ಯೋಗಿ ಹೋದ ಮೇಲೆ ಎಸಿ, ಸೋಫಾ ಮಾಯ!

Team Udayavani, May 15, 2017, 10:41 AM IST

ಲಕ್ನೋ: ಪ್ರಧಾನಿ, ಮುಖ್ಯಮಂತ್ರಿ ಇತ್ಯಾದಿ ದೊಡ್ಡವರು ಬರುತ್ತಾರೆ ಅಂದರೆ, ರಸ್ತೆಗೆ ಡಾಮರು, ಕಟ್ಟಡಗಳಿಗೆ ಬಣ್ಣ, ನಿರಂತರ ವಿದ್ಯುತ್‌, ಎಸಿ, ಫ್ಯಾನು ಎಲ್ಲ ಬರುತ್ತೆ. ಅವರು ಹೋದ ಬಳಿಕ ಅಷ್ಟೇ ವೇಗದಲ್ಲಿ ಎಲ್ಲವೂ ಪ್ಯಾಕಪ್‌. ಇದಕ್ಕೆಲ್ಲ ಕಾರಣ ಅಧಿಕಾರಿಗಳ ಕೈಚಳಕ. ಇಂಥದ್ದೇ ಒಂದು ಘಟನೆ ಉತ್ತರ ಪ್ರದೇಶದ ದೆಯೋರಿಯಾ ಜಿಲ್ಲೆಯಲ್ಲಿ ನಡೆದಿದೆ. 

ಇತ್ತೀಚೆಗೆ ಜಮ್ಮು ಮತ್ತು ಕಾಶ್ಮೀರದ ನಿಯಂತ್ರಣ ರೇಖೆ ಬಳಿ ಪಾಕಿಸ್ಥಾನ ಪಡೆಗಳಿಂದ ಗುಂಡಿನ ದಾಳಿ, ಶಿರಚ್ಛೇದಕ್ಕೊಳಗಾಗಿ ಹುತಾತ್ಮರಾದ ಬಿಎಸ್‌ಎಫ್ ಹೆಡ್‌ಕಾನ್‌ಸ್ಟೆಬಲ್‌ ಪ್ರೇಮ್‌ ಸಾಗರ್‌ ಅವರ ಮನೆಗೆ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್‌ ಭೇಟಿ ನಿಗದಿಯಾಗಿತ್ತು. ಯೋಗಿ ಬರುತ್ತಾರೆಂದು ಅಧಿಕಾರಿಗಳು ಒಂದು ದಿನ ಮೊದಲೇ ಮನೆಗೆ ಎಸಿ, ಕರ್ಟನ್‌, ಕಾರ್ಪೆಟ್‌, ಸೋಫಾ ತಂದು ಹಾಕಿದ್ದರು. ಜತೆಗೆ ಮಣ್ಣಿನ ರಸ್ತೆಗೆ ನೀರು ಹಾಕಿದ್ದರು. ಆದರೆ ಸಿಎಂ ಯೋಗಿ ಮನೆಯಿಂದ ಹೊರಬಿದ್ದ 15-30 ನಿಮಿಷಗಳಲ್ಲಿ ಎಸಿ, ಕಾರ್ಪೆಟ್‌, ಸೋಫಾ ಎಲ್ಲ ಮಾಯವಾಗಿವೆೆ. ಅಧಿಕಾರಿಗಳ ಈ ವರ್ತನೆ ಮನೆಯವರ ಟೀಕೆಗೆ ಕಾರಣವಾಗಿದೆ.