ಡಾ| ರಾಜಕುಮಾರ್‌ ಅದ್ಭುತ ಶಕ್ತಿ 

Team Udayavani, Apr 25, 2017, 1:02 PM IST

ದಾವಣಗೆರೆ: ಕಲಾ ತಪಸ್ವಿ ಡಾ| ರಾಜಕುಮಾರ್‌ ಕನ್ನಡ ನಾಡು, ನುಡಿ, ಗಡಿ ಹೋರಾಟಗಳಿಗೆ ಮಾತ್ರ ಸ್ಫೂರ್ತಿ ಅಲ್ಲ, ಅವರೊಂದು ಅದ್ಭುತ ಶಕ್ತಿ ಎಂದು ಕರ್ನಾಟಕ ಜನಮನ ವೇದಿಕೆ ಸಂಸ್ಥಾಪಕ ಅಧ್ಯಕ್ಷ ನಾಗೇಂದ್ರ ಬಂಡೀಕರ್‌ ಅಭಿಪ್ರಾಯಪಟ್ಟಿದ್ದಾರೆ. 

ಡಾ| ರಾಜಕುಮಾರ್‌ ಜನ್ಮದಿನದ ನಿಮಿತ್ತ ಮಜ್ಜಿಗೆ ವಿತರಣೆ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಡಾ| ರಾಜಕುಮಾರ್‌ ಕನ್ನಡ ಚಲನಚಿತ್ರ ರಂಗ ಸೇರಿದಂತೆ ಸಾಹಿತ್ಯ, ಸಾಂಸ್ಕೃತಿಕ ಲೋಕಕ್ಕೆ ಅಪಾರ ಕೊಡುಗೆ ನೀಡಿದ್ದಾರೆ. ಅವರು ಈ ನಾಡಿಗೆ ಸದಾ ಸ್ಫೂರ್ತಿ ಸೆಲೆಯಾಗಿ ಇರಲಿದ್ದಾರೆ.

ಕಲ್ಲು ಮುಳ್ಳುಗಳ ಹಾದಿಯಲ್ಲೇ ಅವರು ಅತ್ಯಂತ ಕಠಿಣ ಪರಿಶ್ರಮದಿಂದ ಕನ್ನಡಿಗರ ಹೃದಯಸಿಂಹಾಸನದಲ್ಲಿ ಭದ್ರವಾದ ನೆಲೆ ಕಂಡುಕೊಳ್ಳುವ  ಮೂಲಕ ಜನಮಾನಸದಲ್ಲಿ ಚಿರಾಯುವಾಗಿ ಉಳಿದಿದ್ದಾರೆ ಎಂದರು. ರಾಜಕುಮಾರ್‌ರ ಆದರ್ಶ ಇಂದಿನ ಪೀಳಿಗೆಗೆ ತಿಳಿಯಬೇಕಿದೆ.

ಉತ್ತಮ ಸಾಮಾಜಿಕ ವ್ಯವಸ್ಥೆ ಹೊಂದಲು ಅವರು ಎಲ್ಲರಿಗೂ ಮಾದರಿ. ಡಾ| ರಾಜ್‌ ಚಿತ್ರಗಳಲ್ಲಿರುವ ಅಂಶಗಳನ್ನು ಅರಿತು ಬಾಳಿದರೆ ಸುಂದರ ಸಮಾಜ ನಿರ್ಮಾಣ ಸಾಧ್ಯವಾಗುತ್ತದೆ ಎಂದು ಅವರು ತಿಳಿಸಿದರು.

ವೇದಿಕೆಯ ಉಪಾಧ್ಯಕ್ಷ ವಿಜಯಕುಮಾರ್‌, ಪ್ರಧಾನ ಕಾರ್ಯದರ್ಶಿ ಪಿ. ಶಿವಕುಮಾರ್‌ ಸುಂಕಾಪುರ, ಕಾರ್ಯದರ್ಶಿ ಮನ್ಸೂರ್‌, ಖಜಾಂಚಿ ಎಸ್‌. ವಿಷ್ಣು, ಮಹಿಳಾ ಸಂಚಾಲಕಿ ಮಹಾದೇವಿ ರುದ್ರೇಶ್‌, ಡಿ.ಎಸ್‌. ಪ್ರವೀಣ, ಎಂ. ತಿಪ್ಪೇಶ, ಆನಂದ, ಟಿ.ಸಿ. ಜಯಮೂರ್ತಿ, ಕುಮಾರ್‌ ಇತರರು ಈ ವೇಳೆ ಉಪಸ್ಥಿತರಿದ್ದರು ಎಂದು ಪ್ರಕಟಣೆ ತಿಳಿಸಿದೆ.