ಕರಾವಳಿ ಜಿಲ್ಲೆಗಳಲ್ಲಿ  ಖಾಸಗಿ ಸಾರಿಗೆ ರಾಷ್ಟ್ರೀಕರಣವಿಲ್ಲ: ರಾಮಲಿಂಗಾ

Team Udayavani, Mar 21, 2017, 12:28 PM IST

ಮಂಗಳೂರು: ಕರಾವಳಿ ಜಿಲ್ಲೆಗಳಲ್ಲಿ ಖಾಸಗಿ ಸಾರಿಗೆಯನ್ನು ರಾಷ್ಟ್ರೀಕರಣಗೊಳಿಸುವ ಉದ್ದೇಶ ಸರಕಾರಕ್ಕಿಲ್ಲ ಎಂದು ಸಾರಿಗೆ ಸಚಿವ ರಾಮಲಿಂಗಾ ರೆಡ್ಡಿ ಅವರು ಹೇಳಿದರು.

ವಿಧಾನ ಪರಿಷತ್‌ನಲ್ಲಿ ಸದಸ್ಯ ಐವನ್‌ ಡಿ’ಸೋಜಾ ಅವರ ಪ್ರಶ್ನೆಗೆ ಉತ್ತರಿಸಿದ ಸಚಿವರು, ಈಗಿರುವ ಎಲ್ಲ ಖಾಸಗಿ ಪ್ರವರ್ತಕರನ್ನು ಉಳಿಸಿಕೊಂಡು ಕರ್ನಾಟಕ ರಾಜ್ಯಾದ್ಯಂತ ಅನ್ವಯಿಸುವಂತೆ ಹೊಸ ಸಮಗ್ರ ಪ್ರದೇಶ ಯೋಜನೆಯ ಕರಡು ಅಧಿಸೂಚನೆಯನ್ನು ಹೊರಡಿಸಲಾಗಿದೆ. ಉದ್ದೇಶಿತ ಪ್ರದೇಶ ಯೋಜನೆಯನ್ನು ಮೋಟಾರು ವಾಹನಗಳ ಅಧಿನಿಯಮ 1988ರ 99 ಮತ್ತು 100ನೇ ಕಲಂ ಮೇರೆಗೆ ಅಗತ್ಯಪಡಿಸಲಾದಂತೆ ಪ್ರಕಟಿಸಲಾಗಿದೆ. ಈ ಸಮಗ್ರ ಪ್ರದೇಶ ಯೋಜನೆಯಿಂದ ಈಗ ಚಾಲ್ತಿಯಲ್ಲಿರುವ ಯಾವುದೇ ಖಾಸಗಿ ಪ್ರವರ್ತಕರಿಗೆ ಧಕ್ಕೆಯಾಗುವುದಿಲ್ಲ ಎಂದವರು ತಿಳಿಸಿದರು.

ಉದ್ದೇಶಿತ ಹೊಸ ಸಮಗ್ರ ಯೋಜನೆಗೆ ಸಂಬಂಧಿಸಿದಂತೆ ಕೆಲವು ಖಾಸಗಿ ಪ್ರವರ್ತಕರು ಹೈಕೋರ್ಟ್‌ನಲ್ಲಿ ರಿಟ್‌ ಮನವಿಯನ್ನು ದಾಖಲಿಸಿದ್ದು, ಮಧ್ಯಾಂತರ ತಡೆಯಾಜ್ಞೆ ನೀಡಿದ್ದು, ಈ ವಿಷಯವು ನ್ಯಾಯಾಲಯದಲ್ಲಿ ಬಾಕಿ ಇದೆ ಎಂದು ತಿಳಿಸಿದ ಅವರು, ಸಮಗ್ರ ಪ್ರದೇಶ ಯೋಜನೆಯಿಂದ ಈಗ ಚಾಲ್ತಿಯಲ್ಲಿರುವ ಲೀಗಲಿ ವಾಲಿಡ್‌ ಪರ್ಮಿಟ್‌ ಹೊಂದಿರುವ ಯಾವುದೇ ಖಾಸಗಿ ಪ್ರವರ್ತಕರಿಗೆ ಧಕ್ಕೆ ಆಗುವುದಿಲ್ಲ ಎಂದವರು ತಿಳಿಸಿದರು.