ವಿಷ ಕುಡಿದು ಅಪ್ಪ, ಮಗು ಆತ್ಮಹತ್ಯೆ

Team Udayavani, Apr 14, 2017, 11:48 AM IST

ಬೆಂಗಳೂರು: ಸಾಲಬಾಧೆ, ಕೌಟುಂಬಿಕ ಕಲಹದ ಹಿನ್ನೆಲೆಯಲ್ಲಿ ಗುರುವಾರ ಯಲಹಂಕ ಸಮೀಪದ ಅಲ್ಲಾಳಸಂದ್ರದಲ್ಲಿ ದಂಪತಿ ಮಗುವಿಗೆ ವಿಷವುಣಿಸಿ ಆತ್ಮಹತ್ಯೆಗೆ ಪ್ರಯತ್ನಿಸಿದ್ದು, ಘಟನೆಯಲ್ಲಿ ತಂದೆ ಹಾಗೂ ಮಗು ಮೃತಪಟ್ಟಿದ್ದಾರೆ. 

ಮಿಥುನ್‌ಕುಮಾರ್‌ (45), ಪುತ್ರ ಗಗನ್‌(3) ಮೃತಪಟ್ಟಿದ್ದು, ಗಂಭೀರ ಸ್ಥಿತಿಯಲ್ಲಿರುವ ಮಿಥುನ್‌ಕುಮಾರ್‌ ಪತ್ನಿ ರೋಜಾ ಯಲಹಂಕ ಉಪನಗರದ ಖಾಸಗಿ ಆಸ್ಪತ್ರೆಯೊಂದರಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ದಂಪತಿ ಜ್ಯೂಸ್‌ನಲ್ಲಿ ವಿಷ ಬೆರೆಸಿ ಮಗುವಿಗೂ ಕುಡಿಸಿ ಬಳಿಕ ತಾವೂ ಸೇವಿಸಿದ್ದಾರೆ ಎಂದು ವೈದ್ಯಕೀಯ ಪರೀಕ್ಷೆಯಲ್ಲಿ ದೃಢಪಟ್ಟಿದೆ. ಆತ್ಮಹತ್ಯೆಗೆ ನಿಖರ ಕಾರಣ ತಿಳಿದು ಬಂದಿಲ್ಲ.ದಂಪತಿಯ ಆತ್ಮಹತ್ಯೆ ನಿರ್ಧಾರಕ್ಕೆ ಸಾಲಭಾಧೆ ಅಥವಾ ಕೌಟುಂಬಿಕ ಕಲಹ ಕಾರಣವಿರಬಹುದು ಎಂದು ಶಂಕೆಯಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

 ಮೂಲತಃ ತುಮಕೂರು ಜಿಲ್ಲೆ ಶಿರಾ ತಾಲ್ಲೂಕಿನ ಪಟ್ಟನಾಯಕನಹಳ್ಳಿಯವರಾದ ದಂಪತಿ 10ತಿಂಗಳ ಹಿಂದೆ ಅಲ್ಲಾಳಸಂದ್ರದ ನಾರಾಯಣಪ್ಪ ಬಡಾವಣೆಯಲ್ಲಿ ಬಾಡಿಗೆ ಮನೆ ಮನೆ ಪಡೆದು ವಾಸವಾಗಿದ್ದರು. ಮಿಥುನ್‌ಕುಮಾರ್‌, ಹಣ್ಣು , ತರಕಾರಿ,ವ್ಯಾಪಾರ ಮಾಡಿಕೊಂಡಿದ್ದರು. ಪತ್ನಿ ರೋಜಾ ಮನೆಯಲ್ಲಿಯೇ ಇರುತ್ತಿದ್ದರು. ಕಳೆದ ಮೂರು ದಿನಗಳ ಹಿಂದೆ  ರೋಜಾ ಅವರ ತಂದೆ-ತಾಯಿ, ಮನೆಗೆ ಬಂದು ಹೋಗಿದ್ದರು.

ಇತ್ತ  ಗುರುವಾರ ಬೆಳಗ್ಗೆ  11ಗಂಟೆ  ಸುಮಾರಿಗೆ ದಂಪತಿ ಜ್ಯೂಸ್‌ನಲ್ಲಿ ವಿಷಬೆರೆಸಿ ಮಗುವಿಗೆ ಕುಡಿಸಿದ ಬಳಿಕ ತಾವೂ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿದ್ದಾರೆ. ಇದಾದ ಸುಮಾರು ಹೊತ್ತಿನ ಬಳಿಕ ಸ್ನೇಹಿತರು ಮಿಥುನ್‌ ಅವರನ್ನು ಹುಡುಕಿಕೊಂಡು ಮನೆಯ ಹತ್ತಿರಹೋದಾಗ ಘಟನೆ ಬೆಳಕಿಗೆ ಬಂದಿದೆ. ಮೂವರನ್ನು ಆಸ್ಪತ್ರೆಗೆ ಕರೆದೊಯ್ದಾಗ ಮಿಥುನ್‌ಕುಮಾರ್‌ ಹಾಗೂ ಗಗನ್‌ ಮೃತಪಟ್ಟಿರುವುದನ್ನು ವೈದ್ಯರು ದೃಢಪಡಿಸಿದ್ದಾರೆ ಎಂದು ಪೊಲೀಸರು ತಿಳಿಸಿದರು.