ಜಿಎಸ್ಟಿ ಪೂರಕ ಮಸೂದೆ ಮಂಡನೆ

Team Udayavani, Mar 28, 2017, 11:29 AM IST

ಹೊಸದಿಲ್ಲಿ: ಬಹುನಿರೀಕ್ಷಿತ ಸರಕು ಮತ್ತು ಸೇವೆಗಳ ತೆರಿಗೆ (ಜಿಎಸ್‌ಟಿ) ನೀತಿ ಜಾರಿಗೆ ಕೇಂದ್ರ ಸರಕಾರ ಹಾಕಿಕೊಂಡಿರುವ ಜುಲೈ 1ರ ಗಡುವು ಸಮೀಪಿಸುತ್ತಿರುವ ನಡುವೆಯೇ ವಿತ್ತ ಸಚಿವ ಅರುಣ್‌ ಜೇಟ್ಲಿ, ಜಿಎಸ್‌ಟಿಗೆ ಸಂಬಂಧಿಸಿದ ನಾಲ್ಕು ಮಸೂದೆಗಳನ್ನು ಲೋಕಸಭೆಯಲ್ಲಿ ಸೋಮವಾರ ಮಂಡಿಸಿದ್ದಾರೆ. ಮಾ.29ರಿಂದ ಈ ಬಗ್ಗೆ ಚರ್ಚೆ ಆರಂಭವಾಗಲಿದೆ. ಆದರೆ ದಿನದ ಕಾರ್ಯಕಲಾಪದಲ್ಲಿ ಈ ವಿಷಯ ಸೇರ್ಪಡೆಯಾಗಿರಲಿಲ್ಲ ಎಂಬ ವಿಷಯ ಮುಂದಿಟ್ಟುಕೊಂಡು ಪ್ರತಿಪಕ್ಷಗಳು ಪ್ರತಿಭಟನೆ ನಡೆಸಿವೆ. ಜಿಎಸ್‌ಟಿ ಮಸೂದೆ ಮಂಡಿಸುವ ಆಡಳಿತ ಪಕ್ಷದ ನಿರ್ಧಾರವನ್ನು ಸಮರ್ಥಿಸಿಕೊಂಡ ಸಂಸದೀಯ ವ್ಯವಹಾರಗಳ ಸಹಾಯಕ ಸಚಿವ ಎಸ್‌.ಎಸ್‌.ಅಹ್ಲುವಾಲಿಯಾ, “ಈ ಮಾಹಿತಿಯನ್ನು ಹಿಂದಿನ ರಾತ್ರಿಯೇ ವೆಬ್‌ಸೈಟ್‌ನಲ್ಲಿ ಹಾಕಲಾಗಿತ್ತು,” ಎಂದಾಗ, “ಸರಕಾರದ ವೆಬ್‌ಸೈಟ್‌ನಲ್ಲಿ ಮಾಹಿತಿಗಳು ಮಧ್ಯರಾತ್ರಿ ಅಪ್‌ಲೋಟ್‌ ಆಗುತ್ತವೆ ಎಂಬ ನಿರೀಕ್ಷೆ ಇರಲಿಲ್ಲ,” ಎಂದು ಕೆಳಮನೆಯ ಪ್ರತಿಕ್ಷಗಳ ಸದಸ್ಯರು ವ್ಯಂಗ್ಯವಾಡಿದರು.

ಕೇಂದ್ರ ಹಾಗೂ ರಾಜ್ಯ ಸರಕಾರಗಳು ಸೆಪ್ಟೆಂಬರ್‌ 15ರ ನಂತರ ಪರೋಕ್ಷ ತೆರಿಗೆ ಸಂಗ್ರಹಿಸುವ ಅಧಿಕಾರ ಕಳೆದುಕೊಳ್ಳುವ ಕಾರಣ, ಪ್ರಸಕ್ತ ಅಧಿವೇಶನದಲ್ಲೇ ಜಿಎಸ್‌ಟಿ ಮಸೂದೆಗೆ ಲೋಕಸಭೆಯ ಒಪ್ಪಿಗೆ ಪಡೆಯಬೇಕಿದೆ ಎಂಬ ಅಂಶವನ್ನು ಸಚಿವ ಜೇಟ್ಲಿ ಸದಸ್ಯರ ಗಮನಕ್ಕೆ ತಂದರು. ಸರಕು ಮತ್ತು ಸೇವೆಗಳ ತೆರಿಗೆಗೆ ಸಂಬಂಧಿಸಿದ ‘ಕೇಂದ್ರ ಜಿಎಸ್‌ಟಿ ಮಸೂದೆ’, ‘ಸಮಗ್ರ ಜಿಎಸ್‌ಟಿ’, “ಕೇಂದ್ರಾಡಳಿತ ಪ್ರದೇಶಗಳ ಜಿಎಸ್‌ಟಿ’ ಮತ್ತು ‘ಪರಿಹಾರ ಕಾನೂನು ಮಸೂದೆ’ಗಳನ್ನು ಸಚಿವ ಜೇಟ್ಲಿ ಲೋಕಸಭೆಯಲ್ಲಿ ಮಂಡಿಸಿದರು.

ಗರಿಷ್ಠ ತೆರಿಗೆ ಶೇ.40!
ಜಿಎಸ್‌ಟಿ ಅನ್ವಯ ಗರಿಷ್ಠ ಶೇ.40ರಷ್ಟು ತೆರಿಗೆ ದರ ನಿಗದಿಯಾಗಿರುವುದನ್ನು ಸೋಮವಾರ ಮಂಡನೆಯಾದ ಜಿಎಸ್‌ಟಿ ಮಸೂದೆಯಲ್ಲಿ ಪ್ರಸ್ತಾಪಿಸಲಾಗಿದೆ. ಆದರೆ ಆರ್ಥಿಕ ತುರ್ತು ಪರಿಸ್ಥಿತಿ ಸಂದರ್ಭದಲ್ಲಿ ಮಾತ್ರ ಇಷ್ಟು ಪ್ರಮಾಣದ ತೆರಿಗೆ ವಿಧಿಸಬಹುದು ಎಂಬ ಉಲ್ಲೇಖವಿದೆ. ಇದರೊಂದಿಗೆ ಸರಕು ಮತ್ತು ಸೇವೆಗಳಿಗೆ ಅನುಗುಣವಾಗಿ ಸೇ.5, ಶೇ.12, ಶೇ,18 ಮತ್ತು ಗರಿಷ್ಠ ಶೇ.28ರಷ್ಟು ತೆರಿಗೆ ವಿಧಿಸಲು ಜಿಎಸ್‌ಟಿ ಸಮಿತಿ ಸಮ್ಮತಿಸಿದೆ. ಹಾಗೇ ಕೇಂದ್ರಾಡಳಿತ ಪ್ರದೇಶಗಳಲ್ಲಿನ ಪರಿಸ್ಥಿತಿಗಳಿಗೆ ಅನುಗುಣವಾಗಿ ತೆರಿಗೆ ದರ ಬದಲಾಗಲಿದೆ.