ನೀರು-ನೆರಳಿಗೆ ನರಳಾಟ

Team Udayavani, May 15, 2017, 3:57 PM IST

ವಾಡಿ: ಈ ರೈಲು ನಿಲ್ದಾಣದಲ್ಲಿ ಎಕ್ಸ್‌ಪ್ರೆಸ್‌ ರೈಲುಗಳು ಸಲೀಸಾಗಿ ನಿಲ್ಲುತ್ತವೆ. ಆದರೆ ರೈಲಿಗಾಗಿ ಕಾಯುವ ಪ್ರಯಾಣಿಕರು ಮಾತ್ರ ನೆರಳು ನೀರಿಗಾಗಿ ಪರದಾಡುತ್ತಾರೆ. ಮೂಲ ಸೌಲಭ್ಯಗಳೆಲ್ಲವೂ ಗಗನಕುಸುಮವಾಗಿದ್ದು, ಇದು ಹೆಸರಿಗೆ ಮಾತ್ರ ರೈಲು ನಿಲ್ದಾಣ ಎನ್ನುವ ಹಣೆಪಟ್ಟಿ ಅಂಟಿಸಿಕೊಂಡಿದೆ. 

ಜಿಲ್ಲೆಯ ಚಿತ್ತಾಪುರ ತಾಲೂಕಿನ ವಾಡಿ ಪಟ್ಟಣದ ಹೊರ ವಲಯದಲ್ಲಿರುವ ಹಳಕರ್ಟಿ ರೈಲು ನಿಲ್ದಾಣ ಅಭಿವೃದ್ಧಿ ಕಾಣದ್ದಕ್ಕೆ ಹಲವು ದಶಕಗಳ ಇತಿಹಾಸವಿದೆ. ಬೀದರ, ಹೈದ್ರಾಬಾದ, ಚೆನ್ನೆ ಮತ್ತು ಬೆಂಗಳೂರಿಗೆ ಮಾರ್ಗ ಕಲ್ಪಿಸುವ ಈ ನಿಲ್ದಾಣದಲ್ಲಿ ಲಿಂಕ್‌ ಏಕ್ಸ್‌ಪ್ರೆಸ್‌, ರಾಯಲಸೀಮಾ ಸೇರಿದಂತೆ ಐದಾರು ರೈಲುಗಳು ನಿಲುಗಡೆ ಕಾಣುತ್ತವೆ.

ರೈಲು ಹತ್ತೂರಿಗೆ ಟಿಕೆಟ್‌ ವಿತರಣೆ ಮಾಡುವವರಾಗಲಿ ಅಥವಾ ರೈಲು ಇಳಿಯೋರಿಗೆ ಟಿಕೆಟ್‌ ಕೇಳಬೇಕಾದ ಟಿಟಿಇಗಳಾಗಲಿ ಇಲ್ಲಿ ಕಾಣಸಿಗುವುದಿಲ್ಲ. ಅಂದರೆ, ಇದೆಂತಹ ರೈಲು ನಿಲ್ದಾಣ ಎಂದು ನೀವು ಹುಬ್ಬೇರಿಸಿದರೂ ಅಚ್ಚರಿಯಿಲ್ಲ. ಬೇಕಾಬಿಟ್ಟಿ ಎರಡು ಪ್ಲಾಟ್‌ಫಾರ್ಮ್ ನಿರ್ಮಿಸಿ, ನಾಮಫಲಕ ಳವಡಿಸಿ ಜವಾಬ್ದಾರಿ ಕಳಚಿಕೊಂಡಿರುವ ರೈಲ್ವೆ ಅಧಿಕಾರಿಗಳು, ಕುಡಿಯುವ ನೀರು, ಆಸನ, ಸೂಕ್ತ ನೆರಳಿನ ವ್ಯವಸ್ಥೆ ಒದಗಿಸುವಲ್ಲಿ ನಿರ್ಲಕ್ಷé ವಹಿಸಿದ್ದಾರೆ.

ಹಂದಿ ಗೂಡಿನಂತೆ ಬಾಗಿಲಿಲ್ಲದ ನಿರೀಕ್ಷಣಾ ಕೋಣೆಯನ್ನು ಇತ್ತೀಚೆಗೆ ನಿರ್ಮಿಸಲಾಗಿದೆ. ಇದು ಪುಂಡ ಪೋಕರಿಗಳ ಅಡಗುದಾಣವಾಗಿ ಗಬ್ಬು ನಾರುತ್ತಿದೆ. ರೈಲು ನಿಲ್ದಾಣಕ್ಕೆ ಪ್ರವೇಶಿಸುವ ಪ್ರಯಾಣಿಕರಿಗೆ ಸೂಕ್ತವಾದ ರಸ್ತೆ ಸೌಕರ್ಯವಿಲ್ಲ. ಮುಳ್ಳುಕಂಟಿಗಳ ಮಧ್ಯೆಯಿರುವ ಕಾಲುದಾರಿಗೆ ರಾತ್ರಿ ಬೆಳಕಿನ ವ್ಯವಸ್ಥೆಯಿಲ್ಲ. ಹಗಲು ನಿರ್ಜನ ಪ್ರದೇಶದಂತಿದ್ದರೆ, ಹತ್ತಿರವೇ ಸ್ಮಶಾನ ಇರುವುದರಿಂದ ರಾತ್ರಿ ನಿಗೂಢ ತಾಣವಾಗಿ ಪರಿವರ್ತನೆಯಾಗುತ್ತದೆ. 

ಇತರ ರೈಲು ನಿಲ್ದಾಣಗಳಂತೆ ಅಭಿವೃದ್ಧಿ ವೇಗ ಹೆಚ್ಚಿಸಿಕೊಳ್ಳಬೇಕಿದ್ದ ಹಳಕರ್ಟಿ ರೈಲು ನಿಲ್ದಾಣ ರೈಲ್ವೆ ಇಲಾಖೆ ಅಧಿಕಾರಿಗಳ ಹಾಗೂ ಜನಪ್ರತಿನಿಧಿಗಳ ನಿಷ್ಕಾಳಜಿಗೆ ಸಿಲುಕಿ ಮೌನವಾಗಿ ನಿಂತಿದೆ. ರಸ್ತೆ ಸೌಲಭ್ಯದ ಜತೆಗೆ ಇತರ ಮೂಲಸೌಕರ್ಯ ಒದಗಿಸುವ ಮೂಲಕ ನಿಲ್ದಾಣವನ್ನು ಅಭಿವೃದ್ಧಿಪಡಿಸಬೇಕು ಎಂಬುದು ಈ ಭಾಗದ ಜನರ ಆಗ್ರಹವಾಗಿದೆ.

* ಮಡಿವಾಳಪ್ಪ ಹೇರೂರ