ತುಮಕೂರು: 1 ಗಂಡು ಮಗುವಿಗಾಗಿ 9 ಹೆಣ್ಣು ಹೆತ್ತ ಮಹಾತಾಯಿ! 

Team Udayavani, Mar 25, 2017, 12:30 PM IST

ತುಮಕೂರು: ಇದೆಂಥಾ ಮೌಢ್ಯ ಎಂದು ಎಲ್ಲರೂ ಪ್ರಶ್ನಿಸುವುದು ಸಹಜ. ಸೂಕ್ತ ಶಿಕ್ಷಣದ ಕೊರತೆಯಿಂದ ಮಹಿಳೆಯೊಬ್ಬಳು ಗಂಡು ಮಗು ಪಡೆಯಲೇಬೇಕೆಂಬ ಹಠದಲ್ಲಿ  9 ಹೆಣ್ಣು ಮಕ್ಕಳನ್ನು ಹೆತ್ತಿದ್ದಾಳೆ. 

ಮಧುಗಿರಿಯು ಕುರಿಕೇನಹಳ್ಳಿಯ  ಭಾಗ್ಯಮ್ಮ (39)ಮತ್ತು ರಾಮಕೃಷ್ಣ(45) ದಂಪತಿಗೆ ನೀವು ಗಂಡು ಮಗು ಪಡೆಯಲೇ ಬೇಕು. ಆಗ ಮಾತ್ರ ನಿಮಗೆ ಮೋಕ್ಷ. ಸಂಕಷ್ಟ ದೂರಾಗಿ ಸಕಲ ಸೌಭಾಗ್ಯ ದೊರೆಯಲು ಸಾಧ್ಯ  ಎಂದು  ಜ್ಯೋತಿಷಿಯೊಬ್ಬ ಸಲಹೆ ನೀಡಿದ್ದನಂತೆ. ಅದರಂತೆ ಮೌಢ್ಯಕ್ಕೆ ಗಂಟು ಬಿದ್ದು ಸಾಲು ಸಾಲಾಗಿ 9 ಹೆಣ್ಣು ಮಕ್ಕಳನ್ನು ಹೆತ್ತು ಅಂತಿಮವಾಗಿ ಗಂಡು ಮಗು ಪಡೆದು ಸಂಭ್ರಮಿಸಿದ್ದಾಳೆ. 

ಭಾಗ್ಯಮ್ಮ ಶುಕ್ರವಾರ 10 ನೇ ಮಗುವಾಗಿ ಗಂಡು ಮಗುವಿಗೆ ಜನ್ಮವಿತ್ತಿದ್ದಾಳೆ. 15 ವರ್ಷದ ಹಿಂದೆ ರಾಮಕೃಷ್ಣ  ಜೊತೆ ವಿವಾಹ ಬಂಧನಕ್ಕೊಳಗಾಗಿದ್ದಳು. ಮೊದಲ ಮಗಳಿಗೆ 14 ವರ್ಷ ಪ್ರಾಯ. 

ಒಂದೆಡೆ ಗಂಡು ಮಗು ಪಡೆದ ಸಂತಸ, ಇನ್ನೊಂದೆಡೆ ಬಡತನದಲ್ಲಿ ಹತ್ತು ಮಕ್ಕಳನ್ನು ಸಾಕಿ ಸಲಹುವ 
 ಚಿಂತೆ ದಂಪತಿಗಳನ್ನು ತೀವ್ರವಾಗಿ ಕಾಡುತ್ತಿದೆ.