ಮಧ್ಯಪ್ರದೇಶ: ಮದುವೆ ದಿಬ್ಬಣದ ಆರು ಮಂದಿ ಅಪಘಾತದಲ್ಲಿ ಸಾವು

Team Udayavani, May 9, 2017, 4:13 PM IST

ಶಿವಪುರ, ಮಧ್ಯಪ್ರದೇಶ : ಶಿವಪುರ ಜಿಲ್ಲೆಯ ಕಡಹಾಲ್‌ ತೆಹಸೀಲ್‌ನಲ್ಲಿ  ಮದುವೆ ದಿಬ್ಬಣದ ಟ್ರಾಕ್ಟರ್‌ ಟ್ರಾಲಿಯೊಂದು ಮಗುಚಿ ಬಿದ್ದು ಸಂಭವಿಸಿದ ಭೀಕರ ಅವಘಡದಲ್ಲಿ ಆರು ಮಂದಿ ಮೃತಪಟ್ಟು ಇತರ 20 ಮಂದಿ ಗಾಯಗೊಂಡರೆಂದು ಪೊಲೀಸರು ತಿಳಿಸಿದ್ದಾರೆ. 

ಭೇಲಾ ಭೇಮಲತ್‌ ಗ್ರಾಮದಲ್ಲಿ ಮದುವೆ ಕಾರ್ಯಕ್ರಮ ಮುಗಿಸಿ  ಭೋಟಿಪುರದಲ್ಲಿನ ತಮ್ಮ ಮನೆಗಳಿಗೆ ಮರಳುತ್ತಿದ್ದ ನತದೃಷ್ಟರಿದ್ದ ಟ್ರಾಕ್ಟರ್‌ ಟ್ರಾಲಿಯ ಲಿವರ್‌ ಅಛಾನಕ್‌ ಆಗಿ ಒತ್ತಲ್ಪಟ್ಟು ಅಡಿ ಮೇಲಾಗಿ ಮಗುಚಿಕೊಂಡಿತು ಎಂದು ಕಡಹಾಲ್‌ ಪೊಲೀಸ್‌ ಠಾಣೆಯ ಪ್ರಭಾರಾಧಿಕಾರಿ ಸುನೀಲ್‌ ಶರ್ಮಾ ತಿಳಿಸಿದ್ದಾರೆ. 

ಮೃತರನ್ನು ರಾಮದಾಸ್‌ 35, ಸಂಜಯ್‌ 40, ವಿಶಾಲ್‌ 12, ಸೋನಿ 26, ರಾಮಹಿತ್‌ 40 ಮತ್ತು ರಾಮಚರಣ್‌ 40 ಎಂದು ಗುರುತಿಸಲಾಗಿದೆ. 

ಜಿಲ್ಲಾಧಿಕಾರಿ ಅಭಿಜಿತ್‌ ಅಗ್ರವಾಲ್‌ ಅವರು ಮೃತರ ಕುಟುಂಬದವರಿಗೆ ತಲಾ 5,000 ರೂ. ಹಾಗೂ ಗಾಯಾಳುಗಳಿಗೆ ತಲಾ 3,000 ರೂ.ಗಳ ಪರಿಹಾರ ಪ್ರಕಟಿಸಿದ್ದಾರೆ.