ಗಂಗಾ ನದಿಗೇ ನೋಟಿಸ್‌ ನೀಡಿದ ಹೈಕೋರ್ಟ್‌!

Team Udayavani, Apr 29, 2017, 1:34 AM IST

ನೈನಿತಾಲ್‌: ತನ್ನ ದಡದಲ್ಲಿ ನಿರ್ಮಾಣ ಕಾಮಗಾರಿಗಾಗಿ ನೆಲ ತೋಡಲು ಅವಕಾಶ ಮಾಡಿಕೊಟ್ಟ ಗಂಗಾ ನದಿಗೇ ಉತ್ತರಾಖಂಡ ಹೈಕೋರ್ಟ್‌ ನೋಟಿಸ್‌ ಜಾರಿ ಮಾಡಿದೆ! ಹೌದು, ಇದು ಅಚ್ಚರಿ ಎನಿಸಿದರೂ ಸತ್ಯ. ಸಂರಕ್ಷಣೆ ಮತ್ತು ಕಾಪಾಡುವ ದೃಷ್ಟಿಯಿಂದ ಉತ್ತರಾಖಂಡ ಹೈಕೋರ್ಟ್‌ ಗಂಗಾ ಮತ್ತು ಯುಮುನಾ ನದಿಗಳಿಗೆ ‘ಮಾನವ ಸ್ಥಾನಮಾನ’ ಕೊಟ್ಟಿತ್ತು. ಸಾರ್ವಜನಿಕ ಹಿತಾಸಕ್ತಿ ಅರ್ಜಿಯೊಂದರ ವಿಚಾರಣೆ ವೇಳೆ ಹೈಕೋರ್ಟ್‌, ನದಿಯ ದಡದಲ್ಲಾಗುತ್ತಿರುವ ಕಾಮಗಾರಿ ಪ್ರಶ್ನಿಸಿ ಈ ನೋಟಿಸ್‌ ಜಾರಿ ಮಾಡಿದೆ.

ಖಾದ್ರಿ ಖಡಗ್‌ ಗ್ರಾಮದ ಬಳಿ ಗಂಗಾ ನದಿ ದಡದಲ್ಲಿ ಕಟ್ಟಡ ಕಾಮಗಾರಿ ನಡೆಯುತ್ತಿದೆ. ಇದು ನಿಯಮಗಳಿಗೆ ವಿರುದ್ಧ ಎಂದು ಪಿಐಎಲ್‌ನಲ್ಲಿ ಆಕ್ಷೇಪಿಸಲಾಗಿತ್ತು. ಹೀಗಾಗಿ ಹೈಕೋರ್ಟ್‌ ಗಂಗಾನದಿ, ಕೇಂದ್ರ ಸರಕಾರ, ಕೇಂದ್ರ ಹಾಗೂ ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿ ಮತ್ತು ಹೃಷಿಕೇಶದ ನಗರ ಪಾಲಿಕೆಗೆ ನೋಟಿಸ್‌ ನೀಡಿದೆ. ಮೇ 8ರೊಳಗೆ ಉತ್ತರಿಸುವಂತೆ ಸೂಚಿಸಿದೆ. ನದಿಯ ಪರ ಸರಕಾರದ ಮುಖ್ಯ ಕಾರ್ಯದರ್ಶಿ, ಅಡ್ವೊಕೇಟ್‌ ಜನರಲ್‌ ಮತ್ತು ನಮಾಮಿ ಗಂಗೆ ಯೋಜನೆಯ ನಿರ್ದೇಶಕರು ಉತ್ತರಿಸಬೇಕು.