ಅವಕಾಶ ಹೊತ್ತು ತಂದ “ಅರ್ಬನ್‌ ಫೆಲೋ’

Team Udayavani, Apr 25, 2017, 3:45 AM IST

ಅರ್ಬನ್‌ ಫೆಲೋ ಕಾರ್ಯಕ್ರಮಕ್ಕೆ ಯಾವುದೇ ರೀತಿಯ ಶುಲ್ಕವನ್ನೂ ಪಾವತಿಸುವ ಹಾಗಿಲ್ಲ. ಒಂಭತ್ತು ತಿಂಗಳ ತರಬೇತಿ ಹಾಗು ವಸತಿ ಎಲ್ಲವೂ ಉಚಿತ. ಅರ್ಜಿ ಸಲ್ಲಿಸಲು ಮೇ 1, 2017 ಕಡೆಯ ದಿನಾಂಕವಾಗಿದ್ದು, ಆಗಸ್ಟ್‌, 2017ರಿಂದ ಕಾರ್ಯಕ್ರಮ ಶುರುವಾಗಲಿದೆ. ನಗರಾಭಿವೃದ್ಧಿ ಕ್ಷೇತ್ರದಲ್ಲಿ ತಮ್ಮ ಭವಿಷ್ಯ ರೂಪಿಸಿಕೊಳ್ಳಲು ಬಯಸುವ ವಿದ್ಯಾರ್ಥಿಗಳಿಗೆ ಇದೊಂದು ಸುವರ್ಣಾವಕಾಶ…

ನಗರೀಕರಣ ಪ್ರಕ್ರಿಯೆ ಭಾರತದಲ್ಲಿ ಅತಿ ವೇಗವಾಗಿ ಸಾಗುತ್ತಿದೆ. 90ರ ದಶಕದಲ್ಲಿನ ಭಾರತ ಸರ್ಕಾರದ ಉದಾರೀಕರಣ ಮತ್ತು ಖಾಸಗೀಕರಣ ನೀತಿಗಳ ನಂತರದಲ್ಲಿ ನಗರ ಪ್ರದೇಶಗಳು ಗಣನೀಯವಾಗಿ ವಿಸ್ತಾರಗೊಂಡಿವೆ. ಗ್ರಾಮೀಣ ಪ್ರದೇಶಗಳಲ್ಲಿ ಕ್ಷೀಣಿಸುತ್ತಿರುವ ಆರ್ಥಿಕ ವ್ಯವಸ್ಥೆ, ಮುಖ್ಯವಾಗಿ ಕೃಷಿ ಕ್ಷೇತ್ರ ಮತ್ತು ಗ್ರಾಮೀಣ ಭಾಗದಲ್ಲಿ ಕಡಿಮೆಯಾಗುತ್ತಿರುವ ಉದ್ಯೋಗ ಅವಕಾಶಗಳು, ಇವೆರಡೂ ಹೆಚ್ಚು ಹೆಚ್ಚು ಸಂಖ್ಯೆಯಲ್ಲಿ ಜನರನ್ನು ನಗರ ಪ್ರದೇಶಗಳಿಗೆ ವಲಸೆ ಹೋಗುವಂತೆ ಮಾಡಿವೆ. ನಗರೀಕರಣ ಒಂದು ಕಡೆ ಆರ್ಥಿಕ ಬೆಳವಣಿಗೆ ಮತ್ತು ಉದ್ಯೋಗ ಸೃಷ್ಟಿಯಲ್ಲಿ ಸಹಾಯ ಮಾಡುತ್ತದೆ. ನಗರಗಳು ಬೆಳೆದಂತೆ ಆರ್ಥಿಕ ಚಟುವಟಿಕೆಗಳು ಹೆಚ್ಚಾಗುತ್ತವೆ. ಇದರಿಂದ ಉದ್ಯಮಗಳು ಬೆಳೆಯುತ್ತವೆ. ಜೊತೆಗೆ ಉದ್ಯೋಗ ಅವಕಾಶಗಳೂ ಹೆಚ್ಚಾಗುತ್ತವೆ. ಆದರೆ, ನಗರೀಕರಣ ಪ್ರಕ್ರಿಯೆ, ಅವಕಾಶಗಳ ಜೊತೆಗೆ ಸಮಸ್ಯೆಗಳನ್ನೂ ತರುತ್ತದೆ. ಸಾಮಾಜಿಕ ಮತ್ತು ಆರ್ಥಿಕ ವ್ಯವಸ್ಥೆಯಲ್ಲಿ ಅಸಮಾನತೆ, ಪರಿಸರ ಮಾಲಿನ್ಯ, ಬಡತನ ಸಮಸ್ಯೆ ಇತ್ಯಾದಿ ನಗರೀಕರಣದ ದುಷ್ಪರಿಣಾಮಗಳು.

ಈ ಸಮಸ್ಯೆಗಳನ್ನು ನಿವಾರಣೆ ಮಾಡಿ, ಅವಕಾಶಗಳನ್ನು ಸಮರ್ಥವಾಗಿ ಬಳಸಿಕೊಳ್ಳುವುದು ಸದ್ಯ ನಮ್ಮ ಮುಂದಿರುವ ದೊಡ್ಡ ಸವಾಲು. ಇದಕ್ಕಾಗಿ ಸರ್ಕಾರ, ಖಾಸಗಿ ಸಂಸ್ಥೆಗಳು, ಸರ್ಕಾರೇತರ ಸಂಸ್ಥೆಗಳು, ನಾಗರಿಕ ಕಲ್ಯಾಣ ಸಂಸ್ಥೆಗಳು ಹಾಗೂ ನಗರಾಭಿವೃದ್ಧಿಯಲ್ಲಿ ಗಣನೀಯ ಸೇವೆಯನ್ನು ಸಲ್ಲಿಸಿರುವ ಇನ್ನಿತರೆ ಸಂಸ್ಥೆಗಳ ಸಂಘಟಿತ ಪ್ರಯತ್ನ ಬಹಳ ಮುಖ್ಯ. ಕಳೆದ ಒಂದು ದಶಕದಲ್ಲಿ ಸರ್ಕಾರ ನಗರಾಭಿವೃದ್ಧಿಗೆ ಸಂಬಂಧಿಸಿದಂತೆ ಹಲವು ಕಾರ್ಯಕ್ರಮಗಳನ್ನು ಜಾರಿಗೊಳಿಸಿದೆ. ಇತ್ತೀಚಿನ ಸ್ಮಾರ್ಟ್‌ ಸಿಟಿ (SMART CITY),ಅಮೃತ್‌ (AMRUT),ಹೃದಯ್‌ (HRIDAY) ಅಂಥ ಕಾರ್ಯಕ್ರಮಗಳು ಹೆಚ್ಚು ಗಮನವನ್ನು ಸೆಳೆದಿವೆ. ನಗರೀಕರಣದ ಸಮಸ್ಯೆ ಬಗೆಹರಿಸಲು ಮತ್ತು ಸೂಕ್ತ ಯೋಜನೆಗಳನ್ನು ರಚಿಸಿ, ಸಮರ್ಥವಾಗಿ ಅನುಷ್ಠಾನಗೊಳಿಸಲು ನುರಿತ, ಅನುಭವಿ ಯುವಕರ/ವ್ಯಕ್ತಿಗಳ ಅವಶ್ಯಕತೆ ಬಹಳ ಇದೆ. ಆದರೆ, ಇಂಥ ಯುವಕರ ಸಂಖ್ಯೆ ದೇಶದಲ್ಲಿ ವಿರಳವಾಗಿದೆ. ಈ ಸಮಸ್ಯೆಯನ್ನು ನಿವಾರಿಸಲೆಂದೇ ಅರ್ಬನ್‌ ಫೆಲೋ (urban fellows) ಎಂಬ ನೂತನ ಕಾರ್ಯಕ್ರಮವನ್ನು ಇಂಡಿಯನ್‌ ಇನ್ಸ್‌ಟಿಟ್ಯೂಟ್‌ ಆಫ್ ಹ್ಯೂಮನ್‌ ಸೆಟಲ್‌ಮೆಂಟ್ಸ್‌ ಸಂಸ್ಥೆಯು (Indian Institute of Human Settlements) ಹಮ್ಮಿಕೊಂಡಿದೆ.

ಕಾರ್ಯಕ್ರಮದ ರೂಪುರೇಷೆ
“ಅರ್ಬನ್‌ ಫೆಲೋ’ ಕಾರ್ಯಕ್ರಮವು ಒಂಭತ್ತು ತಿಂಗಳ ಅವಧಿಯದಾಗಿದ್ದು, 30 ವರ್ಷದೊಳಗಿನ, ಪದವಿ ಪೂರ್ತಿಗೊಳಿಸಿರುವ ಅಭ್ಯರ್ಥಿಗಳು ಈ ಕಾರ್ಯಕ್ರಮಕ್ಕೆ ಅರ್ಜಿ ಸಲ್ಲಿಸಬಹುದು. ಡಿಗ್ರಿಯನ್ನು ಹೊರತುಪಡಿಸಿ ಪಡೆದ ತರಬೇತಿ ಹಾಗು ಸರ್ಟಿಫಿಕೇಷನ್‌ ಕೋರ್ಸ್‌ಗಳನ್ನು ಪೂರ್ಣಗೊಳಿಸಿದ್ದರೂ ಪರಿಗಣಿಸಲಾಗುವುದು. ನಗರಾಭಿವೃದ್ಧಿಯಲ್ಲಿ ವಿಶೇಷ ಅನುಭವವನ್ನು ಹೊಂದಿದ ಅಭ್ಯರ್ಥಿಗಳು ಪದವಿ ಪೂರ್ತಿಯಾಗಿಲ್ಲದಿದ್ದರೂ ಅರ್ಜಿಗಳನ್ನು ಸಲ್ಲಿಸಬಹುದು.

ಆಯ್ಕೆಯಾದ ಅಭ್ಯರ್ಥಿಗಳು ಏಳು ತಿಂಗಳು ಕ್ಲಾಸ್‌ರೂಮ್‌ ತರಬೇತಿ, ನಂತರ ಎರಡು ತಿಂಗಳ ಇಂಟರ್ನ್ಶಿಪ್‌ ಅನ್ನು ಪಡೆಯುತ್ತಾರೆ. ಈ ಕಾರ್ಯಕ್ರಮದಡಿ ನಗರಾಭಿವೃದ್ಧಿಗೆ ಸಂಬಂಧಿಸಿದಂತೆ ಸುಸ್ಥಿರ ಅಭಿವೃದ್ಧಿ, ಅಸಮಾನತೆ, ದೇಶದ ಆರ್ಥಿಕ ವ್ಯವಸ್ಥೆ, ಆಡಳಿತ, ಮೂಲ ಸೌಕರ್ಯ, ಸಾರಿಗೆ ವ್ಯವಸ್ಥೆ, ಶಕ್ತಿ, ವಸತಿ, ಪರಿಸರ ಮಾಲಿನ್ಯ, ಹವಾಮಾನ ಬದಲಾವಣೆ, ವಿಪತ್ತು ನಿರ್ವಹಣೆ, ಮುನಿಸಿಪಲ್‌ ಫೈನಾನ್ಸ್‌, ಯೋಜನೆ ನಿರ್ಮಾಣ, ಕುಡಿಯುವ ನೀರು ಮತ್ತು ಶುಚಿತ್ವ, ಜೀವನೋಪಾಯ ಮತ್ತು ಉದ್ಯೋಗ ಇತ್ಯಾದಿ ವಿಷಯಗಳಲ್ಲಿ ತರಬೇತಿಯನ್ನು ನೀಡಲಾಗುತ್ತದೆ. ಇದರ ಜೊತೆಗೆ ಅಭ್ಯರ್ಥಿಗಳ ಸಂವಹನ ಕೌಶಲಗಳು, ಬರವಣಿಗೆ ಕೌಶಲಗಳು, ನಾಯಕತ್ವ ಗುಣಗಳು, ಮತ್ತು ತಾರ್ಕಿಕ ಸಾಮರ್ಥ್ಯವನ್ನು ಬಲ ಪಡಿಸುವ ನಿಟ್ಟಿನಲ್ಲಿ ಕೂಡ ತರಬೇತಿ ನೀಡಲಾಗುತ್ತದೆ. ಒಟ್ಟಿನಲ್ಲಿ, ನಗರಾಭಿವೃದ್ಧಿ ಕ್ಷೇತ್ರದಲ್ಲಿ ಕೆಲಸ ಮಾಡಲು ಬೇಕಾದ ಬಹುತೇಕ ಎಲ್ಲ ರೀತಿಯ ತರಬೇತಿಯನ್ನು ಅಭ್ಯರ್ಥಿಗಳಿಗೆ ಒದಗಿಸಲಾಗುತ್ತದೆ.

ತರಬೇತಿಯ ಪಠ್ಯಕ್ರಮವನ್ನು ಅಮೆರಿಕದ ಮೆಸಾಚುಸೆಟ್ಸ್‌ ಇನ್ಸ್‌ಟಿಟ್ಯೂಟ್‌ ಆಫ್ ಟೆಕ್ನಾಲಜಿ (Massachusetts Institute of Technology), ಯೂನಿವರ್ಸಿಟಿ ಕಾಲೇಜ್‌ ಆಫ್ ಲಂಡನ್‌ (University College of London), ಯೂನಿವರ್ಸಿಟಿ ಆಫ್ ಕೇಪ್‌ಟೌನ್‌ (University of Capetown) ನಂತಹ ಕೆಲವು ಪ್ರತಿಷ್ಠಿತ ವಿದ್ಯಾನಿಲಯಗಳ ಜೊತೆಗೂಡಿ ತಯಾರು ಮಾಡಲಾಗಿರುವುದರಿಂದ ಕಾರ್ಯಕ್ರಮದ ಗುಣಮಟ್ಟ ಸ್ವಾಭಾವಿಕವಾಗಿ ಉತ್ತಮವಾಗಿದೆ.

ಆಯ್ಕೆ ಪ್ರಕ್ರಿಯೆ?
ಆಸಕ್ತ ಅಭ್ಯರ್ಥಿಗಳು ಅರ್ಜಿಗಳನ್ನು ಆನ್‌ಲೈನ್‌ ಮುಖಾಂತರ ಅಥವಾ ಪೋಸ್ಟ್‌ ಮೂಲಕ ಸಲ್ಲಿಸಬಹುದು. ಅರ್ಜಿಯಲ್ಲಿ ಅಭ್ಯರ್ಥಿಗಳ ಸ್ವ-ವಿವರ, ಶೈಕ್ಷಣಿಕ ಮಾಹಿತಿ, ವೈಯಕ್ತಿಕ ಹೇಳಿಕೆ ಮತ್ತು ಪ್ರಬಂಧ, ಎಕ್ಸ್‌ಪೀರಿಯನ್ಸ್‌ ಸರ್ಟಿಫಿಕೇಟ್‌ ಇತ್ಯಾದಿಗಳ ಬಗೆಗೆ ಮಾಹಿತಿಯನ್ನು ಒದಗಿಸಬೇಕು. ಅಭ್ಯರ್ಥಿಗಳ ಅರ್ಜಿಗಳನ್ನು ಪರಿಶೀಲಿಸಿದ ನಂತರ ಸಂದರ್ಶನಕ್ಕೆ ಆಯ್ಕೆ ಮಾಡಿಕೊಳ್ಳಲಾಗುತ್ತದೆ.

ನಗರಾಭಿವೃದ್ಧಿ ಕ್ಷೇತ್ರದಲ್ಲಿ ತಮ್ಮ ಭವಿಷ್ಯ ರೂಪಿಸಿಕೊಳ್ಳಲು ಬಯಸುವ ವಿದ್ಯಾರ್ಥಿಗಳಿಗೆ ಇದೊಂದು ಸುವರ್ಣಾವಕಾಶ.
ಹೆಚ್ಚಿನ ಮಾಹಿತಿಗಾಗಿ ಈ ಕೆಳಗಿನ ವೆಬ್‌ಸೈಟ್‌ಗೆ ಭೇಟಿಕೊಡಿ urbanfellows.iihs.co.in

– ಪ್ರಶಾಂತ್‌ ಎಸ್‌. ಚಿನ್ನಪ್ಪನವರ್‌ ಚಿತ್ರದುರ್ಗ