ನೇರ, ದಿಟ್ಟ , ಖಲಂದರ! ಕಲರ್‌ಫ‌ುಲ್‌ ಹುಡುಗನ ಮಸ್ತ್ ಸಿನಿಮಾ

Team Udayavani, Mar 31, 2017, 10:47 AM IST

ರವಿಚಂದ್ರನ್‌ ಅಭಿನಯದ “ದೃಶ್ಯಂ’ ಚಿತ್ರದಲ್ಲಿ ಮಗಳ ಪಾತ್ರಧಾರಿಯಾಗಿದ್ದ ಸ್ವರೂಪಿಣಿ ನಾಯಕಿಯಾಗುತ್ತಿದ್ದಾರೆ ಅಂತ ಈ ಹಿಂದೆ
ಹೇಳಲಾಗಿತ್ತು. ಅದಾಗಲೇ ಸ್ವರೂಪಿಣಿ ನಾಯಕಿಯಾದ ಚಿತ್ರವೊಂದು ಸದ್ದಿಲ್ಲದೆಯೇ ಪೂರ್ಣಗೊಂಡು, ಇದೀಗ ಬಿಡುಗಡೆ ಹಂತಕ್ಕೆ
ಬಂದಿದೆ. ಹೌದು, ಇದೇ ಮೊದಲ ಬಾರಿಗೆ ನಿರ್ದೇಶಕರಾಗಿರುವ ರಾಜ್‌ಕುಮಾರ್‌ ಆದಿತ್ಯ, “ಮಸ್ತ್ ಖಲಂದರ್‌’ ಚಿತ್ರ ಮಾಡಿ ಈಗ ಬಿಡುಗಡೆಗೆ ಅಣಿಯಾಗಿದ್ದಾರೆ. ಈ ಚಿತ್ರಕ್ಕೆ ನಿತಿನ್‌ ಹೀರೋ. ಈ ಹಿಂದೆ “ಹೊಸ ಪ್ರೇಮ ಪುರಾಣ’ ಚಿತ್ರ ಮಾಡಿದ್ದ ನಿತಿನ್‌, ನಾಲ್ಕು ವರ್ಷ ಸುದ್ದಿಯೇ ಇರಲಿಲ್ಲ. ಈಗ “ಮಸ್ತ್ ಖಲಂದರ್‌’ ಮೂಲಕ ಸೆಕೆಂಡ್‌ ಇನ್ನಿಂಗ್ಸ್‌ ಶುರುಮಾಡಿದ್ದಾರೆ.

ಈ ಚಿತ್ರದ ಶೀರ್ಷಿಕೆಗೆ “ನಮ್‌ ಕತೆ ನಿಮ್‌ ಜೊತೆ’ ಎಂಬ ಅಡಿಬರಹವಿದೆ. ಚಿತ್ರದ ನಾಯಕ ಸದಾ ಬಿಂದಾಸ್‌ ಆಗಿರಬೇಕೆಂದುಕೊಳ್ಳುವ ವ್ಯಕ್ತಿತ್ವ ಕಲರ್‌ ಫ‌ುಲ್‌ ಲೈಫ‌ನ್ನು ಎಂಜಾಯ್‌ ಮಾಡೋದೇ ಅವನ ಗುರಿ. ನಿಜಾಂಶವನ್ನು ನೇರವಾಗಿ ಹೇಳುವ ಹುಡುಗ. ತನ್ನ ಬದುಕಿನಲ್ಲಾಗುವ ಎಲ್ಲವನ್ನೂ ಮನರಂಜನೆ ಮೂಲಕವೇ ಹೇಳುತ್ತ ಹೋಗುತ್ತಾನೆ. ಒಟ್ಟಾರೆ, ಈಗಿನ ಹುಡುಗ, ಹುಡುಗಿಯರ ಜೀವನ ಶೈಲಿ ಬಗ್ಗೆ ಜನರು ಹೇಗೆಲ್ಲಾ ಆಡಿಕೊಳ್ಳುತ್ತಾರೆ ಎಂಬುದನ್ನು ಇಲ್ಲಿ ಹೇಳಲಾಗಿದೆ ಎನ್ನುತ್ತಾರೆ ನಿರ್ದೇಶಕರು.

ಚಿತ್ರವನ್ನು ಬೆಂಗಳೂರು ಹಾಗೂ ಗೋವಾ ಸುತ್ತಮುತ್ತ ಚಿತ್ರೀಕರಿಸಲಾಗಿದೆ. ಮಧುಗಿರಿಯಲ್ಲಿ ಸುಮಾರು 6 ಸಾವಿರ ಜನರನ್ನು ಸೇರಿಸಿ ಕ್ಲೈಮ್ಯಾಕ್ಸ್‌ ದೃಶ್ಯವನ್ನು ಚಿತ್ರೀಕರಿಸಲಾಗಿದೆ. ಈ ಸಿನಿಮಾ ಮೂಲಕ ನಿತಿನ್‌ ಗೆ ನಿರ್ಮಾಪಕರು “ಸ್ಟೈಲಿಶ್‌ ಸ್ಟಾರ್‌’ ಎಂಬ ಬಿರುದು ಕೊಟ್ಟಿದ್ದಾರೆ. ಅದಕ್ಕೆ ಕಾರಣ, ತೆರೆಯ ಮೇಲೆ ಸಾಕಷ್ಟು ಸ್ಟೈಲ್‌ ಮಾಡಿದ್ದರಿಂದ ಆ ಬಿರುದು ಕೊಡಲಾಗಿದೆ ಎಂಬುದು ನಿರ್ಮಾಪಕ ಎಸ್‌.ಎಲ್‌.ಚಂದ್ರು ಮಾತು. ಅಂದಹಾಗೆ, ಚಂದ್ರು ಗೀತೆರಚನೆಕಾರರಾಗಿದ್ದವರು. ಈ ಚಿತ್ರದಲ್ಲಿ ನಿರ್ಮಾಪಕರೂ ಆಗಿದ್ದಾರೆ. ನಿರ್ಮಾಣದ ಜತೆಗೆ ಹಾಡುಗಳನ್ನೂ ಬರೆದಿದ್ದಾರೆ. ಎಸ್‌.ಪ್ರೇಮ್‌ಕುಮಾರ್‌ ಆರು ಹಾಡುಗಳಿಗೆ ರಾಗ ಸಂಯೋಜನೆ ಮಾಡಿದ್ದಾರೆ.

ಇನ್ನು, ಇಲ್ಲಿ ನಾಯಕಿ ತಾಯಿಯಾಗಿ ಸ್ವಾತಿ ನಟಿಸಿದ್ದಾರೆ. ಸುಮಾರು 12 ವರ್ಷಗಳ ಬಳಿಕ ಒಪ್ಪಿಕೊಂಡ ಸಿನಿಮಾ ಇದಾಗಿದ್ದರಿಂದ ಅವರಿಗೆ ಒಳ್ಳೆಯ ಪಾತ್ರವೇ ಸಿಕ್ಕಿದೆಯಂತೆ. ನಿರ್ಮಾಣದಲ್ಲಿ ಲಿಯಾ.ಕೆ.ಜಿ.ಸ್ವಾಮಿ ಸಾಥ್‌ ನೀಡಿದ್ದಾರೆ. ಚಿತ್ರಕ್ಕೆ ಬಿಡುಗಡೆ ತಯಾರಿ
ನಡೆಯುತ್ತಿದ್ದು, ಮೇ ತಿಂಗಳಲ್ಲಿ ಪ್ರೇಕ್ಷಕರ ಎದುರು ಬರುವ ಸಾಧ್ಯತೆ ಇದೆ.