ಬಲಿಗೆ ಕಾದಿರುವ ವಿದ್ಯುತ್‌ ಕಂಬಗಳು

Team Udayavani, May 6, 2017, 12:50 PM IST

ಎಚ್‌.ಡಿ.ಕೋಟೆ: ಪಟ್ಟಣದ ಪ್ರತಿಷ್ಠಿತ‌ ಹನುಮಂತನಗರ ಬಡಾವಣೆಯಲ್ಲಿ ಮನೆಗಳಿಗೆ ವಿದ್ಯುತ್‌ ಪೂರೈಕೆಗಾಗಿ ಪುರಸಭೆ ವತಿಯಿಂದ ಚೆಸ್ಕಾಂ, ರಸ್ತೆ ಬದಿಯಲ್ಲಿ ಅಳವಡಿಸಿರುವ ಕೆಲ ವಿದ್ಯುತ್‌ ಕಂಬಗಳು ಬೀಳುವ ಹಂತದಲ್ಲಿದ್ದು, ಅಪಾಯಕ್ಕೆ ಆಹ್ವಾನ ನೀಡುವ ಈ ಕಂಬಗಳಲ್ಲಿ ತೆರವುಗೊಳಿಸುವಂತೆ ಸಾರ್ವಜನಿಕರು ಆಗ್ರಹಿಸಿದ್ದಾರೆ.

ಈ ಬಡವಾಣೆಯು ಪಟ್ಟಣದಲ್ಲಿ ಅತಿ ದೊಡ್ಡ ಬಡಾವಣೆಯಾಗಿದ್ದು, ಇಲ್ಲಿ ಹಲವು ವರ್ಷಗಳ ಹಿಂದೆ ರಸ್ತೆ ಬದಿಯಲ್ಲಿ  ಅಳವಡಿಸಿದ್ದ ಕಂಬಗಳ ಸಮೀಪವೆ ಹೊಸದಾಗಿ ಚರಂಡಿ ನಿರ್ಮಾಣ ಮಾಡಿರುವ ಕಾರಣ ಕೆಲ ಕಂಬಗಳು ಮಣ್ಣಿನ ಬಿಗಿ ಕಳೆದುಕೊಂಡು ಬಾಗಿಕೊಂಡಿವೆ.

ಇನ್ನು ಕೆಲ ಕಂಬಗಳು ಅರ್ಧಕ್ಕೆ ಬಿರುಕು ಕಾಣಿಸಿಕೊಂಡಿದ್ದರೂ ಅವುಗಳನ್ನು ಬದಲಾಯಿಸದೆ ಬಿರುಕು ಜಾಗಕ್ಕೆ ಕಬ್ಬಿಣದ ಆಂಗ್ಲರ್‌ನಿಂದ ರಕ್ಷಣೆ ನೀಡಲಾಗಿದೆ. ಇನ್ನು ಕೆಲ ಕಂಬಗಳು ಯಾವಾಗ ಬೇಕಾದರೂ ಬೀಳುವಂತಿವೆ.  ಕಂಬ ಬಿದ್ದು ಅವಘಡ ಸಂಭವಿಸುವುದೋ ಎನ್ನುವ ಆತಂಕದಲ್ಲೇ ಜೀವನ ದೂಡುತ್ತಿದ್ದಾರೆ.

ಇಲ್ಲಿನ ವಿದ್ಯುತ್‌ ಕಂಬಗಳ ದುಸ್ಥಿತಿ ಕುರಿತು ಅಧಿಕಾರಿಗಳಿಗೆ ಹಲವು ಬಾರಿ ತಿಳಿಸಿದರೂ, ಒಂದು ವೇಳೆ ಕಂಬ ನೆಲಕ್ಕೆ ಉರುಳಿದರೇ ಅಗಬಹುದಾದ ಅವಘಡವನ್ನು ಮನವರಿಕೆ ಮಾಡಿಕೊಟ್ಟರೂ ಇನ್ನೂ ಕಂಬ ಬದಲಿಸಲು ಮುಂದಾಗಿಲ್ಲ ಎಂದು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ. ಇದೀಗ ಮಳೆಗಾಲ ಶುರುವಾಗಿದ್ದು, ಬಿರುಗಾಳಿ ಸಹಿತ ಮಳೆ ಸುರಿದರೆ ಅಪಾಯ ತಪ್ಪಿದ್ದಲ್ಲ.

ಆದರೂ ಯಾರಬ್ಬರೂ ಈ ಕುರಿತು ಕ್ರಮ ಕೈಗೊಂಡಿಲ್ಲದಿರುವುದು ಆತಂಕಕ್ಕೆ ಕಾರಣವಾಗಿದೆ. ಕೂಡಲೇ ಅಧಿಕಾರಿಗಳು ಹಾಗೂ ಜನಪ್ರತಿನಿಧಿಗಳು ಸ್ಥಳ ಪರಿಶೀಲನೆ ನಡೆಸಿ,  ಕೆಳಗೆ ಬಾಗಿರುವ, ಮುರಿದಿರುವ ಬಿರುಕು ಬಿಟ್ಟಿರುವ ವಿದ್ಯುತ್‌ ಕಂಬಗಳನ್ನು ತೆರವುಗೊಳಿಸಬೇಕು ಎಂದು ಆಗ್ರಹಿಸಿದ್ದಾರೆ.

ಈ  ವಾರ್ಡ್‌ನಲ್ಲಿರುವ ಕೆಲ ಕಂಬಗಳು ಬಿರುಕು ಬಿಟ್ಟಿವೆ, ಕೆಲ ಕಂಬಗಳು ಅರ್ಧದಷ್ಟು ನೆಲಕ್ಕೆ ಬಾಗಿವೆ. ಇನ್ನು ಕೆಲ ಕಂಬಗಳಲ್ಲಿ ಗಾರೆ ಕಿತ್ತುಹೋಗಿ ಕಂಬಕ್ಕೆ ಅಳವಡಿಸಿದ್ದ ಕಬ್ಬಿಣದ ಸರಳು ಹೊರ ಬಂದಿವೆ. ಈ ಕಂಬಗಳ ವೈರ್‌ ಕೂಡ ಜೋತು ಬಿದ್ದಿದ್ದು ಗಾಳಿ ಬೀಸಿದಾಗ ಒಂದಕೊಂದು ಸ್ಪರ್ಶಗೊಂಡು ಬೆಂಕಿ ಕಾಣಿಸಿಕೊಳ್ಳುತ್ತಿದ್ದು, ಭಯದಲ್ಲೇ ಬದುಕುತ್ತಿದ್ದೇವೆ.
-ಭಾಗ್ಯಮ್ಮ, ವಾರ್ಡ್‌ ನಿವಾಸಿ.

ವಾರ್ಡ್‌ನಲ್ಲಿ ದುಸ್ಥಿತಿಯಲ್ಲಿರುವ ಕಂಬಗಳನ್ನು ಬದಲಾಯಿಸಲು ಸುಮಾರು 5.5 ಲಕ್ಷ ರೂ.ಗಳ ಅಂದಾಜು ಪಟ್ಟಿಯನ್ನು ಚೆಸ್ಕಾಂ ಅಧಿಕಾರಿಗಳೇ ತಯಾರು ಮಾಡಿ, ಶೀಘ್ರ ಕಂಬ ಬದಲಿಸುವುದಾಗಿ ತಿಳಿಸಿ ಹೋಗಿ ಒಂದು ವರ್ಷ ಆಯ್ತು. ನಾನು ಕೂಡ ಚೆಸ್ಕಾಂ ಎಇಇ ಹಾಗೂ ಹುಣಸೂರಿನಲ್ಲಿರುವ ಇಇ ಕಚೇರಿಗೆ ಹಲವು ಬಾರಿ ತೆರಳಿ ಮನವಿ ಮಾಡಿಕೊಂಡರೂ ಯಾವುದೇ ಪ್ರಯೋಜನವಾಗಿಲ್ಲ, ಕಳೆದ ವಾರ ಶಾಸಕರು ಕೂಡ ಚೆಸ್ಕಾಂ ಮುಖ್ಯ ಎಂಜಿನಿಯರ್‌ಗೆ ಕರೆಮಾಡಿ ಬೇಗ ಕಂಬಗಳನ್ನು ಬದಲಿಸುವಂತೆ ತಿಳಿಸಿದ್ದಾರೆ.
-ಪುಟ್ಟಬಸವನಾಯ್ಕ, ಪುರಸಭೆ ಸದಸ್ಯ

ಬಡಾವಣೆಯಲ್ಲಿ ಕಂಬಗಳ ಸ್ಥಿತಿಯ ಬಗ್ಗೆ ಹಾಗೂ ದುಸ್ಥಿತಿಯಲ್ಲಿರುವ ಕಂಬಗಳನ್ನು ಯಾವ ರೀತಿ ಬದಲಾವಣೆ ಮಾಡಬೇಕು ಎಂದು ಅಲ್ಲಿನ ಎಇಇ ಬಳಿ ಶನಿವಾರ ಚರ್ಚಿಸಿ ಶೀಘ್ರ ಬದಲಾವಣೆ ಮಾಡಲಾಗುವುದು. ಶಾಸಕರು ಕೂಡ ಕರೆಮಾಡಿ ಕಂಬಗಳ ಸ್ಥಿತಿಯ ಬಗ್ಗೆ ತಿಳಿಸಿ ಬೇಗ ಬದಲಾಯಿಸುವಂತೆ ತಿಳಿಸಿದ್ದಾರೆ.
-ನಾಗೇಶ್‌, ಕಾರ್ಯಪಾಲಕ ಎಂಜಿನಿಯರ್‌, ಚೆಸ್ಕಾಂ

* ಬಿ.ನಿಂಗಣ್ಣ ಕೋಟೆ