾರಗಳಲ್ಲಿ ಕಟಾವು ಆಗಬೇಕಿದ್ದ ದ್ರಾಕ್ಷಿ ಬೆಳೆ ನಷ್ಟಕ್ಕೆ ಒಳಗಾಗಿದೆ.

ದ್ರಾಕ್ಷಿ ಹಣ್ಣುಗಳು ಉದುರಿವೆಯಲ್ಲದೆ ನೀರಿನಿಂದ ಕೊಳೆಯುವಂತಾಗಿದೆ. ವಾರ ಇಲ್ಲವೇ ಎರಡು ವಾರದೊಳಗೆ ಬಹುತೇಕ ದ್ರಾಕ್ಷಿ ಫಲ ಕಟಾವು ಆಗಿ ಮಾರುಕಟ್ಟೆಗೆ ಹೋಗುತ್ತಿತ್ತು. ಆದರೆ ಅಕಾಲಿಕವಾಗಿ ಸುರಿದ ಮಳೆ ದ್ರಾಕ್ಷಿ ರೈತನಿಗೆ ಕೈಗೆ ಬಂದ ತುತ್ತು ಬಾಯಿಗೆ ಬಾರದಂತಾಗಿದೆ. ಇನ್ನುಳಿದಂತೆ ಅಫಜಲಪುರ, ಆಳಂದ ತಾಲೂಕಿನಲ್ಲಿರುವ ದ್ರಾಕ್ಷಿ ಬೆಳೆಯೇ ಅಪಾರ ಪ್ರಮಾಣದಲ್ಲಿ ಹಾನಿಯಾಗಿದೆ.

ಜಿಲ್ಲೆಯಾದ್ಯಂತ 350 ಎಕರೆ ದ್ರಾಕ್ಷಿ ಬೆಳೆಯಿದ್ದು, ಇದರಲ್ಲಿ ಶೇ. 90ರಷ್ಟು ದ್ರಾಕ್ಷಿ ಕಟಾವು ಆಗಿದೆ. ಉಳಿದ ಶೇ. 10 ರಷ್ಟರಲ್ಲಿನ ದ್ರಾಕ್ಷಿ ಬೆಳೆ ಮಳೆಗೆ ಹಾನಿಗೊಳಗಾಗಿದೆ. ಒಣ ಬೇಸಾಯದ ಹಿಂಗಾರು ಹಂಗಾಮಿನ ಪ್ರಮುಖ ಬೆಳೆಯಾಗಿರುವ ಜೋಳದ ರಾಶಿ ಶೇ. 90ರಷ್ಟು ಆಗಿದೆ. ಅದೇ ರೀತಿ ವಾರ ಕಳೆದಿದ್ದರೆ ಅಳಿದುಳಿದ ಜೋಳವೆಲ್ಲ ರಾಶಿಯಾಗುತ್ತಿತ್ತು. ಆದರೆ ಈಗ ಮಳೆಯಾಗಿದ್ದರಿಂದ ಸ್ವಲ್ಪ ಹಾನಿಯಾಗುವಂತಾಗಿದೆ. 

ಹಾನಿ ವರದಿ ಸಲ್ಲಿಕೆಗೆ ಸೂಚನೆ: ಗುರುವಾರ ಬಿದ್ದ ಅಕಾಲಿಕ ಮಳೆಯಿಂದಾಗಿ ಹಾನಿಯಾಗಿರುವ ದ್ರಾಕ್ಷಿ ಬೆಳೆರ ವಿವರಗಳೊಂದಿಗೆ ಪಹಣಿ ಸಮೇತ ತಹಶೀಲ್ದಾರರಿಗೆ ಅರ್ಜಿ ಸಲ್ಲಿಸುವಂತೆ ಎಲ್ಲ ರೈತರಿಗೆ ಸೂಚನೆ ನೀಡಲಾಗಿದೆ. ಬಂದ ದೂರಿನ ಅರ್ಜಿಗಳೊಂದಿಗೆ ಆಯಾ ಕ್ಷೇತ್ರಕ್ಕೆ ಹೋಗಿ ಹಾನಿ ದಾಖಲು ಮಾಡಿಕೊಳ್ಳಲಾಗುವುದು. ಸಿಆರ್‌ಎಫ್‌ ಅಡಿ ಪರಿಹಾರ ದೊರಕಿಸಲು ಯತ್ನಿಸಲಾಗುವುದು ಎಂದು ತೋಟಗಾರಿಕೆ ಇಲಾಖೆ ಉಪನಿರ್ದೇಶಕ ಮಹ್ಮದ ಅಲಿ “ಉದಯವಾಣಿ’ಗೆ ತಿಳಿಸಿದ್ದಾರೆ. 

ಬೆಂಬಲ ಬೆಲೆಯಲ್ಲಿ ತೆರೆಯಲಾದ ತೊಗರಿ ಖರೀದಿ ಕೇಂದ್ರಕ್ಕೆ ರೈತ ತಂದಿದ್ದ ತೊಗರಿ ಮಳೆಯಿಂದ ಹಸಿಯಾಗಿರುವ ಘಟನೆಗಳು ವರದಿಯಾಗಿದೆ. ಮಾರಾಟಕ್ಕಾಗಿ ಸರದಿಯಾಗಿ ಟ್ರಾಕ್ಟರ್‌ನಲ್ಲಿ ನಿಲ್ಲಿಸಲಾಗಿದ್ದ ತೊಗರಿ ಹಸಿಯಾಗಿದ್ದರಿಂದ ರೈತರು ಅದನ್ನು ಬಿಸಿಲಿನಲ್ಲಿ ಒಣಗಿಸುತ್ತಿರುವುದು ಕಂಡು ಬಂತು. ಚೀಲದ ಸಮಸ್ಯೆಯಿಂದ ಖರೀದಿ ಪ್ರಕ್ರಿಯೆ ಜೋರಾಗಿ ನಡೆಯದಿರುವುದರಿಂದ ಅಪಾರ ಪ್ರಮಾಣದಲ್ಲಿ ತೊಗರಿ ಹಾನಿಯಾಗುವುದು ತಪ್ಪಿದೆ.  

* ಹಣಮಂತರಾವ ಭೈರಾಮಡಗಿ