ಮಧುರ್‌ ಭಂಡಾರ್‌ಕರ್‌ ಕೊಲೆ ಸಂಚು: ಪ್ರೀತಿ ಜೈನ್‌ಗೆ 3 ವರ್ಷ ಜೈಲು

Team Udayavani, Apr 28, 2017, 2:53 PM IST

ಮುಂಬಯಿ : ಹಿಂದಿ ಚಿತ್ರ ನಿರ್ಮಾಪಕ – ನಿರ್ದೇಶಕ ಮಧುರ್‌ ಭಂಡಾರ್‌ಕರ್‌ ಅವರನ್ನು ಕೊಲ್ಲುವ ಸಂಚು ರೂಪಿಸಿದ್ದ ಅಪರಾಧಕ್ಕಾಗಿ ರೂಪದರ್ಶಿ ಪ್ರೀತಿ ಜೈನ್‌ ಅವರಿಗೆ ಸಿಟಿ ಸಿವಿಲ್‌ ಮತ್ತು ಸೆಶನ್ಸ್‌ ನ್ಯಾಯಾಲಯ ಮೂರು ವರ್ಷಗಳ ಜೈಲು ಶಿಕ್ಷೆ ಹಾಗೂ 10,000 ರೂ. ದಂಡವನ್ನು ವಿಧಿಸಿದೆ.

ಈ ಹಿಂದೆ ಮಧುರ್‌ ಭಂಡಾರ್‌ಕರ್‌ ವಿರುದ್ಧ ಪ್ರೀತಿ ಜೈನ್‌ ಅತ್ಯಾಚಾರದ ದೂರನ್ನು ದಾಖಲಿಸಿದ್ದಳು.

ಮಧುರ್‌ ಭಂಡಾರ್‌ಕರ್‌ ಕೊಲೆ ಸಂಚಿನಲ್ಲಿ ಭಾಗಿಯಾಗಿದ್ದುದಕ್ಕಾಗಿ ಪ್ರೀತಿ ಜೈನ್‌ಳ ಇಬ್ಬರು ಸಹವರ್ತಿಗಳಾದ ನರೇಶ್‌ ಪರ್ದೇಶಿ ಮತ್ತು ಶಿವರಾಮ್‌ ದಾಸ್‌ ಅವರಿಗೂ ನ್ಯಾಯಾಲಯ ಮೂರು ವರ್ಷಗಳ ಜೈಲು ಶಿಕ್ಷೆಯನ್ನು ವಿಧಿಸಿದೆ.

ಈ ಕೊಲೆ ಸಂಚಿನ ಪ್ರಕರಣದಲ್ಲಿ ಉತ್ತರ ಪ್ರದೇಶದ ಇನ್ನಿಬ್ಬರು ಆರೋಪಿಗಳ ವಿರುದ್ಧ ಸರಿಯಾದ ಸಾಕ್ಷ್ಯಾಧಾರಗಳು ದೊರಕದ ಕಾರಣಕ್ಕೆ ಅವರನ್ನು ನ್ಯಾಯಾಲಯ ಖುಲಾಸೆಗೊಳಿಸಿದೆ.

ಕೋರ್ಟ್‌ ತನ್ನ ತೀರ್ಪನ್ನು ಪ್ರಕಟಿಸಿದ ಒಡನೆಯೇ ಪ್ರೀತಿ ಜೈನ್‌ ಆ ತೀರ್ಪಿನ ಅಮಾನತಿಗೆ ಮನವಿ ಮಾಡಿಕೊಂಡಳು.

ಮಧುರ್‌ ಭಂಡಾರ್‌ಕರ್‌ ವಿರುದ್ಧ ಅತ್ಯಾಚಾರದ ಆರೋಪ ಹೊರಿಸಿದ ಒಂದು ವರ್ಷದ ತರುವಾಯ ಪ್ರೀತಿ ಜೈನ್‌ 2005ರಲ್ಲಿ ಪರ್ದೇಶಿಯನ್ನು ಸಂಪರ್ಕಿಸಿ ಭಂಡಾರ್‌ಕರ್‌ನನ್ನು ಮುಗಿಸಿಬಿಡಲು ಆತನಿಗೆ 75,000 ರೂ. ಪಾವತಿಸಿದ್ದಳು ಎಂದು ಆರೋಪಿಸಲಾಗಿದೆ.

ಆದರೆ ಪರ್ದೇಶಿ ತನ್ನ ಕೆಲಸವನ್ನು ಮಾಡಿ ಮುಗಿಸದ ಕಾರಣಕ್ಕೆ ಪ್ರೀತಿ ಜೈನ್‌ ಆತನಿಗೆ ತಾನು ಕೊಟ್ಟಿದ್ದ 75,000 ರೂ.ಗಳನ್ನು ಹಿಂದಿರುಗಿಸಬೇಕೆಂದು ಕೇಳಿದ್ದಳು.

ಈ ವಿಷಯವು ಗಾವಳಿಯನ್ನು ಮುಟಿಟದಾಗ ಆತ ತನ್ನ ವ್ಯಕ್ತಿಗಳನ್ನು ಕಳುಹಿಸಿ ಪೊಲೀಸರನ್ನು ಜಾಗೃತಗೊಳಿಸಿದ್ದ.

ವಾರಪೂರ್ತಿ ತನಿಖೆಯ ಬಳಿಕ ಪಲೀಸರು 2005ರ ಸೆಪ್ಟಂಬರ್‌ 10ರಂದು ಪ್ರೀತಿ ಜೈನ್‌ ವಿರುದ್ಧ ಕೊಲೆ ಸಂಚಿನ ಆರೋಪ ಹೊರಿಸಿದ್ದರು. ಅದೇ ದಿನ ಪರ್ದೇಶಿಯನ್ನು ಬಂಧಿಸಲಾಗಿತ್ತು. ಪ್ರೀತಿ ಜೈನ್‌ ಅಂದು ವಾರ್‌ಸೋವಾ ಪೊಲೀಸ್‌ ಠಾಣೆಯತ್ತ ಸಾಗುತ್ತಿದ್ದಾಗ ಆಕೆಯನ್ನು ಪೊಲೀಸರು ಬಂಧಿಸಿದ್ದರು.