ದ್ವಿಚಕ್ರ ವಾಹನಗಳಿಗೆ ಭಾರೀ ಡಿಸ್ಕೌಂಟ್‌; ಭರ್ಜರಿ ಮಾರಾಟ

Team Udayavani, Apr 1, 2017, 2:26 PM IST

ಮಹಾನಗರ:  ಬಿಎಸ್‌ -3  (ಭಾರತ್‌ ಸ್ಟೇಜ್‌) ಮಾದರಿಯ ಪರಿಸರ ಮಾಲಿನ್ಯ  ನಿಯಮಾವಳಿ ಪೂರೈಸುವ ವಾಹನಗಳ ಮಾರಾಟ ಹಾಗೂ ನೋಂದಣಿ ಎ.1ರಿಂದ ಜಾರಿಗೆ ಬರುವಂತೆ ಸ್ಥಗಿತಗೊಳ್ಳುವುದರಿಂದ  ಮಾ. 31ರಂದು ಜಿಲ್ಲೆಯಲ್ಲಿ  ದ್ವಿಚಕ್ರ ವಾಹನಗಳ ಭರ್ಜರಿ ಮಾರಾಟ ನಡೆಯಿತು.  

ಭಾರೀ ರಿಯಾಯತಿಯನ್ನು  ದ್ವಿಚಕ್ರ  ಕಂಪೆನಿಗಳು  ಘೋಷಿಸಿದ ಪರಿಣಾಮ ಬಿಎಸ್‌- 3 ಮಾದರಿಯ ಸ್ಕೂಟರ್‌ ಹಾಗೂ ಮೋಟಾರ್‌ ಬೈಕ್‌ಗಳ ದಾಸ್ತಾನು  ಬಹುತೇಕ  ಖಾಲಿಯಾಗಿವೆ. 

ಬಿಎಸ್‌- 3 ವಾಹನಗಳ ಮಾರಾಟ ಹಾಗೂ ನೋಂದಣಿಯನ್ನು ಎ.1 ರಿಂದ ಜಾರಿಗೆ ಬರುವಂತೆ ನಿಷೇಧಿಸಿ ಮಾ. 30ರಂದು ತೀರ್ಪು ನೀಡಿದೆ. ಮಾ. 31ವರೆಗೆ ಮಾತ್ರ  ಈ ಮಾದರಿಯ ವಾಹನಗಳ ಮಾರಾಟ ಹಾಗೂ ನೋಂದಣಿಗೆ ಅವಕಾಶವಿರುವ ಹಿನ್ನೆಲೆಯಲ್ಲಿ ದ್ವಿಚಕ್ರ ವಾಹನಗಳ ಮೇಲೆ ಕಂಪೆನಿಗಳು ಭರ್ಜರಿ ಡಿಸ್ಕೌಂಟ್‌ ಘೋಷಿಸಿದ್ದವು. ದ್ವಿಚಕ್ರ ವಾಹನಗಳಿಗೆ 7 ಸಾವಿರದಿಂದ 22,000 ರೂ. ವರೆಗೆ ರಿಯಾಯತಿ ಅಫರ್‌ ನೀಡಲಾಗುತ್ತಿತ್ತು.  

ಹೋಂಡಾ ಮೋಟಾರ್‌ ಸೈಕಲ್‌ ಆ್ಯಂಡ್‌ ಸ್ಕೂಟರ್‌ ಇಂಡಿಯಾ ಬಿಎಸ್‌-3 ಮಾದರಿಯ  ನವಿ, ಡ್ರೀಮ್‌ ಯುಗ, ಸಿಬಿ ಶೈನ್‌, ಸಿಡಿಆರ್‌ 25 ಡಿಆರ್‌ ಬೈಕ್‌ಗಳ ಮೇಲೆ ಸುಮಾರು 22,000 ರೂ. ವರೆಗೆ ಡಿಸ್ಕೌಂಟ್‌ ಘೋಷಿಸಿದ್ದು, ಮಂಗಳೂರು ಶೋರೂಂಗಳಲ್ಲಿ ಬಹುತೇಕ ಗಾಡಿಗಳು ಮಾರಾಟವಾಗಿವೆ.

ಹೀರೋ ಕಂಪೆನಿಯು  ಡ್ನೂಯೆಟ್‌, ದ ಬೋಲೋ  ನ್ಯೂ ಮ್ಯಾಸ್ಟ್ರೋ ಸ್ಕೂಟರ್‌, ಸೂಪರ್‌  ಸ್ಪೆಡರ್‌,  ಗ್ಲಾಮರ್‌ ಮೋಟಾರ್‌ ಬೈಕ್‌ ಮೇಲೆ 12,500 ರೂ. ಕಡಿತ ಹಾಗೂ ಉಚಿತ ವಿಮೆ ಆಫರ್‌ ಘೋಷಿಸಿತ್ತು.  ಮಂಗಳೂರಿನಲ್ಲಿ  ಈ ವಾಹನಗಳ ದಾಸ್ತಾನು ಪೂರ್ಣ ಖಾಲಿಯಾಗಿವೆ ಎಂದು ಮೂಲಗಳು ತಿಳಿಸಿವೆ.  

ಟಿವಿಎಸ್‌ ಕಂಪೆನಿ ತನ್ನ ಸ್ಕೂಟರ್‌ ಹಾಗೂ ಬೈಕ್‌ಗಳು ಮೇಲೆ ಭರ್ಜರಿ ಡಿಸ್ಕೌಂಟ್‌ ನೀಡಿತ್ತು. 7 ಸಾವಿರದಿಂದ 15,000 ರೂ. ವರೆಗೆ ಡಿಸ್ಕೌಂಟ್‌ ಇತ್ತು.

ಯಮಹಾದಿಂದಲೂ ಸುಮಾರು 10,000 ರೂ. ವರೆಗೆ ರಿಯಾಯಿತಿ ಇದ್ದ ಕಾರಣ ಬಿಎಸ್‌- 3 ಮಾದರಿಯ ಮೋಟರ್‌ ಬೈಕ್‌ಗಳು ಸಂಪೂರ್ಣ ಮಾರಾಟವಾಗಿವೆ.

ಮಾಲಿನ್ಯ ನಿಯಂತ್ರಣ ತಂತ್ರಜ್ಞಾನ
ಪ್ರಸ್ತುತ ಕಾರುಗಳು ಬಿಎಸ್‌- 4 ಕಾರುಗಳೇ ನೋಂದಣಿಯಾಗುತ್ತಿವೆ. ಆದುದರಿಂದ  ಕಾರುಗಳಿಗೆ ಸಮಸ್ಯೆ ಇರುವುದಿಲ್ಲ. ದ್ವಿಚಕ್ರ ವಾಹನಗಳಿಗೆ ಮಾತ್ರ ಸಮಸ್ಯೆ ಇದೆ. ಭಾರತ್‌ ಸ್ಟೇಜ್‌  ( ಬಿಎಸ್‌) 3 ಗಿಂತ ಹಾಗೂ 4ರಲ್ಲಿ  ವಾಯುಮಾಲಿನ್ಯ ಪ್ರಮಾಣದಲ್ಲಿ ಅಂತರ ಕಡಿಮೆ ಇರುತ್ತದೆ.  ಈ ಪೂರಕವಾಗಿ ಬಿಎಸ್‌ 4ರಲ್ಲಿ  ಮಾಲಿನ್ಯ ಹೊರಸೂಸುವಿಕೆಯಲ್ಲಿ ಸುಧಾರಿತ ತಂತ್ರಜ್ಞಾನಗಳನ್ನು ಬಳಸಲಾಗಿದೆ. ಬಿಎಸ್‌3ಯಲ್ಲಿ  ಕಾರ್ಬನ್‌ ಮೋನೊಕ್ಸೆ„ಡ್‌ 2.30 ಗ್ರಾಂ/ ಕಿ.ಮೀ., ಎಚ್‌ಸಿ 0.10 ಗ್ರಾಂ/ ಕಿ.ಮೀ., ಹಾಗೂ ಎನ್‌ಒ ಎಕ್ಸ್‌ 0.15 ಗ್ರಾಂ/ಕಿ.ಮೀ. ಇರುತ್ತದೆ. ಬಿಎಸ್‌4 ರಲ್ಲಿ ಕಾರ್ಬನ್‌ ಮೋನೋಕ್ಸೆ„ಡ್‌ 1.00 ಗ್ರಾಂ/ಕಿ.ಮೀ., ಎಚ್‌ಸಿ 0.10 ಗ್ರಾಂ/ಕಿ.ಮೀ., ಎನ್‌ಒಎಕ್ಸ್‌ 0.08 ಗ್ರಾಂ/ಕಿ.ಮೀ. ಇರುತ್ತದೆ. 

ಮಾರುಕಟ್ಟೆಯಲ್ಲಿರುವುದು ಬಿಎಸ್‌- 4 ದರ್ಜೆಯ ಇಂಧನ
ಪ್ರಸ್ತುತ ಮಾರುಕಟ್ಟೆಯಲ್ಲಿರುವುದು ಬಿಎಸ್‌- 4 ದರ್ಜೆಯ ಇಂಧನ. ರಾಜ್ಯದಲ್ಲಿ ಎಲ್ಲ  ತೈಲ ಕಂಪೆನಿಗಳು ಬಿಎಸ್‌4 ದರ್ಜೆಯ ಇಂಧನವನ್ನು ಸರಬರಾಜು ಮಾಡುತ್ತಿವೆ. ಆದರೆ ಹೆಚ್ಚಿನ ವಾಹನಗಳು ಇನ್ನೂ ಕೂಡ ಬಿಎಸ್‌-4 ದರ್ಜೆಗೆ ಏರಿಲ್ಲ. ಉನ್ನತ ಗ್ರೇಡ್‌ನ‌ ಇಂಧನ ಬಳಸಿದರೂ ತಾಂತ್ರಿಕತೆ ಬಿಎಸ್‌ 3 ಇದ್ದರೆ  ಬಿಎಸ್‌- 4ನ ಫಲಿತಾಂಶ ನಿರೀಕ್ಷಿಸಲು ಸಾಧ್ಯವಿಲ್ಲ .