ಕಿರಣ್‌ ಗೋವಿ ಹೊಸ ಸಿನ್ಮಾ ಯಾರಿಗೆ ಯಾರುಂಟು

Team Udayavani, May 16, 2017, 11:29 AM IST

ನಿರ್ದೇಶಕ ಕಿರಣ್‌ ಗೋವಿ ಸದ್ದಿಲ್ಲದೇ ಒಂದು ಸಿನಿಮಾ ಶುರು ಮಾಡಿದ್ದಾರೆ. ಅದು “ಯಾರಿಗೆ ಯಾರುಂಟು’. ಕಿರಣ್‌ ಗೋವಿಯ ಹೊಸ ಚಿತ್ರವಿದು. ಈ ಹಿಂದೆ “ಪಯಣ’, “ಪಾರು ವೈಫ್ ಆಫ್ ದೇವದಾಸ್‌’ ಸಿನಿಮಾಗಳನ್ನು ನಿರ್ದೇಶಿಸಿರುವ ಕಿರಣ್‌ ಗೋವಿ ಈ ಬಾರಿ ಫ್ಯಾಮಿಲಿ ಡ್ರಾಮಾ ಕಥೆಯೊಂದಿಗೆ ಬಂದಿದ್ದಾರೆ. ಚಿತ್ರಕ್ಕೆ “ಈ ಪಯಣದಲಿ’ ಎಂಬ ಅಡಿಬರಹ ಕೂಡಾ. ಹಾಗಾಗಿ, “ಯಾರಿಗೆ ಯಾರುಂಟು ಈ ಪಯಣದಲಿ’ ಎಂದುಕೊಳ್ಳಬಹುದು.

ಬಹುತಾರಾಗಣದ ಈ ಚಿತ್ರದ ಹೀರೋ ಯಾರೆಂದರೆ ಕಥೆಯೇ ಹೀರೋ ಎನ್ನುತ್ತಾರೆ ಕಿರಣ್‌ ಗೋವಿ. “ಇಲ್ಲಿ ಹೀರೋ ಅನ್ನೋದಕ್ಕಿಂತ ನಾನು ಪಾತ್ರಗಳನ್ನು ಇಟ್ಟುಕೊಂಡು ಈ ಸಿನಿಮಾ ಮಾಡುತ್ತಿದ್ದೇನೆ. ಚಿತ್ರದಲ್ಲಿ ತುಂಬಾ ಪಾತ್ರಗಳಿದ್ದುಯ, ಆ ಪಾತ್ರಗಳ ಮೂಲಕ ಇಡೀ ಸಿನಿಮಾ ಸಾಗುತ್ತದೆ. ಹಾಗಾಗಿ, ಇಲ್ಲಿ ಯಾರೊಬ್ಬರನ್ನು ಹೀರೋ ಎಂದು ಬಿಂಬಿಸಲಾಗುವುದಿಲ್ಲ’ ಎನ್ನುವ ಕಿರಣ್‌, ಇದೊಂದು ಫ್ಯಾಮಿಲಿ ಡ್ರಾಮಾ ಆಗಿದ್ದು, ಸೆಂಟಿಮೆಂಟ್‌, ಕಾಮಿಡಿ ಹಾಗೂ ಒಳ್ಳೆಯ ಹಾಡುಗಳು ಇರಲಿವೆ ಎನ್ನುತ್ತಾರೆ.

ಇನ್ನು, ಚಿತ್ರದಲ್ಲಿ “ಒರಟ’ ಪ್ರಶಾಂತ್‌ ಪ್ರಮುಖ ಪಾತ್ರ ಮಾಡುತ್ತಿದ್ದಾರೆ. ಉಳಿದಂತೆ ಕೃತಿಕಾ, ಲೇಖಾ ಚಂದ್ರ, ಅದಿತಿ, ಅಚ್ಯುತ್‌ ಕುಮಾರ್‌, ಜಯಲಕ್ಷ್ಮೀ, ಓಂ ಪ್ರಕಾಶ್‌ ರಾವ್‌, ಯತಿರಾಜ್‌ ಸೇರಿದಂತೆ ಅನೇಕರು ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ರಘುನಾಥ್‌ ಎನ್ನುವವರು ಈ ಸಿನಿಮಾವನ್ನು ನಿರ್ಮಿಸುತ್ತಿದ್ದಾರೆ.  ಈಗಾಗಲೇ ಕಳಸ, ಬೆಂಗಳೂರು ಸೇರಿದಂತೆ ಹಲವೆಡೆ ಚಿತ್ರೀಕರಣವಾಗಿದೆ. ಚಿತ್ರಕ್ಕೆ ಬಿ.ಜೆ.ಭರತ್‌ ಸಂಗೀತ, ರಾಕೇಶ್‌ ಅವರ ಛಾಯಾಗ್ರಹಣವಿದೆ.