ವಾಲ್ಮೀಕಿ ಬಗ್ಗೆ ಅವಹೇಳನಕಾರಿ ಹೇಳಿಕೆ: ರಾಖೀ ಸಾವಂತ್‌ ಅರೆಸ್ಟ್‌

Team Udayavani, Apr 4, 2017, 5:16 PM IST

ಮುಂಬಯಿ : ಬಾಲಿವುಡ್‌ನ‌ ವಿವಾದಿತ ನಟಿ ರಾಖೀ ಸಾವಂತ್‌ ಳನ್ನು ಪಂಜಾಬ್‌ ಪೊಲೀಸರು ಮುಂಬಯಿಯಲ್ಲಿ ಬಂಧಿಸಿರುವುದಾಗಿ ಎಎನ್‌ಐ ತಿಳಿಸಿದೆ.

ಪುರಾಣ ಪ್ರಸಿದ್ಧ ಮಹರ್ಷಿ ವಾಲ್ಮೀಕಿ ಕುರಿತಾಗಿ ರಾಖೀ ಸಾವಂತ್‌ ಈ ಹಿಂದೆ ಅವಹೇಳನಕಾರಿ ಹೇಳಿಕೆ ನೀಡಿದ್ದು ಆ ಬಗ್ಗೆ  ಆಕೆಯ ವಿರುದ್ಧ  ಕೇಸು ದಾಖಲಾಗಿತ್ತು. ಈ ಸಂಬಂಧ ರಾಖೀ ಸಾವಂತ್‌ ಮಾರ್ಚ್‌ 9ರಂದು  ಕೋರ್ಟಿಗೆ ಹಾಜರಾಗಬೇಕಿತ್ತು. ಆದರೆ ಆಕೆ ಹಾಜರಾಗದ ಕಾರಣ ನ್ಯಾಯಾಲಯ ಆಕೆಯ ವಿರುದ್ಧ ಅರೆಸ್ಟ್‌ ವಾರಂಟ್‌ ಜಾರಿ ಮಾಡಿತ್ತು. 

ಅಂತೆಯೇ ಅರೆಸ್ಟ್‌ ವಾರಂಟ್‌ ಹೊಂದಿದ್ದ ಪಂಜಾಬ್‌ ಪೊಲೀಸರು ಮುಂಬಯಿಯಲ್ಲಿ ಆಕೆಯನ್ನು ಇಂದು ಬಂಧಿಸಿದರು.

ರಾಮಾಯಣ ಗ್ರಂಥಕರ್ತ ವಾಲ್ಮೀಕಿ ಮಹರ್ಷಿ ಕುರಿತಾಗಿ ಟಿವಿ ಶೋ ಒಂದರಲ್ಲಿ  ಅವಹೇಳನಕಾರಿ ಹೇಳಿಕೆ ನೀಡುವ ಮೂಲಕ ರಾಖೀ ಸಾವಂತ್‌, ವಾಲ್ಮೀಕಿ ಸಮುದಾಯದವರ ಧಾರ್ಮಿಕ ಭಾವನೆಗಳನ್ನು ನೋಯಿಸಿದ್ದಾರೆ ಎಂದು ದೂರುದಾರರು ಕೇಸ್‌ ಮಾಡಿದ್ದರು. 

ಈಗಿನ್ನು ಈ ಕೇಸಿನ ವಿಚಾರಣೆ ಎಪ್ರಿಲ್‌ 10ರಂದು ನಡೆಯಲಿದೆ ಎಂದು ತಿಳಿದುಬಂದಿದೆ.