ವಾಡಿ ಪುರಸಭೆ: ಪ್ರಿಯಾಂಕ್‌-ವಾಲ್ಮೀಕಿಗೆ ಅಗ್ನಿ ಪರೀಕ್ಷೆ

Team Udayavani, Apr 6, 2017, 3:30 PM IST

ವಾಡಿ: ಕಳೆದ ಒಂದು ವಾರದಿಂದ ರಂಗೇರಿದ್ದ ಸ್ಥಳೀಯ ಪುರಸಭೆ ಚುನಾವಣೆ ಬಹಿರಂಗ ಪ್ರಚಾರಕ್ಕೆ ಬುಧವಾರ ಸಂಜೆ ತೆರೆಬಿದ್ದಿದ್ದು, ಏ.7ರಂದು ಬೆಳಗ್ಗೆ 7:00 ರಿಂದ ಮತದಾನ ಪ್ರಕ್ರಿಯೆ ಆರಂಭಗೊಳ್ಳಲಿದೆ. ಕಾಂಗ್ರೆಸ್‌ ಹಾಗೂ ಬಿಜೆಪಿ ಅಭ್ಯರ್ಥಿಗಳ ಅಬ್ಬರದ ಪ್ರಚಾರದ ಮಧ್ಯೆ ಪಕ್ಷೇತರ ಅಭ್ಯರ್ಥಿಗಳು ತೀವ್ರ ಪೈಪೋಟಿ ನೀಡುವ ಮೂಲಕ ರಾಷ್ಟ್ರೀಯ ಪಕ್ಷಗಳ ನಿದ್ದೆಗೆಡಿಸಿದ್ದಾರೆ. 

ಪಟ್ಟಣದಲ್ಲಿ ಅಸ್ತಿತ್ವವನ್ನೇ ಕಳೆದುಕೊಂಡಿರುವ ಜೆಡಿಎಸ್‌, ಒಂದೆರಡು ವಾರ್ಡ್‌ಗಳಲ್ಲಿ ಸ್ಪರ್ಧಿìಸಿ ಪೈಪೋಟಿಯಿಂದ ದೂರ ಉಳಿದಿದೆ. ಪುರಸಭೆ ವ್ಯಾಪ್ತಿಯ ಒಟ್ಟು 23 ವಾರ್ಡ್‌ಗಳಲ್ಲಿ ಕಾಂಗ್ರೆಸ್‌-ಬಿಜೆಪಿ ಮಧ್ಯೆ ನೇರ ಹಣಾಹಣಿ ಏರ್ಪಟ್ಟಿದ್ದು, ಗದ್ದುಗೆ ಗುದ್ದಾಟ ಸವಾಲಿನ ಸೆಣೆಸಾಟಕ್ಕೆ ಕಾರಣವಾಗಿದೆ.

ವಾಡಿ ಪುರಸಭೆ ಚುನಾವಣೆ ಪ್ರಚಾರದ ಸಂಘರ್ಷ ಸ್ಪರ್ಧಿಸಿದ ಅಭ್ಯರ್ಥಿಗಳ ಮಧ್ಯೆ ಏರ್ಪಡದೆ, ಮಾಜಿ ಶಾಸಕ ಬಿಜೆಪಿಯ ವಾಲ್ಮೀಕಿ ನಾಯಕ ಹಾಗೂ ಕ್ಷೇತ್ರದ ಶಾಸಕ ಸಚಿವ ಪ್ರಿಯಾಂಕ್‌ ಖರ್ಗೆ ಅವರ ಪಾಲಿಗೆ ಅಗ್ನಿ ಪರೀಕ್ಷೆಯಾಗಿದೆ. ಟಿಕೆಟ್‌ ಹಂಚಿಕೆಯಿಂದ ಬಂಡಾಯದ ಬಿಸಿ ಅನುಭವಿಸಿರುವ ಎರಡೂ ಪಕ್ಷಗಳಿಗೆ ಪಕ್ಷೇತರರೆ ಕಾಡುತ್ತಿದ್ದಾರೆ.

ತಮ್ಮ ಅಭ್ಯರ್ಥಿಗಳ ಗೆಲುವಿಗಾಗಿ ರಣಬಿಸಿಲು ಲೆಕ್ಕಿಸದೆ ಪಾದಯಾತ್ರೆ ಕೈಗೊಂಡು ಗಲ್ಲಿ ಗಲ್ಲಿ ಸುತ್ತುತ್ತಿರುವ ವಾಲ್ಮೀಕಿ ನಾಯಕ ಹಾಗೂ ಪ್ರಿಯಾಂಕ್‌ ಖರ್ಗೆ ಅವರಿಗೆ ಬಹುಮತದ್ದೇ ಚಿಂತೆಯಾಗಿದೆ. ತಾಪಂ ಚುನಾವಣೆಯಲ್ಲಿ ತುಸು ಚೇತರಿಸಿಕೊಂಡ ತಾಲೂಕು ಬಿಜೆಪಿ ಘಟಕ, ಜಿಪಂ ಚುನಾವಣೆಯಲ್ಲಿ ಕೇವಲ ಒಂದು ಸ್ಥಾನ ಗೆಲ್ಲುವ ಮೂಲಕ ಸಂಪೂರ್ಣ ಮುಗ್ಗರಿಸಿತ್ತು. 

ಎರಡೂ ಚುನಾ ವಣೆ ಗಳಲ್ಲಿ ಕಹಿ ಅನುಭ ವಿಸಿರು ವ ಮಾಜಿ ಶಾಸಕ ವಾಲ್ಮೀ ಕಿಗೆ ವಾಡಿ ಪುರಸಭೆ ಗದ್ದುಗೆ ಮಹತ್ವದ ಮೈಲಿ ಗಲ್ಲಾಗಲಿದೆ. ಪಕ್ಷದ ಪ್ರತಿಷ್ಠೆ ಉಳಿಸಿಕೊಳ್ಳಲು ಕಳೆದ ಹತ್ತಾರು ದಿನಗಳಿಂದ ನಗರದಲ್ಲಿಯೇ ಠಿಕಾಣಿ ಹೂಡಿರುವ ಬಿಜೆಪಿ ಜಿಲ್ಲಾಧ್ಯಕ್ಷ ದೊಡ್ಡಪ್ಪಗೌಡ ಪಾಟೀಲ, ಮಹಿಳಾ ಮೋರ್ಚಾ ಜಿಲ್ಲಾಧ್ಯಕ್ಷೆ ದಿವ್ಯಾ ಹಾಗರಗಿ, ಶಶಿಕಲಾ ಟೆಂಗಳಿ, ವಿಧಾನಪರಿಷತ್‌ ಸದಸ್ಯ ಅಮರನಾಥ ಪಾಟೀಲ ಬಿರುಸಿನ ಮತಪ್ರಚಾರ ನಡೆಸಿದ್ದಾರೆ.

ವಿಧಾನಪರಿಷತ್‌ ಸದಸ್ಯ ಬಿ.ಜಿ.ಪಾಟೀಲ ಕೆಲ ವಾರ್ಡ್‌ಗಳಲ್ಲಿ ಪಾದಯಾತ್ರೆ ನಡೆಸಿ ಕಾರ್ಯಕರ್ತರಲ್ಲಿ ಹುಮ್ಮಸ್ಸು ತುಂಬಿದ್ದಾರೆ. ಕಾಂಗ್ರೆಸ್‌ ಅಭ್ಯರ್ಥಿಗಳ ವಿರುದ್ಧ ಕಾಂಗ್ರೆಸ್‌ ಕಾರ್ಯಕರ್ತರೆ ಬಂಡೆದ್ದು ಪಕ್ಷೇತರರಾಗಿ ಸ್ಪರ್ಧಿಸಿರುವುದು ಕೈ ಪಕ್ಷದ ಮುಖಂಡರಿಗೆ ನುಂಗಲಾರದ ತುತ್ತಾಗಿದೆ.

ಕೆಲ ವಾರ್ಡ್‌ಗಳಲ್ಲಿನ ಅತೃಪ್ತರ ಬಿಸಿ ತಣ್ಣಗಾಗಿಸುವಲ್ಲಿ ಯಶಸ್ವಿಯಾಗಿರುವ ಕಾಂಗ್ರೆಸ್‌, ತುಸು ತೃಪ್ತಿಪಟ್ಟುಕೊಂಡಿದೆ. ಬಿಜೆಪಿ-ಕಾಂಗ್ರೆಸ್‌ ಮಧ್ಯೆ ಪೈಪೋಟಿ  ನಡೆಯುವ ಬದಲು, ಹಲವು ವಾರ್ಡ್‌ಗಳಲ್ಲಿ ಬಿಜೆಪಿಗೆ ಬಿಜೆಪಿ, ಕಾಂಗ್ರೆಸ್‌ಗೆ ಕಾಂಗ್ರೆಸ್‌ ಎದುರಾಳಿಯಾಗಿರುವುದು ಸ್ಪಷ್ಟವಾಗಿದೆ. ಬಹುಮತ ಕೈಯಿಗೋ, ಕಮಲಕ್ಕೋ ಅಥವಾ ಅತಂತ್ರದ ಬಿಕ್ಕಟ್ಟೋ ಎನ್ನುವುದು ಮಾತ್ರ ಏ.9 ರಂದು ತಿಳಿಸುಬರಲಿದೆ.

* ಮಡಿವಾಳಪ್ಪ ಹೇರೂರ