ಜೂನ್‌ ಮೊದಲ ವಾರದಲೇ ಪುಸ್ತಕ ಸಮವಸ್ತ್ರ

Team Udayavani, May 22, 2017, 4:45 PM IST

ಕಲಬುರಗಿ: ಪ್ರಸಕ್ತ ಶೈಕ್ಷಣಿಕ ಸಾಲಿನಲ್ಲಿ(2017-18) ಶಾಲೆಗಳು ಪುನರಾಂಭವಾಗಲು ಕ್ಷಣಗಣನೆ ಶುರುವಾಗಿವೆ. ಒಂದೆಡೆ ಮಕ್ಕಳು ರಜೆ ಮುಗಿಸಿಕೊಂಡು ಶಾಲೆಗಳಿಗೆ ಹೋಗಲು ಸಜ್ಜಾಗುತ್ತಿದ್ದಾರೆ. ಇನ್ನೊಂದೆಡೆ ಪಾಲಕರು ಶಾಲೆ ಶುಲ್ಕ, ಸಮವಸ್ತ್ರ, ಪುಸ್ತಕಗಳು ಹಾಗೂ ಡೂನೇಶನ್‌ಗೆ ಹಣ ಹೊಂದಿಸಲು ಕಸರತ್ತು ನಡೆಸುತ್ತಿದ್ದಾರೆ.

ಇದೆಲ್ಲದರ ಮಧ್ಯೆ ಈ ಬಾರಿ ಮೇ 29ರಂದು ಶಾಲೆಗಳು ಪುನರಾರಂಭವಾಗಲಿವೆ. ಖಾಸಗಿ ಶಾಲೆಗಳಿಗೆ ಬಹುತೇಕ ಪಾಲಕರು ಮಾರು ಹೋಗಿರುವ ಈ ಸಂದರ್ಭದಲ್ಲಿ ಸರಕಾರಿ ಶಾಲೆಗಳಲ್ಲೂ ತಯಾರಿ ಮಾಡಿಕೊಳ್ಳುತ್ತಿವೆ. ಅಲ್ಲದೇ ಮಕ್ಕಳು ಕೂಡ ಉತ್ಸಾಹದಿಂದ ಸಜ್ಜಾಗುತ್ತಿದ್ದಾರೆ.

ಈ ಮಧ್ಯೆ ಸರಕಾರ ಶಾಲೆ ಆರಂಭದ ವೇಳೆಗೆ ಪಠ್ಯ ಪುಸ್ತಕ ಮತ್ತು ಸಮವಸ್ತ್ರ ಪೂರೈಸಲು ಈಗಾಗಲೇ ಸೂಚನೆ ನೀಡಿದೆ. ಆದರೆ, ಅವು ಬಂದು ತಲುಪಿ ಮಕ್ಕಳಿಗೆ ವಿತರಣೆ ಆಗುವ ಹೊತ್ತಿಗೆ ಜುಲೈ ಕಳೆಯಬಹುದು ಎನ್ನಲಾಗುತ್ತಿದೆ. 

34ಲಕ್ಷ ಸೆಟ್‌ ಬೇಡಿಕೆ: 2017 ಮತ್ತು 2018ನೇ ಸಾಲಿನ ಉಚಿತ ಮತ್ತು ಮಾರಾಟ ರೂಪದಲ್ಲಿ ಜಿಲ್ಲೆಗೆ ಒಟ್ಟು 34,71,581 ಸೆಟ್‌ ಪೂರೈಕೆಗೆ ಬೇಡಿಕೆ ಸಲ್ಲಿಸಲಾಗಿದೆ. ಇದರಲ್ಲಿ 25,52,164 ಸೆಟ್‌ಗಳನ್ನು ಉಚಿತವಾಗಿ ಮಕ್ಕಳಿಗೆ ನೀಡಲಾಗುತ್ತದೆ.

9,19,417 ಸೆಟ್‌ಗಳು ಮಾರಾಟವಾಗಲಿವೆ. ಉಚಿತವಾಗಿ ನೀಡಲಾಗುವ ಪುಸ್ತಕಗಳು ಸರಕಾರಿ  ಶಾಲೆಗಳಲ್ಲಿ ಮತ್ತು ಮಾರಾಟ ಆಗುವ ಪುಸ್ತಕಗಳನ್ನು ಅನುದಾನ ಮತ್ತು ಅನುದಾನ ರಹಿತ ಶಾಲೆಗಳಿಗೆ ನೀಡಲಾಗುತ್ತಿದೆ. 

ಅದೇ ರೀತಿಯಾಗಿ 2, 91,378 ಜತೆ ಸಮವಸ್ತ್ರಕ್ಕೂ ಬೇಡಿಕೆ ಸಲ್ಲಿಸಲಾಗಿದೆ. 1.46,117 ಗಂಡು, 1.45.261 ಹೆಣ್ಣು ಮಕ್ಕಳ ಬಟ್ಟೆಗೆ ಬೇಡಿಕೆ ಸಲ್ಲಿಸಲಾಗಿದೆ. ಅದರಂತೆ ಈಗಾಗಲೇ ಶೇ. 30ರಷ್ಟು ಬಟ್ಟೆ ಬಂದಿವೆ. 

511 ಶೀರ್ಷಿಕೆಗಳು: ಒಟ್ಟು 34.71 ಲಕ್ಷ ಪುಸ್ತಕಗಳಲ್ಲಿ 511 ಶೀರ್ಷಿಕೆ ಪುಸ್ತಕಗಳಿವೆ. ಕನ್ನಡ, ಇಂಗ್ಲಿಷ್‌, ತೆಲುಗು, ಹಿಂದಿ, ಸಂಸ್ಕೃತ, ಮರಾಠಿ ಹಾಗೂ ಇತರೆ ಭಾಷಾ ಪುಸ್ತಕಗಳು ಸೇರಿದಂತೆ ಗಣಿತ, ಸಮಾಜ ವಿಜ್ಞಾನ, ವಿಜ್ಞಾನ ಪುಸ್ತಕಗಳು ಇರಲಿವೆ.

ಈ ಬಾರಿ ಸಾರ್ವಜನಿಕ ಶಿಕ್ಷಣ ಇಲಾಖೆ ಜೂ.3ರೊಳಗೆ ಪುಸ್ತಕಗಳನ್ನು ವಿದ್ಯಾರ್ಥಿಗಳಿಗೆ ಸಮರ್ಪಕವಾಗಿ ವಿತರಣೆ ಮಾಡಲು ಎಲ್ಲ ಕ್ರಮ ಕೈಗೊಂಡಿದೆ. ಅಲ್ಲದೆ, ಪ್ರತಿ ತಾಲೂಕಿನ ಬಿಇಒಗಳಿಗೆ ನೇರವಾಗಿ ಪುಸ್ತಕಗಳು ತಲುಪಲಿವೆ. ಅದಕ್ಕಾಗಿ ಎಲ್ಲ ವ್ಯವಸ್ಥೆ ಮಾಡಲಾಗಿದೆ.

ಅದರಂತೆ ಪ್ರತಿ 400 ವಿದ್ಯಾರ್ಥಿಗಳ ಸಂಖ್ಯೆ ಇರುವ ಶಾಲೆಗಳಲ್ಲಿ ದೊಡ್ಡ ಪ್ರಮಾಣದಲ್ಲಿ ಸಮಾರಂಭ ಆಯೋಜಿಸಿ ಮಕ್ಕಳಿಗೆ ಪುಸ್ತಕ ನೀಡಲು ನಿರ್ಧರಿಸಲಾಗಿದೆ. ಇದಕ್ಕಾಗಿ ಎಲ್ಲ ತಾಲೂಕುಗಳಿಗೆ  ಸೂಚನೆ ನೀಡಲಾಗಿದೆ. 

* ಸೂರ್ಯಕಾಂತ ಎಂ. ಜಮಾದಾರ