ಆಪ್‌ಗೆ ನಕಲಿ ಕಂಪೆನಿಗಳಿಂದ ಹಣ: ಕಪಿಲ್‌ ಮಿಶ್ರಾ ಆರೋಪ

Team Udayavani, May 15, 2017, 12:26 PM IST

ಹೊಸದಿಲ್ಲಿ: ಆಮ್‌ ಆದ್ಮಿ ಪಾರ್ಟಿ ಸರಕಾರದ ಸಚಿವ ಸ್ಥಾನದಿಂದ ವಜಾಗೊಂಡ ಕಪಿಲ್‌ ಮಿಶ್ರಾ, ತಮ್ಮ ವಾಗ್ಧಾಳಿಯನ್ನು ಮತ್ತಷ್ಟು ತೀವ್ರಗೊಳಿಸಿದ್ದು, ಪಕ್ಷದಲ್ಲಿ ಭಾರೀ ಹಣಕಾಸು ಅಕ್ರಮಗಳು ನಡೆದಿವೆ ಎಂದು ಬಾಂಬ್‌ ಸಿಡಿಸಿದ್ದಾರೆ. ಹೀಗೆ ಅವರು ಪತ್ರಿಕಾಗೋಷ್ಠಿ ಕರೆದು ವಾಗ್ಧಾಳಿ ನಡೆಸಿದ ಕೆಲ ಕ್ಷಣದಲ್ಲೇ ಅಸ್ವಸ್ಥಗೊಂಡಿದ್ದು, ದಿಲ್ಲಿಯ ಲೋಹಿಯಾ ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಅವರ ಆರೋಗ್ಯ ಸ್ಥಿರವಾಗಿದ್ದು, ಸುಸ್ತಾಗಿದ್ದಾರೆ ಮತ್ತು ಅಲ್ಪ ಪ್ರಮಾಣದ ನಿರ್ಜಲೀಕರಣದಿಂದ ಬಳಲಿದ್ದಾರೆ ಎಂದು ವೈದ್ಯರು ಹೇಳಿದ್ದಾರೆ. ಅದಕ್ಕೂ ಮೊದಲು ದಿಲ್ಲಿ ಸಿಎಂ ಅರವಿಂದ ಕೇಜ್ರಿವಾಲ್‌ ವಿರುದ್ಧ ವ್ಯಾಪಕ ಟೀಕೆ ನಡೆಸಿದ ಮಿಶ್ರಾ, ಅವರು ಸಿಎಂ ಸ್ಥಾನಕ್ಕೆ ರಾಜೀನಾಮೆ ಕೊಡಬೇಕು. ಇಲ್ಲವಾದರೆ, ಅವರ ಕೊರಳ ಪಟ್ಟಿ ಹಿಡಿದು ಎಳೆದುಕೊಂಡು ಹೋಗಿ ತಿಹಾರ್‌ ಜೈಲಿಗೆ ಅಟ್ಟುವುದಾಗಿ ಹೇಳಿದ್ದಾರೆ.

‘ಕೇಜ್ರಿವಾಲ್‌ ಭ್ರಷ್ಟ ವ್ಯಕ್ತಿಯಾಗಿದ್ದು, ಅವರ ಆಪ್ತರ ನಕಲಿ ಕಂಪೆನಿಗಳ ಮೂಲಕ ಪಕ್ಷಕ್ಕಾಗಿ ಕೋಟಿಗಟ್ಟಲೆ ಹಣ ಪಡೆದಿದ್ದಾರೆ. ಇದರಲ್ಲಿ ಆಪ್‌ ಶಾಸಕರಾದ ಶಿವ ಚರಣ್‌ ಗೋಯೆಲ್‌ ಮತ್ತು ನರೇಶ್‌ ಯಾದವ್‌ ಭಾಗಿಯಾಗಿದ್ದಾರೆ’ ಎಂದು ಆರೋಪಿಸಿದ್ದಾರೆ. ಈ ನಕಲಿ ಕಂಪೆನಿಗಳಲ್ಲಿ ನಕಲಿ ನಿರ್ದೇಶಕರಿದ್ದು, ಅವರು ಹಣಕೊಟ್ಟಿದ್ದಾಗಿ ತೋರಿಸಲಾಗಿದೆ. ಈ ಮೂಲಕ ಕಪ್ಪು ಹಣ ಬಿಳಿ ಮಾಡಲಾಗಿದೆ ಎಂದಿದ್ದಾರೆ. ಆದರೆ ಮಿಶ್ರಾ ಅವರ ಎಲ್ಲ ಆರೋಪಗಳನ್ನು ಆಮ್‌ ಆದ್ಮಿ ಪಕ್ಷ ತಿರಸ್ಕರಿಸಿದ್ದು, ಅವರು ಬಿಜೆಪಿ ಗಿಣಿಯಾಗಿದ್ದಾರೆ ಎಂದು ದೂರಿದೆ. ಬಿಜೆಪಿ ಮತ್ತು ಕಾಂಗ್ರೆಸ್‌ ಕೇಜ್ರಿವಾಲ್‌ ವಿರುದ್ಧ ಕಿಡಿಕಾರಿವೆ.