ಬೇಡಿಕೆಗೆ ತಕ್ಕಂತೆ ಉತ್ಪಾದನೆ ಅಗತ್ಯ

Team Udayavani, May 6, 2017, 3:53 PM IST

ಹುಬ್ಬಳ್ಳಿ: ಉದ್ಯಮದಲ್ಲಿ ಒಂದು ಚಿಂತನೆಯಿಂದ ಇನ್ನೊಂದು ಚಿಂತನೆಗೆ ಜಿಗಿಯುವ ಬದಲು ಇದ್ದ ಚಿಂತನೆ ಬೆಳವಣಗೆ ಒತ್ತು ನೀಡಬೇಕು. ಉತ್ಪಾದನೆ ಹಾಗೂ ಸೇವಾ ವಲಯ ಉದ್ಯಮದಲ್ಲಿ ಗ್ರಾಹಕರ ಅವಶ್ಯಕತೆ ಆಧಾರದಲ್ಲಿ ಉತ್ಪಾದನೆ ಕೈಗೊಳ್ಳುವುದು ಒಳಿತು ಎಂದು ಹ್ಯಾಪಿಯೆಸ್ಟ್‌ ಮೈಂಡ್ಸ್‌ ಟೆಕ್ನಾಲಾಜೀಸ್‌ ಸಂಸ್ಥೆ ಸಹ ಸಂಸ್ಥಾಪಕ ಅಶೋಕ ಸೂಟಾ ಅಭಿಪ್ರಾಯಪಟ್ಟರು.

ಕೆಎಲ್‌ಇ ತಾಂತ್ರಿಕ ವಿಶ್ವವಿದ್ಯಾಲಯ ಬಯೋಟೆಕ್‌ ಸಭಾಭವನದಲ್ಲಿ ಆಯೋಜಿಸಿದ್ದ ಡಿಜಿಟಲ್‌ ಯುಗದ ಅವಕಾಶಗಳು ಹಾಗೂ ತಂತ್ರಗಾರಿಕೆ ಕುರಿತ ಉಪನ್ಯಾಸ ನೀಡಿ ಮಾತನಾಡಿದ ಅವರು, ನವೋದ್ಯಮ ಬೆಳವಣಿಗೆ ಸವಾಲಾಗಿರುತ್ತದೆ. ಆದರೆ ಹಿಂದಿನ ಹಲವು ಉದ್ಯಮಗಳ ಗುಣಾತ್ಮಕ ಹಾಗೂ ಋಣಾತ್ಮಕ ಅಂಶಗಳು, ಸಾಧನೆ-ವೈಫ‌ಲ್ಯಗಳನ್ನು ತುಲನೆ ಮಾಡುವ ಮೂಲಕ ಋಣಾತ್ಮಕ ಅಂಶಗಳನ್ನು ಮೆಟ್ಟಿ ನಿಂತರೆ ಯಶಸ್ಸು ದೊರೆಯಲಿದೆ ಎಂದರು.

ಗೂಗಲ್‌, ಫೇಸ್‌ಬುಕ್‌, ಮೈಕ್ರೋಸಾಫ್ಟ್ ಕಂಪೆನಿಗಳು ಹೊಸದನ್ನೇನು ಮಾಡಲಿಲ್ಲ. ಇಂತಹದ್ದೇ ಹಲವು ಕಂಪೆನಿಗಳ ಪೈಪೋಟಿಯಲ್ಲೇ ಜನ್ಮತಳೆದವು. ಋಣಾತ್ಮಕ ಅಂಶಗಳನ್ನು ಮೆಟ್ಟಿ ನಿಂತಿದ್ದಕ್ಕೆ ಇಂದು ಜಗತ್ತಿನಲ್ಲಿ ನಾಯಕತ್ವ ಸ್ಥಾನದಲ್ಲಿದ್ದಾರೆ. ದೇಶದಲ್ಲಿ ಆಧಾರ ಕಾರ್ಡ್‌ ಯೋಜನೆ ಜಾರಿಯಿಂದಾಗಿ ವಿಶ್ವದಲ್ಲೇ ಎರಡನೇ ಅತಿ ದೊಡ್ಡ ದತ್ತಾಂಶಗಳನ್ನು ಸಂಗ್ರಹಿಸಿದಂತಾಗಿದೆ. ನೋಟುಗಳ ಅಪನಗದೀಕರಣದ ಕ್ರಮ ಯಶಸ್ವಿಯಾಗಿದೆ ಎಂದರು.

ಕೆಲವೊಂದು ಉದ್ಯಮಗಳು ಉತ್ತಮ ಹಾಗೂ ವಿಭಿನ್ನ ರೀತಿಯಲ್ಲಿಆರಂಭವಾದರೂ ಬೆಳವಣಿಗೆ ನಿರ್ವಹಣೆ ಸಾಧ್ಯವಾಗದೆ ಫ‌ಲವಾಗುತ್ತವೆ. ಇದಕ್ಕೆ ಕ್ಯಾ| ಗೋಪಿನಾಥನ್‌ ಅವರ ಡೆಕ್ಕನ್‌ ವಿಮಾನಯಾನ ಉದ್ಯಮ ಸಾಕ್ಷಿಯಾಗಿದೆ. ಉದ್ಯಮದಲ್ಲಿ ರಿಸ್ಕ್ ಅವಶ್ಯ ಎನ್ನುತ್ತಾರೆ. ಆದಷ್ಟು ರಿಸ್ಕ್ನ್ನು ಕನಿಷ್ಠಗೊಳಿಸುವ ಯತ್ನ ಮಾಡಿ. ನಮ್ಮದೇ ಸಂಸ್ಕೃತಿಯನ್ನು ವೃದ್ಧಿಸುವುದರ ಜತೆಗೆ ಮೌಲ್ಯ, ಗುಣಮಟ್ಟದೊಂದಿಗೆ ಉತ್ಪನ್ನಗಳು ಜನತೆಯ ಬ್ರಾಂಡ್‌ ಆಗಿಸಬೇಕು ಎಂದು ಅಭಿಪ್ರಾಯಪಟ್ಟರು.

ವಿವಿಧ ಕ್ಷೇತ್ರಗಳಲ್ಲಿ ಹೆಚ್ಚುತ್ತಿರುವ ಯಾಂತ್ರೀಕರಣ ಹಲವುಉದ್ಯೋಗಗಳಿಗೆ ಕುತ್ತು ತರುತ್ತಿವೆ. ಹತ್ತಾರು ಜನರು ಮಾಡಬಹುದಾದ ಕಾರ್ಯಗಳನ್ನು ಒಂದು ರೋಬೋಟ್‌ ಮಾಡುತ್ತಿದೆ. ಆದರೆ ಉತ್ಪಾದನೆ, ಕಟ್ಟಡ ನಿರ್ಮಾಣ ಇನ್ನಿತರ ಕಾರ್ಯಗಳಲ್ಲಿ ಮಾನವ ಶಕ್ತಿ ಬಳಕೆಯೇ ಪ್ರಮುಖವಾಗಿದೆ.

ಐಟಿ ಉದ್ಯಮ ಸುಮಾರು 150 ಬಿಲಿಯನ್‌ ಡಾಲರ್‌ ವಹಿವಾಟು ನಡೆಸುತ್ತಿದ್ದು, ಅಮೆರಿಕದಲ್ಲಿ ಟ್ರಂಪ್‌ ಅಧಿಕಾರಕ್ಕೆ ಬಂದ ನಂತರ ಉಂಟಾಗಿರುವ ವೀಸಾ ವಿವಾದ ಐಟಿ ಕ್ಷೇತ್ರದ ದೊಡ್ಡ ಸಮಸ್ಯೆ ಏನಲ್ಲ. ದೇಸಿಯವಾಗಿಯೇ ಐಟಿ ಉದ್ಯಮವನ್ನು ಇನ್ನಷ್ಟು ವೃದ್ಧಿಗೊಳಿಸಲು ಎಲ್ಲ ರೀತಿಯ ಅವಕಾಶಗಳಿವೆ.

ತಾವು ಮೂರು ದಶಕಗಳಿಗೂ ಹೆಚ್ಚು ಕಾಲ ಸಿಇಒ ಸೇರಿದಂತೆ ವಿವಿಧ ಹುದ್ದೆ ನಿರ್ವಹಿಸಿ 58ನೇ ವಯಸ್ಸಿನಲ್ಲಿಉದ್ಯಮ ಆರಂಭಿಸಿದ್ದು, ಉದ್ಯಮ ಆರಂಭಕ್ಕೆ ವಯೋಮಿತಿ ಅಡ್ಡಿಯಲ್ಲ ಎಂದರು. ಕೆಎಲ್‌ಇ ತಾಂತ್ರಿಕ ವಿವಿ ಕುಲಪತಿ ಡಾ| ಅಶೋಕ ಶೆಟ್ಟರ, ಕುಲಸಚಿವ ಪ್ರೊ| ಬಿ.ಎಲ್‌. ದೇಸಾಯಿ, ಬಿವಿಬಿ ಕಾಲೇಜು ಪ್ರಾಂಶುಪಾಲ ಪ್ರೊ| ತೇವಡಿ, ಸಿಐಟಿಇ ಮುಖ್ಯಸ್ಥ ನಿತಿನ್‌ ಕುಲಕರ್ಣಿ, ಎಂಬಿಎ ವಿಭಾಗದ ಮುಖಸ್ಥ ಡಾ| ಎಸ್‌.ವಿ. ಪಾಟೀಲ ಸೇರಿದಂತೆ ಅನೇಕರು ಪಾಲ್ಗೊಂಡಿದ್ದರು.