ಹುಡುಗಿಯ ಹಿಂದೆ ಸುತ್ತಾಡದಂತೆ ಬುದ್ಧಿ ಹೇಳಿದಕ್ಕೆ ಹಲ್ಲೆ:ಆರೋಪಿಗೆ ಸಜೆ

Team Udayavani, Mar 25, 2017, 12:44 PM IST

ಮಂಗಳೂರು: ತನ್ನ ಸಂಬಂಧಿ ಯುವತಿಯ ಹಿಂದೆ ಹೋಗ ಬೇಡ ಎಂದು ಬುದ್ಧಿವಾದ ಹೇಳಿದ ಸ್ನೇಹಿತನಿಗೆ ಹೀನಾಯವಾಗಿ ಬೈದು ಹಲ್ಲೆ ಮಾಡಿ ಗಂಭೀರ ಸ್ವರೂಪದ ಗಾಯಗೊಳಿಸಿದ ಪ್ರಕರಣವೊಂದರಲ್ಲಿ  ಆರೋಪಿಗೆ 3 ವರ್ಷ ಕಠಿನ ಶಿಕ್ಷೆ ಮತ್ತು 13,000 ರೂ. ದಂಡ ವಿಧಿಸಿ ಮಂಗಳೂರಿನ 1 ನೇ ಹೆಚ್ಚುವರಿ ಜಿಲ್ಲಾ  ಮತ್ತು ಸೆಷನ್ಸ್‌ ನ್ಯಾಯಾಲಯವು ತೀರ್ಪು ನೀಡಿದೆ.  ದೇಲಂತಬೆಟ್ಟು ಗ್ರಾಮದ ಶಿಬರೂರು ರಾಜೀವ ನಗರದ ಮೋಹನ (24) ಶಿಕ್ಷೆಗೊಳಗಾದ ಆರೋಪಿ. ಅದೇ ಊರಿನ ಸುಜಿತ್‌ (26) ಈ ಪ್ರಕರಣದ ದೂರುದಾರರು. 4 ವರ್ಷಗಳ ಹಿಂದೆ ಹಲ್ಲೆ ಸಂಭವಿಸಿತ್ತು. 
 
ಸುರತ್ಕಲ್‌ ಪೊಲೀಸರು ಪ್ರಕರಣ ದಾಖಲಿಸಿದ್ದು, ಆರೋಪ ಪಟ್ಟಿಯನ್ನು ನ್ಯಾಯಾಲಯಕ್ಕೆ ಸಲ್ಲಿಸಿದ್ದರು. ಮಂಗಳೂರಿನ 1 ನೇ ಹೆಚ್ಚುವರಿ ಜಿಲ್ಲಾ  ಮತ್ತು ಸೆಷನ್ಸ್‌ ನ್ಯಾಯಾಲಯದ ನ್ಯಾಯಾಧೀಶ ಸಿ. ಎಂ. ಜೋಶಿ ಆರೋಪ ಸಾಬೀತಾಗಿದೆ ಎಂಬ ತೀರ್ಮಾನಕ್ಕೆ ಆರೋಪಿಗೆ ಶಿಕ್ಷೆ ವಿಧಿಸಿದ್ದಾರೆ.  ದಂಡ ಮೊತ್ತದಲ್ಲಿ 10,000 ರೂ. ಗಳನ್ನು ಗಾಯಾಳು ಸುಜಿತ್‌ ಅವರಿಗೆ ನೀಡುವಂತೆ ಆದೇಶಿಸಿದ್ದಾರೆ. ಅಲ್ಲದೆ ಸರಕಾರದಿಂದಲೂ ಸೂಕ್ತ ಪರಿಹಾರ ದೊರಕಿಸಿ ಕೊಡುವಂತೆ ಕಾನೂನು ಸೇವಾ ಪ್ರಾಧಿಕಾರಕ್ಕೆ ನಿರ್ದೇಶ ನೀಡಿದ್ದಾರೆ.  ಮೋಹನ 2013 ಮೇ 3 ರಿಂದ ಜೂನ್‌ 6 ತನಕ (35 ದಿನ) ನ್ಯಾಯಾಂಗ ಬಂಧನದಲ್ಲಿದ್ದು, ಈ ಅವಧಿಯನ್ನು  ಶಿಕ್ಷೆಯ ಪ್ರಮಾಣದಿಂದ ಕಡಿತ ಮಾಡುವಂತೆ ನ್ಯಾಯಾಲಯ ಸೂಚಿಸಿದೆ.  ಪಬ್ಲಿಕ್‌ ಪ್ರಾಸಿಕ್ಯೂಟರ್‌ ರಾಜು ಪೂಜಾರಿ ಬನ್ನಾಡಿ ಅವರು ಸರಕಾರದ ಪÃ ವಾದ ಮಂಡಿಸಿದ್ದರು.