ಮಣಿಪಾಲ “ಆರೋಗ್ಯ ಕಾರ್ಡ್‌’ ಜತೆಗೆ “ದಂತ ಕಾರ್ಡ್‌ ಉಚಿತ’

Team Udayavani, Apr 20, 2017, 3:47 PM IST

ಉಡುಪಿ: ಸಾಮಾನ್ಯ ಜನರಿಗೂ ಕೈಗೆಟಕುವ ದರದಲ್ಲಿ ವೈದ್ಯಕೀಯ ಚಿಕಿತ್ಸೆ ಸಿಗುವಂತಾಗಬೇಕು ಎನ್ನುವ ಸಾಮಾಜಿಕ ಕಳಕಳಿಯ ಉದ್ದೇಶ ಇರಿಸಿಕೊಂಡು ಮಣಿಪಾಲ ಆರೋಗ್ಯ ಕಾರ್ಡ್‌ ಸದಸ್ಯತ್ವ ಪಡೆದವರಿಗೆ ಆರೋಗ್ಯ ಕಾರ್ಡಿನ ಜತೆಗೆ ಪ್ರಸಕ್ತ ಸಾಲಿನಿಂದ ಉಚಿತವಾಗಿ ದಂತ ಆರೋಗ್ಯ ಕಾರ್ಡುಗಳನ್ನು ಕೂಡ ವಿತರಿಸಲಾಗುತ್ತದೆ. ಈ ಮೂಲಕ ಒಂದು ಕಾರ್ಡಿನ ದರದಲ್ಲಿ 2 ಕಾರ್ಡಿನ ಉಪಯೋಗ ಪಡೆದುಕೊಳ್ಳಬಹುದು ಎಂದು ಮಣಿಪಾಲ ವಿಶ್ವವಿದ್ಯಾನಿಲಯದ ಸಹಕುಲಾಪತಿ ಡಾ| ಎಚ್‌.ಎಸ್‌. ಬಲ್ಲಾಳ್‌ ಹೇಳಿದರು.

ಮಣಿಪಾಲ ಆರೋಗ್ಯ ಕಾರ್ಡ್‌-2017 ಯೋಜನೆಗೆ ಮಣಿಪಾಲದ ಡಾ| ಟಿ.ಎಂ.ಎ. ಪೈ ಸಭಾಂಗಣದಲ್ಲಿ ಬುಧವಾರ ಚಾಲನೆ ನೀಡಿ ಅಲೆವೂರಿನ ಬಾಲಕೃಷ್ಣ ಮತ್ತು ಅವರ ಕುಟುಂಬಿಕರಿಗೆ ಪ್ರಥಮ ಆರೋಗ್ಯ ಕಾರ್ಡ್‌ ವಿತರಿಸಿ ಅವರು ಮಾತನಾಡಿದರು. ಆರೋಗ್ಯ ಕಾರ್ಡಿನ ಸೇವೆಗೆ 17 ವರ್ಷ ತುಂಬಿದೆ. ಈ ವರ್ಷದ ಸದಸ್ಯತ್ವ ಅಭಿಯಾನ ಜು. 29ರಂದು ಕೊನೆಗೊಳ್ಳಲಿದೆ. 2017ರ ಮೇ 28ರ ಒಳಗೆ ಕಾರ್ಡ್‌ ಮಾಡಿಸಿದವರಿಗೆ 14 ತಿಂಗಳ ಕಾಲಾವಧಿ ಅಂದರೆ 2017ರ ಜೂ. 1ರಿಂದ 2018ರ ಜು. 31ರ ವರೆಗೆ ಅದರ ಉಪಯೋಗ ಲಭ್ಯವಾಗುತ್ತದೆ. ಕಳೆದ ವರ್ಷ 1.65 ಲಕ್ಷ ಮಂದಿ ಆರೋಗ್ಯ ಕಾರ್ಡಿನ ಸದಸ್ಯರಾಗಿದ್ದರು. 2017ರ ಸಾಲಿನಲ್ಲಿ 2 ಲಕ್ಷದ ಗುರಿಯನ್ನು ಹೊಂದಲಾಗಿದೆ. ಆರೋಗ್ಯ ಕಾರ್ಡಿನ ಸೇವೆಗೆ ವಾರ್ಷಿಕ ರಿಯಾಯಿತಿಗೆ 4 ಕೋ.ರೂ. ವ್ಯಯ ಮಾಡಲಾಗುತ್ತಿದೆ. ಈ ಕಾರ್ಡಿನ ಸೇವೆಯು ಕರಾವಳಿ ಕರ್ನಾಟಕದಲ್ಲಿರುವ ಮಣಿಪಾಲ ಸಮೂಹದ ಎಲ್ಲ ಆಸ್ಪತ್ರೆಗಳಲ್ಲಿ ಲಭಿಸಲಿದೆ ಎಂದರು.

ಡೆಂಟಲ್‌ ಕಾಲೇಜಿನ ಮುಖ್ಯಸ್ಥೆ ನಿರ್ಮಲಾ ಎನ್‌. ರಾವ್‌ ಉಪಸ್ಥಿತರಿದ್ದರು. ವೈದ್ಯಕೀಯ ಅಧೀಕ್ಷಕ ಮತ್ತು ಸಿಇಒ ಡಾ| ಕ| ಎಂ. ದಯಾನಂದ ಸ್ವಾಗತಿಸಿದರು. ಡಾ| ಆನಂದ್‌ ವೇಣುಗೋಪಾಲ್‌ ವಂದಿಸಿದರು.