ಗ್ಯಾಸ್‌ ಸ್ಟೋವ್‌ ಸ್ಫೋಟದಲ್ಲಿ ಮಗು ರಕ್ಷಿಸಿ ತಾನೇ ಬಲಿಯಾದ ತಾಯಿ

Team Udayavani, Mar 22, 2017, 12:49 PM IST

ಬೆಂಗಳೂರು: ಗ್ಯಾಸ್‌ ಸ್ಟೋವ್‌ ನ್ಪೋಟ ಗೊಂಡು ತೀವ್ರವಾಗಿ ಗಾಯಗೊಂಡಿದ್ದ ತಮಿಳುನಾಡು ಮೂಲದ  ಮಹಿಳೆ ಸರಿತಾ (25)ಚಿಕಿತ್ಸೆ ಫ‌ಲಕಾರಿಯಾಗದೆ ಮಂಗಳವಾರ ವಿಕ್ಟೋರಿಯಾ ಆಸ್ಪತ್ರೆಯಲ್ಲಿ ಮೃತಪಟ್ಟಿದ್ದಾರೆ. 

ಕಳೆದ ಸೋಮವಾರ ರಾತ್ರಿ ಮನೆಯಲ್ಲಿ ಮಗುವಿಗೆ ಹಾಲು ಕಾಯಿಸಲು ಹೋದಾಗ ಈ ಘಟನೆ ನಡೆದಿದೆ. ಈ ವೇಳೆ ಮಗುವನ್ನು ರಕ್ಷಿಸಿರುವ ಸರಿತಾ ತಾನು ಮಾತ್ರ ಬೆಂಕಿಯ ಕೆನ್ನಾಲಿಗೆಗೆ ಸಿಲುಕಿ  ಶೇ.70ರಷ್ಟು ಸುಟ್ಟುಹೋಗಿದ್ದಾರೆ. ಸರಿತಾ ಅವರಿಗೆ ಅಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ.

ಮಗು ರಕ್ಷಿಸಿದ ತಾಯಿ: ಸೋಮವಾರ ರಾತ್ರಿ 8 ಗಂಟೆ ಸುಮಾರಿಗೆ ಮಗುವಿಗೆ ಹಾಲು ಕಾಯಿಸಲು ಅಡುಗೆ ಕೊಣೆಗೆ ಹೋದ ಸರಿತಾ, ಸ್ಟೋವ್‌ ಹಚ್ಚುತ್ತಿದ್ದಂತೆ ಬೆಂಕಿ ಹೊತ್ತಿಕೊಂಡಿದೆ. ಇದೇ ವೇಳೆ ಮನೆಯ ಹೊರಾಂಗಣದಲ್ಲಿ ತಮ್ಮ ತಾಯಿ ಜತೆ ಮಗು ಆಟವಾಡುತ್ತಿದ್ದುದ್ದನ್ನು ಮನಗಂಡ ಅವರು, ಮಗುವಿಗೆ ಯಾವುದೇ ಆಪಾಯವಾಗಬಾರದೆಂದು ಅಡುಗೆ ಕೋಣೆಯ ಬಾಗಿಲು ಹಾಕಿಕೊಂಡಿದ್ದಾರೆ. ಹಾಗಾಗಿ ಮಗುವಿಗೆ ಯಾವುದೇ ತೊಂದರೆಯಾಗಿಲ್ಲ. ತನ್ಮೂಲಕ ತಾಯಿ ಸರಿತಾ “ಮಾತೃ ಪ್ರೇಮ’ ಮೆರೆದಿದ್ದಾರೆ. 

ಬೆಂಕಿಯ ಕಾವು ಹೆಚ್ಚಾದಂತೆ ಕೊಠಡಿಯೊಳಗೆ ಸರಿತಾ ಜೋರಾಗಿ ಕೂಗಿಕೊಂಡಿದ್ದಾರೆ. ಕೂಡಲೇ ಅವರ ತಾಯಿ ಹಾಗೂ ಸ್ಥಳೀಯರು ಬಂದು ಕೊಠಡಿಯ ಬಾಗಿಲು ತೆರೆದು ತಕ್ಷಣ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಿದರೂ ಬದುಕುಳಿಯಲಿಲ್ಲ ಎಂದು ಬ್ಯಾಟರಾಯನ ಪುರ ಠಾಣೆ ಪೊಲೀಸರು ತಿಳಿಸಿದ್ದಾರೆ.

ಆಕಸ್ಮಿಕವೋ ಆತ್ಮಹತ್ಯೆಯೋ?
ತಮಿಳುನಾಡು ಮೂಲದ ಸರಿತಾ 2 ವರ್ಷಗಳ ಹಿಂದೆ ಚಪ್ಪಲಿ ಅಂಗಡಿ ನಡೆಸುವ ವೆಂಕಟೇಶ್‌ನನ್ನು ವಿವಾಹವಾಗಿ ದ್ದರು. ಪತಿ ಹಾಗೂ ಈತನ ಸಂಬಂಧಿ ಕರು ನಿತ್ಯ ಸರಿತಾಗೆ ಕಿರುಕುಳ ನೀಡುತ್ತಿ ದ್ದರು. ಇದರಿಂದ ಬೇಸತ್ತ ಸರಿತಾ ಸೀಮೆಎಣ್ಣೆ ಸುರಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎಂದು ಸರಿತಾ ಸಂಬಂಧಿಕರು ಆರೋಪಿಸಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.