ಕೊಚ್ಚಿ ಮಾಲ್‌ನಲ್ಲಿ ಬೆಂಕಿ:ಜನರ ಸುರಕ್ಷಿತ ಸ್ಥಳಾಂತರ;ಜೀವ ಹಾನಿ ಇಲ್ಲ

Team Udayavani, May 16, 2017, 3:30 PM IST

ಕೊಚ್ಚಿ : ಇಲ್ಲಿಗೆ ಸಮೀಪದ ಪ್ರಖ್ಯಾತ ಮಾಲ್‌ ಒಂದರಲ್ಲಿ ಇಂದು ಬೆಂಕಿ ಕಾಣಿಸಿಕೊಂಡಿತಾದರೂ ತತ್‌ಕ್ಷಣವೇ ಒಳಗಿದ್ದವರನ್ನು ಸುರಕ್ಷಿತವಾಗಿ ಸ್ಥಳಾಂತರಿಸಲಾಯಿತಲ್ಲದೆ ಸಕಾಲದಲ್ಲಿ ಬೆಂಕಿಯನ್ನು ನಿಯಂತ್ರಿಸಲಾಯಿತು ಎಂದು ಪೊಲೀಸರು ತಿಳಿಸಿದ್ದಾರೆ.

ಎಡಪಳ್ಳಿ ಸಮೀಪದ ಒಬೆರಾನ್‌ ಮಾಲ್‌ನ ನಾಲ್ಕನೇ ಅಂತಸ್ತಿನಲ್ಲಿ ಇಂದು ಬೆಳಗ್ಗೆ ಬೆಂಕಿ ಕಾಣಿಸಿಕೊಂಡಿತು. ಕೂಡಲೇ ಅಗ್ನಿ ಶಾಮಕ ದಳಕ್ಕೆ ಸುದ್ದಿ ತಲುಪಿಸಲಾಯಿತು. ಅವರು ಧಾವಿಸಿ ಬಂದು ಬೆಂಕಿಯನ್ನು ನಂದಿಸಿದರು. ಅದಕ್ಕೆ ಮೊದಲೇ ಒಳಗಿದ್ದ ಜನರನ್ನು ಹೊರಗೆ ಕರೆತರಲಾಯಿತು ಎಂದು ಅಗ್ನಿ ಶಾಮಕ ದಳದ ಸಿಬಂದಿ ಹೇಳಿದರು. 

ಈ ಮಾಲ್‌ನಲ್ಲಿ ಮಲ್ಟಿಪ್ಲೆಕ್ಸ್‌ ಕೂಡ ಇದ್ದು ಅದರೊಳಗೆ ಎಂದಿನಂತೆ ಶೋ ನಡೆಯುತ್ತಿತ್ತು. ಆದರೆ ಸಕಾಲದಲ್ಲಿ ಮುನ್ನೆಚ್ಚರಿಕೆ ವಹಿಸಿ ಒಳಗಿದ್ದ ಜನರನ್ನು ಸ್ಥಳಾಂತರಿಸಲಾಗಿ ಬೆಂಕಿಯನ್ನು ನಿಯಂತ್ರಿಸಲಾಯಿತು; ಯಾವುದೇ ಜೀವ ಹಾನಿ, ಸೊತ್ತು ನಾಶ ನಷ್ಟ ಉಂಟಾಗಲಿಲ್ಲ ಎಂದು ಕೊಚ್ಚಿಯ ಪೊಲೀಸ್‌ ಕಮಿಷನರ್‌ ಎಂ ಪಿ ದಿನೇಶನ್‌ ತಿಳಿಸಿದರು. 

ಮಾಲ್‌ನಲ್ಲಿ ಬೆಂಕಿ ಹೇಗೆ ಕಾಣಿಸಿಕೊಂಡಿತು ಎಂಬ ಬಗ್ಗೆ ತನಿಖೆ ನಡೆಯುತ್ತಿದೆ ಎಂದು ದಿನೇಶನ್‌ ಹೇಳಿದರು.