ಯುಪಿಯಲ್ಲಿ ರಾಜಕೀಯ ಪಕ್ಷಗಳು ಹರಿಸಿದ ಹಣದ ಹೊಳೆಯ ಮೊತ್ತ 5,500 ಕೋಟಿ

Team Udayavani, Mar 17, 2017, 3:44 PM IST

ನವದೆಹಲಿ:ಇತ್ತೀಚೆಗೆ ನಡೆದ ಮಿನಿ ಹೈವೋಲ್ಟೇಜ್ ಚುನಾವಣೆ ಎಂದೇ ಬಿಂಬಿತವಾಗಿದ್ದ ಉತ್ತರಪ್ರದೇಶದಲ್ಲಿ ವಿವಿಧ ಪಕ್ಷಗಳು ಪ್ರಚಾರಕ್ಕಾಗಿಯೇ ಬರೋಬ್ಬರಿ 5,500ಕ್ಕೂ ಹೆಚ್ಚು ಕೋಟಿ ರೂಪಾಯಿ ಖರ್ಚು ಮಾಡಿವೆಯಂತೆ.  ನಗದು ಹಾಗೂ ಮದ್ಯಕ್ಕಾಗಿಯೇ ಮತ ಮಾರಾಟ ಮಾಡಿಕೊಂಡಿರುವುದಾಗಿ 3/1ರಷ್ಟು ಮತದಾರರು ಒಪ್ಪಿಕೊಂಡಿರುವುದಾಗಿ ಸಮೀಕ್ಷಾ ವರದಿ ಶುಕ್ರವಾರ ತಿಳಿಸಿದೆ.

ಸಿಎಂಎಸ್ ಚುನಾವಣಾ ಪೂರ್ವ ಸಮೀಕ್ಷೆಯ ಪ್ರಕಾರ, ಪ್ರಮುಖ ರಾಜಕೀಯ ಪಕ್ಷಗಳು ಉತ್ತರಪ್ರದೇಶ ಚುನಾವಣೆಯಲ್ಲಿ ಮತ ಸಮರಕ್ಕಾಗಿ 5,500 ಕೋಟಿ ರೂಪಾಯಿ ಖರ್ಚು ಮಾಡಿರುವುದಾಗಿ ಹೇಳಿದೆ.

ದೇಶದ ಚುನಾವಣಾ ಆಯೋಗ, ಚುನಾವಣಾ ಪ್ರಚಾರಕ್ಕಾಗಿ ಒಬ್ಬ ಅಭ್ಯರ್ಥಿ 25 ಲಕ್ಷ ರೂಪಾಯಿ ಖರ್ಚು ಮಾಡಬಹುದು ಎಂದು ತಿಳಿಸಿತ್ತು. ಆದರೆ ಚುನಾವಣೆಯಲ್ಲಿ ಪ್ರತಿಯೊಂದು ಪಕ್ಷದ ಅಭ್ಯರ್ಥಿಯು ಆಯೋಗ ನಿಗದಿಪಡಿಸಿದ್ದ ಮೊತ್ತಕ್ಕೂ, ಅವರು ಖರ್ಚು ಮಾಡುವುದಕ್ಕೂ ಅಜಗಜಾಂತರ ವ್ಯತ್ಯಾಸ ಇರುತ್ತದೆ. ಚುನಾವಣೆ ಬಳಿಕ ಅಭ್ಯರ್ಥಿ ಘೋಷಿಸುವ ವೆಚ್ಚದ ಮೊತ್ತವೇ ಬೇರೆ ಆಗಿರುತ್ತದೆ..ಇದು ಎಲ್ಲರಿಗೂ ತಿಳಿದಿರುವ ಬಹಿರಂಗ ರಹಸ್ಯ!

ಮತದಾರರಿಗೆ ಅಂದಾಜು ಸುಮಾರು ಒಂದು ಸಾವಿರ ಕೋಟಿ ರೂಪಾಯಿಯಷ್ಟು ಹಂಚಲಾಗಿದೆಯಂತೆ. ಸಮೀಕ್ಷೆಯ ಪ್ರಕಾರ ಉತ್ತರಪ್ರದೇಶದ ಶೇ.55ರಷ್ಟು ಜನರು ವೈಯಕ್ತಿವಾಗಿ ಅಥವಾ ನೆರೆಹೊರೆಯವರು ಹಣ ಪಡೆದೇ ಮತ ಚಲಾಯಿಸಿರುವುದಾಗಿ ಒಪ್ಪಿಕೊಂಡಿರುವುದಾಗಿ ವರದಿ ವಿವರಿಸಿದೆ.