ನಾಳೆ  ಸೊಫಿಯಾ ಕೊಂಕಣಿ ಚಿತ್ರ ಬಿಡುಗಡೆ

Team Udayavani, May 11, 2017, 2:25 PM IST

ಮಂಗಳೂರು: ಜಾನೆಟ್‌ ನೊರೊನ್ಹಾ ಪ್ರೊಡಕ್ಷನ್‌ ಬ್ಯಾನರ್‌ನಲ್ಲಿ ನಿರ್ಮಾಣವಾದ “ಸೊಫಿಯಾ’ ಕೊಂಕಣಿ ಚಿತ್ರ ಮೇ 12ರಂದು ಕರಾವಳಿಯಲ್ಲಿ ಬಿಡುಗಡೆ ಕಾಣಲಿದೆ. ಮಂಗಳೂರಿನ ಪ್ರಭಾತ್‌, ಸಿನೆಪೊಲೀಸ್‌, ಬಿಗ್‌ ಸಿನೆಮಾ ದಲ್ಲಿ ಚಿತ್ರ ಬಿಡುಗಡೆಯಾಗಲಿದೆ ಎಂದು ಚಿತ್ರದ ನಿರ್ಮಾಪಕಿ ಜಾನೆಟ್‌ ನೊರೊನ್ಹಾ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

ಮೇ 12ರಂದು ಬೆಳಗ್ಗೆ 9 ಗಂಟೆಗೆ ಪ್ರಭಾತ್‌ ಚಿತ್ರ ಮಂದಿರದಲ್ಲಿ ಚಿತ್ರ ಬಿಡುಗಡೆ ಸಮಾರಂಭ ನಡೆಯಲಿದೆ. ಆರಂಭದಲ್ಲಿ ಮಂಗಳೂರಿನಲ್ಲಿ ಬಿಡುಗಡೆ ಮಾಡಿದ ಬಳಿಕ ಅನಂತರ ಕಾರ್ಕಳ, ಮೂಡಬಿದಿರೆ, ಉಡುಪಿ, ಮಣಿಪಾಲ, ಬೆಂಗಳೂರು, ಗೋವಾ, ಮುಂಬಯಿ, ಮಧ್ಯಪ್ರಾಚ್ಯ ದೇಶಗಳ ಜತೆಗೆ ಇಸ್ರೇಲ್‌, ಯುಕೆಯಲ್ಲಿ ಚಿತ್ರ ಬಿಡುಗಡೆಯಾಗಲಿದೆ ಎಂದರು.

ಕೌಟುಂಬಿಕ ಸಿನೆಮಾ
ಬಹುಭಾಷಾ ನಟಿ ಎಸ್ತೆರ್‌ ನೊರೊನ್ಹಾ ನಾಯಕಿಯಾಗಿ, ಎಲ್ಟನ್‌ ಮಸ್ಕರೇನಸ್‌ ಹಾಗೂ ಶೆಲ್ಟನ್‌ ಕ್ರಾಸ್ತಾ ನಾಯಕ ನಟರಾಗಿ ಕಾಣಿಸಿಕೊಂಡಿದ್ದಾರೆ. ಗೋವಾದ ಖ್ಯಾತ ಹಾಸ್ಯ ಕಲಾವಿದ ಫ್ರಿನ್ಸ್‌ ಜೇಕಬ್‌ ಸೇರಿದಂತೆ ರಿಚರ್ಡ್‌ ಹಾಗೂ ಇತರರು ಚಿತ್ರದಲ್ಲಿದ್ದಾರೆ. ಉಡುಪಿಯ ಫಲಿಮಾರು, ಬೆಳ್ಮಣ್ಣು,ಕಲ್ಯಾಣಪುರ ಸೇರಿದಂತೆ ಮುಂಬಯಿ,ಚಿಕ್ಕಮಗಳೂರಿನಲ್ಲಿ ಸುಮಾರು 21 ದಿನಗಳ ಕಾಲ ಚಿತ್ರೀಕರಣ ನಡೆಸಲಾಗಿದೆ. 70 ಲಕ್ಷ ರೂ.ಗಳಲ್ಲಿ ಸಿದ್ಧವಾದ ಸೊಫಿಯಾ ಪಕ್ಕಾ ಕೌಟುಂಬಿಕ ಸಿನೆಮಾ. ಸಮಾಜಕ್ಕೊಂದು ಉತ್ತಮ ಸಂದೇಶ ಕಟ್ಟಿಕೊಡುವ ಕಾರ್ಯ ಈ ಚಿತ್ರದ ಮೂಲಕ ನಡೆದಿದೆ ಎಂದು ಅವರು ವಿವರಿಸಿದರು.

ಚಿತ್ರದ ನಾಯಕ ಎಲ್ಟನ್‌ ಮಾತನಾಡಿ, “ನಶಿಬಾಸೋ ಖೆಳ್‌’ ಖ್ಯಾತಿಯ ಬಾಲಿವುಡ್‌ ನಿರ್ದೇಶಕ ಹೆರಿ ಫೆರ್ನಾಂಡಿಸ್‌ ಬಾಕೂìರು ಚಿತ್ರಕ್ಕೆ ನಿರ್ದೇಶನ ಮಾಡಿದ್ದಾರೆ. ಚಿತ್ರದಲ್ಲಿ ಆರು ಹಾಡುಗಳಿವೆ ಎಂದರು.

ನಿರ್ದೇಶಕ ಹೆರಿ ಫೆರ್ನಾಂಡಿಸ್‌, ನಟರಾದ ಎಲ್ಟನ್‌ ಮಸ್ಕರೇನಸ್‌, ಶೆಲ್ಟನ್‌ ಕ್ರಾಸ್ತಾ ಉಪಸ್ಥಿತರಿದ್ದರು.