ಸೋನಿಯಾ ಭೋಜನಕ್ಕೆ ಹೋಗದ ನಿತೀಶ್‌, ಪ್ರಧಾನಿ ಮೋದಿ ಭೇಟಿ ಮಾಡ್ತಾರೆ !

Team Udayavani, May 26, 2017, 7:28 PM IST

ಹೊಸದಿಲ್ಲಿ : ಅತ್ಯಂತ ಮಹತ್ವದ ಬೆಳವಣಿಗೆಯಲ್ಲಿ, ಬಿಹಾರ ಮುಖ್ಯಮಂತ್ರಿ ನಿತೀಶ್‌ ಕುಮಾರ್‌ ಅವರು ಇಂದು ಶುಕ್ರವಾರ 10 ಜನಪಥ ದಲ್ಲಿ ಕಾಂಗ್ರೆಸ್‌ ಅಧ್ಯಕ್ಷೆ ಸೋನಿಯಾ ಗಾಂಧಿ ಏರ್ಪಡಿಸಿದ್ದ “ಒಗ್ಗಟ್ಟಿನ ಭೋಜನ’ ಕಾರ್ಯಕ್ರಮವನ್ನು ತಪ್ಪಿಸಿಕೊಂಡಿದ್ದು ಆಶ್ಚರ್ಯಕರವೆಂಬಂತೆ ನಾಳೆ ಶನಿವಾರ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಭೇಟಿಯಾಗಲಿದ್ದಾರೆ. 

ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಬಿಜೆಪಿ ಬಗ್ಗೆ ಈಚಿನ ದಿನಗಳಲ್ಲಿ ವಿಶೇಷ ಆಸಕ್ತಿಯನ್ನು ತೋರುತ್ತಿರುವರೆನ್ನರಾದ ನಿತೀಶ್‌ ಕುಮಾರ್‌. ನಾಳೆ ಶನಿವಾರ ಪ್ರಧಾನಿ ಮೋದಿ ಅವರು ದಿಲ್ಲಿಯಲ್ಲಿನ ತಮ್ಮ ನಿವಾಸದಲ್ಲಿ ಭಾರತ ಭೇಟಿಗೆ ಬಂದಿರುವ ಮಾರಿಷಸ್‌ ಪ್ರಧಾನಿ ಅನಿರುದ್ಧ ಜಗನ್ನಾಥ ಅವರ ಗೌರವಾರ್ಥವಾಗಿ ಏರ್ಪಡಿಸಿರುವ ಭೋಜನ ಕಾರ್ಯಕ್ರಮದಲ್ಲಿ ಭಾಗವಹಿಸಲಿದ್ದಾರೆ ಎಂದು ವರದಿಗಳು ತಿಳಿಸಿವೆ. 

ಪ್ರಧಾನಿ ಮೋದಿ ಮತ್ತು ನಿತೀಶ್‌ ಕುಮಾರ್‌ ಅವರೊಳಗಿನ ಶನಿವಾರದ ಭೇಟಿಯು ಕೇವಲ ಅಧಿಕೃತ ಭೇಟಿಯಾಗಿರುತ್ತದೆಯೇ ವಿನಾ ಅದರಲ್ಲಿ ಯಾವುದೇ ಖಾಸಗಿ ವಿಚಾರಗಳ ಚರ್ಚೆಯಾಗುವುದಿಲ್ಲ ಎಂದು ಜೆಡಿಯು ವಕ್ತಾರ ಅಜಯ್‌ ಆಲೋಕ್‌ ತಿಳಿಸಿದ್ದಾರೆ.