ಅಂಬೇಡ್ಕರ್‌ ಜಯಂತಿಗೆ ಕಲಾ ತಂಡಗಳ ಮೆರಗು

Team Udayavani, Mar 19, 2017, 2:48 PM IST

ಚಿತ್ತಾಪುರ: ತೊಗರಿ ಖಣಜ ಎಂದೇ ಖ್ಯಾತಿ ಪಡೆದ ತಾಲೂಕಿನಲ್ಲಿ ಬಿಸಿಲು ನೆತ್ತಿಗೆರುವ ಹೊತ್ತಿನಲ್ಲಿ ಡಾ| ಬಿ.ಆರ್‌ ಅಂಬೇಡ್ಕರ್‌ ಅವರ ಭಾವಚಿತ್ರ ಭವ್ಯ ಮೆರವಣಿಗೆ ಪಟ್ಟಣದ ಪ್ರಮುಖ ಬಿದಿಗಳಲ್ಲಿ ಅದ್ಧೂರಿಯಾಗಿ ನಡೆಯಿತು.

ಪಟ್ಟಣ ಹಾಗೂ ಸುತ್ತಮುತ್ತಲಿನ ಗ್ರಾಮಗಳಿಂದ ಹರಿದು ಬಂದ ಎಲ್ಲ ಜಾತಿ ಜನರಿಂದ ಹೊರಹೊಮ್ಮಿದ ಮುಗಿಲು ಮುಟ್ಟುವ ಉದ್ಘೋಷ, ಕಣ್ಣು ಹಾಯಿಸಿದಷ್ಟು ಕಾಣುತ್ತಿದ್ದ ನೀಲಿ ಬಾವುಟಗಳ ನಡುವೆ ಡಾ| ಬಾಬಾಸಾಹೇಬ್‌ ಅಂಬೇಡ್ಕರ್‌ ಅವರ ಭಾವಚಿತ್ರವಿದ್ದ ಸಾರೋಟಿ ಮುಂದೆ ಸಾವಿರಾರು ಜನರು ಸಾಗಿ ಬಂದರು. 

ಇಲ್ಲಿಯವರೆಗೆ ತಾಲೂಕಿನಲ್ಲಿ ಬಾಬಾಸಾಹೇಬ್‌ ಅಂಬೇಡ್ಕರ್‌ ಅವರ ಜಯಂತಿ ಕಾರ್ಯಕ್ರಮ ಇಷ್ಟೊಂದು ಬೃಹತ್‌ ಪ್ರಮಾಣದಲ್ಲಿ ನಡೆದಿರಲಿಲ್ಲ. ಆದರೆ ಐಟಿ-ಬಿಟಿ ಮತ್ತು ಪ್ರವಾಸೋದ್ಯಮ ಖಾತೆ ಸಚಿವ ಪ್ರಿಯಾಂಕ್‌ ಖರ್ಗೆ ಅವರು ಈ ಕ್ಷೇತ್ರದಿಂದ ಪ್ರಥಮ ಬಾರಿಗೆ ಶಾಸಕರಾಗಿ, ಸಚಿವರಾಗಿ ಆಯ್ಕೆಯಾಗಿ ಪ್ರಥಮ ಬಾರಿಗೆ ಮಾಡಿ ತೋರಿಸಿದರು.

ತಾಲೂಕಿನ ಎಲ್ಲ ಭಾಗದ ಜನರು ಕೂಡ ಸಚಿವರ ಮಾತಿಗೆ ಬೆಲೆ ಕೊಟ್ಟು ತಾವು ಬರುವುದಲ್ಲದೇ ಇನ್ನುಳಿದ ಜನರನ್ನು ಕರೆ ತಂದು ಕಾರ್ಯಕ್ರಮ ಯಶಸ್ವಿಯಾಗಿ ಮಾಡಲು ಕಾರಣಿಭೂತರಾದರು. ಸಚಿವರು ಸಹ ಬೆಳಗ್ಗೆಯೇ ಕಲಬುರಗಿಯಿಂದ ಪಟ್ಟಣಕ್ಕೆ ಆಗಮಿಸಿ ಯಾವುದೇ ರೀತಿಯ ಅಹಿತಕರ ಘಟನೆ ನಡೆಯದಂತೆ ಮುನ್ನೆಚ್ಚರಿಕೆ ವಹಿಸುವಂತೆ ಪೊಲೀಸರಿಗೆ ಆದೇಶಿಸಿದರು.

ಯಾವುದೇ ರೀತಿಯ ಅಹಿತಕರ ಘಟನೆ ನಡೆಯದಂತೆ ಎಲ್ಲರು ಸಹಕರಿಸಬೇಕು ಎಂದು ಮನವಿ ಮಾಡಿ ಮೆರವಣಿಗೆಗೆ ಚಾಲನೆ ನೀಡಿದರು. ಅದಕ್ಕೆ ಸಮಿತಿ ಗೌರಾವಾಧ್ಯಕ್ಷ ಟೋಪಣ್ಣ ಕೊಮಟೆ, ಅಧ್ಯಕ್ಷ ಮಾಪಣ್ಣ ಗಂಜಗೀರಿ, ಕಾರ್ಯಾಧ್ಯಕ್ಷ ಶಿವರುದ್ರ ಭೀಣಿ, ಪ್ರಚಾರ ಸಮಿತಿ ಅಧ್ಯಕ್ಷ ಮಲ್ಲಪ್ಪ ಹೊಸ್ಮನಿ ಇಂಗನಕಲ್‌, ಉಪಾಧ್ಯಕ್ಷ ಸುನೀಲ ದೊಡ್ಮನಿ, ಪ್ರಧಾನ ಕಾರ್ಯದರ್ಶಿ ಶಿವಕಾಂತ ಬೆಣ್ಣೂರಕರ್‌, ಕೋಶಾಧ್ಯಕ್ಷ ಭಾಗಪ್ಪ ಕೊಲ್ಲೂರ, ಸಂಘಟನಾ ಕಾರ್ಯದರ್ಶಿ ಆಸ್ತಿಕ್‌ ಮೌರ್ಯ ಸಾಥ್‌ ನೀಡಿದರು. 

ಮುಂಚೂಣಿಯಲ್ಲಿದ್ದ ಸಾವಿರಾರು ಜನರು, ಸ್ವಯಂ ಸೇವಕರು ಭೋಲಾರೇ ಭೋಲೋ ಜೈ ಭೀಮ್‌ ಭೋಲೋ ಎಂದು ಘೋಷಣೆ ಕೂಗುತ್ತಾ 125ನೇ ಜಯಂತಿ ಕಾರ್ಯಕ್ರಮಕ್ಕೆ ಎಲ್ಲರನ್ನು ಆಹ್ವಾನಿಸಿದರು.ಮೆರವಣಿಗೆಗೆ ವಿಶೇಷ ನೀಡಿದ್ದು ಪಟ್ಟಣದ  ತುಂಬಾ ನೀಲಿ ಧ್ವಜ, ತೊಗರಿ ಖಣಿಜ, ಕಲ್ಲಿನ ನಾಡು, ಐತಿಹಾಸಿ ಸ್ಥಳ ಹೊಂದಿದ ತಾಲೂಕು ಎಂದು ಪ್ರಸಿದ್ಧಿ ಹೊಂದಿದ ತಾಲೂಕಿನಲ್ಲಿ ಅಂಬೇಡ್ಕರ್‌ ಅವರ ಕಟ್ಟಾಳುಗಳು, ಯುವ ಮನಸ್ಸುಗಳು ಧ್ವಜ ಹಿಡಿದು ಹುರುಪಿನಿಂದ ಹೆಜ್ಜೆ ಹಾಕಿದರು.

ಮೆರವಣಿಗೆ ಉದ್ದಕ್ಕೂ ಮಹಾರಾಷ್ಟ್ರ ರಾಜ್ಯದ ಪುಣೆ ನಾಗಾಬ್ರಹ್ಮ ಕಲಾತಂಡದಿಂದ ವಿಶೇಷ ಕಲೆಗಳ ಪ್ರದರ್ಶನ ಹಾಗೂ ತಾಲೂಕಿನ ವಿವಿಧ ಭಾಗಗಳಿಂದ ಬಂದ ವಿವಿಧ ಕಲಾ ತಂಡಗಳು ಅವರನ್ನು ಹಿಂಬಾಲಿಸಿದವು. ಮಹಿಳೆಯರು ಹೊಂದಿದ 125 ಕಲಾವಿದರ ತಂಡದವರು ಡೋಲು ಬಾರಿಸುವ ಕುಣಿತ ಜನಮನ ಸೆಳೆಯಿತು. ಅವರ ಕುಣಿತ ನೋಡುಗರಿಗೆ ಮನರಂಜನೆ ನೀಡಿತು.

ಬೆಂಗಳೂರಿನ ಕಲಾ ತಂಡದವರ ನಗಾರಿ, ವೀರಗಾಸೆ, ಸ್ಥಳೀಯ ಕಲಾವಿದರಿಂದ ಲೇಜಿಮ್‌, ಕೋಲಾಟ ನಡೆದವು. ಪಟ್ಟಣದ ಲಾಡಿjಂಗ್‌ ಕ್ರಾಸ್‌ಯಿಂದ ಬೆಳಗ್ಗೆ 9:30ಕ್ಕೆ ಭವ್ಯ ಮೆರವಣಿಗೆ ಹೊರಟಿತು. ವೇದಿಕೆಗೆ ತಲುಪಿದಾಗ ಮಧ್ಯಾಹ್ನ 3:00 ದಾಟಿತು. ತಾಲೂಕಿನ ಬೇರೆ ಬೇರೆ ಗ್ರಾಮಗಳಿಂದ ಬಂದ ಸಾವಿರಾರು ಬೈಕ್‌ ಸವಾರರ ರ್ಯಾಲಿ ಮಾತ್ರ ನೋಡುಗರ ಗಮನ ಸೆಳೆಯಿತು. 

* ಎಂ.ಡಿ. ಮಶಾಖ