ನಿರೀಕ್ಷೆಯಲ್ಲೇ ಬಂದು ನಿರೀಕ್ಷೆಯಲ್ಲೇ ಸಾಗುವ ಅಂಬಾರಿ ಆಗದಿರಲಿ..

Team Udayavani, Mar 21, 2017, 3:08 PM IST

ಹುಬ್ಬಳ್ಳಿ: ವಿವಿಧ ಹೊಸ ಯೋಜನೆ, ಹಲವು ನಿರೀಕ್ಷೆಗಳನ್ನು ಹೊತ್ತು ತಂದಿರುವ ಮಹಾನಗರ ಪಾಲಿಕೆಯ ಆಯ-ವ್ಯಯ, ಸ್ವಯಂ ಆದಾಯ ವೃದ್ಧಿಗೆ ಗಮನಾರ್ಹ ಯತ್ನ ಕೈಗೊಳ್ಳದೆ, ಕೇಂದ್ರ-ರಾಜ್ಯ ಸರಕಾರಗಳ ಅನುದಾನದ ಅವಲಂಬನೆಯಲ್ಲೇ ಮುಂದುವರಿದಿದೆ. ಹಿಂದಿನಂತೆ ಕೇವಲ ನಿರೀಕ್ಷೆಗಳೊಂದಿಗೆ ಬಂದು ನಿರೀಕ್ಷೆಯಲ್ಲೇ ಸಾಗುವ ಅಂಬಾರಿ ಆಗದಿರಲಿ ಎಂಬುದು ಹಲವರ ಆಶಯ. 

ಪಾಲಿಕೆಯ 2017-18ನೇ ಸಾಲಿನ ಆಯ-ವ್ಯಯ ಹಿಂದಿನ ಬಜೆಟ್‌ ಗಳಿಗಿಂತ ಹೆಚ್ಚು ಗಮನ ಸೆಳೆದಿರುವುದು ಮುಂಗಡಪತ್ರದ ಗಾತ್ರ ಹೆಚ್ಚಳ,  ಜನಪ್ರಿಯ ಘೋಷಣೆಗಳಿಂದ ಅಲ್ಲ ಬದಲಾಗಿ ಅನುಷ್ಠಾನ ಯೋಗ್ಯ ಆಯ-ವ್ಯಯವಿದು ಎಂಬ ಘೋಷಣೆಯಿಂದ. 

ಪರಾವಲಂಬಿ ಸ್ಥಿತಿ: ಸ್ಥಳೀಯ ಸರಕಾರಗಳು ಸ್ವಯಂ ಆದಾಯ ಸೃಷ್ಟಿಗೆ ಒತ್ತು ನೀಡಬೇಕೆಂಬ ಒತ್ತಡದ ನಡುವೆಯೂ ಬಹುತೇಕ ಸ್ಥಳೀಯ ಸರಕಾರಗಳು ಸ್ವಯಂ ಆದಾಯ ಸೃಷ್ಟಿಯ ಸಾಹಸಕ್ಕೆ ಮುಂದಾಗಿಲ್ಲ. ಇದಕ್ಕೆ ಪೂರಕ ಎನ್ನುವಂತೆ ಸುಮಾರು 548 ಕೋಟಿ ರೂ. ಗಾತ್ರದ ಆಯ-ವ್ಯಯ ಮಂಡಿಸಿರುವ ಹು.ಧಾ.ಮಹಾನಗರ ಪಾಲಿಕೆಯ ಸ್ವಯಂ ಆದಾಯ ಕೇವಲ 129.76ಕೋಟಿ ರೂ.ಮಾತ್ರ. 

ಪಾಲಿಕೆ ಆದಾಯ ವೃದ್ಧಿಗೆ ಅವಕಾಶ ಇಲ್ಲವೆಂದಲ್ಲ. ಪ್ರಾಮಾಣಿಕ ಯತ್ನ, ಇಚ್ಛಾಶಕ್ತಿಯ ಕೊರತೆ ಬಹುದೊಡ್ಡ ಅಡ್ಡಿಯಾಗಿದೆ. ಪ್ರತಿ ಆಯ-ವ್ಯಯದಲ್ಲೂ ಸ್ವಯಂ ಆದಾಯ ವೃದ್ಧಿಯ ಪ್ರಸ್ತಾಪ, ಒತ್ತಾಯ, ಭರವಸೆ ಬಂದು ಮಾಯವಾಗಿ, ಮುಂದಿನ ಆಯ- ವ್ಯಯದಲ್ಲಿ ಗೋಚರಿಸುತ್ತವೆ. ಕರ ವಸೂಲಿಗೆ ಆಯಾ ವಿಭಾಗಗಳು, ಸಿಬ್ಬಂದಿ, ಅಧಿಕಾರಿಗಳು ಇದ್ದರೂ ಆಸ್ತಿ ಕರ, ನೀರಿನ ಕರ, ವಾಣಿಜ್ಯ ಶುಲ್ಕಗಳ ಬಾಕಿ ಮೊತ್ತ ಬೆಳೆಯುತ್ತಲೇ ಸಾಗುತ್ತಿದೆ. 

ನೀರಿನ ಕರ ಬಾಕಿ ಮತ್ತು ದಂಡ ಸರಿ ಸುಮಾರು 100 ಕೋಟಿ ರೂ.ಇದೆ. ಮುಖ್ಯವಾಗಿ ಪಾಲಿಕೆಗೆ ತನ್ನ ಆಸ್ತಿ ಎಷ್ಟು, ಅದರ ಮೌಲ್ಯವೇನು ಎಂಬುದರ ಸ್ಪಷ್ಟತೆ ಇಲ್ಲವಾಗಿದೆ. ಹಲವಾರು ದಶಕಗಳ ಹಿಂದೆ ಭೂ ಬಾಡಿಗೆ ರೂಪದಲ್ಲಿ ನೀಡಿದ ಆಸ್ತಿ ಇಂದು ಕೋಟ್ಯಂತರ ರೂ.ಮೌಲ್ಯ ಹೊಂದಿದೆ. ಭೂ ಬಾಡಿಗೆ ಪಡೆದವರಿಗೆ ಕಲ್ಯಾಣ ಮಂಟಪ, ಇನ್ನಿತರ ಕಟ್ಟಡಗಳ ರೂಪದಲ್ಲಿ ನಿರಂತರ ಆದಾಯ ಒದಗಿಸುವ ಕಾಮಧೇನು ಆಗಿದ್ದರೆ, ಭೂಮಿಯ ಮಾಲಿಕ ಪಾಲಿಕೆಗೆ ಬರಡು ಹಸುವಾಗಿ ಗೋಚರಿಸುತ್ತಿವೆ.

ಅನೇಕ ಸದಸ್ಯರು, ಅಧಿಕಾರಿಗಳು ಭೂ ಬಾಡಿಗೆ ಆಸ್ತಿ ಮಾರಾಟಕ್ಕೆ ನೋಡುತ್ತಿದ್ದಾರೆಯೇ ವಿನಃ ಹಿರಿಯರು ಗಳಿಸಿಟ್ಟ ಆಸ್ತಿ ಉಳಿಸಿಕೊಂಡು, ಬರಬೇಕಾದ ವರಮಾನ ವಸೂಲಿಗೆ ಪ್ರಾಮಾಣಿಕ ಯತ್ನ ನಡೆಯುತ್ತಿಲ್ಲ. ಪಾಲಿಕೆ ಒಡೆತನದಲ್ಲಿ ಸುಮಾರು 2600ಕ್ಕೂ ಮಿಕ್ಕ ಆಸ್ತಿಗಳು ಇವೆ. ಒಂದು ರೀತಿಯಲ್ಲಿ “ಎಪ್ಪತ್ತು ಎಕರೆ ಭೂಮಿ ಇದ್ದರೂ ಒಪ್ಪತ್ತು ಊಟಕ್ಕೆ ಗತಿ ಇಲ್ಲ’ ಎಂಬ ಸ್ಥಿತಿಯಲ್ಲಿ ಪಾಲಿಕೆಯದ್ದಾಗಿದೆ. 

ಅದೇ ರೀತಿ ಜಾಹೀರಾತು ಮೂಲದಿಂದ ಏನಿಲ್ಲವೆಂದರೂ ಪಾಲಿಕೆಗೆ ಕನಿಷ್ಠ3ರಿಂದ 5ಕೋಟಿ ರೂ. ಆದಾಯ  ಬರಬಹುದಾಗಿದೆ. ಆದರೆ ಅಧಿಕಾರಿಗಳು ಮಾತ್ರ ಈಗಲೂ ಇನ್ನು 2ಕೋಟಿ ರೂ. ಆಚೆ-ಈಚೆ ಉಳಿದಿದ್ದಾರೆ. ದಿನ ಬೆಳಗಾದರೆ ಜಾಹೀರಾತುಗಳು ಮಹಾನಗರ ತುಂಬೆಲ್ಲ ಹರಡುತ್ತವೆಯಾದರೂ, ಪಾಲಿಕೆಗೆ ಮಾತ್ರ ಆದಾಯ ಬರುತ್ತಿಲ್ಲವಾಗಿದೆ. 

* ಅಮರೇಗೌಡ ಗೋನವಾರ