ಸಚಿನ್‌ ಬಯೋಪಿಕ್‌ ಭರ್ಜರಿ ಆರಂಭ; ಮೊದಲ ದಿನದ ಗಳಿಕೆ ಎಷ್ಟು ಗೊತ್ತಾ ?

Team Udayavani, May 27, 2017, 3:59 PM IST

ಹೊಸದಿಲ್ಲಿ : ಮಾಸ್ಟರ್‌ ಬ್ಲಾಸ್ಟರ್‌ ಸಚಿನ್‌ ತೆಂಡುಲ್ಕರ್‌ ಅವರ ಬಯೋಪಿಕ್‌ “ಸಚಿನ್‌: ಎ ಬಿಲಿಯನ್‌ ಡ್ರೀಮ್ಸ್‌’  ಶೀರ್ಷಿಕೆಯ ಸಾಕ್ಷ್ಯ ಕಥಾ ಚಿತ್ರ ಮೇ 26ರಂದು ತೆರೆ ಕಂಡಿದ್ದು  ಮೊದಲ ದಿನವೇ ಇದು 8.40 ಕೋಟಿ ರೂ. (ಹಿಂದಿ, ಮರಾಠಿ, ತಮಿಳು, ತೆಲುಗು,ಇಂಗ್ಲಿಷ್‌) ಗಳಿಸಿರುವುದಾಗಿ ಖ್ಯಾತ ಚಿತ್ರ ವಿಮರ್ಶಕ ಮತ್ತು ಸಿನಿಮಾ ಉದ್ಯಮ ವಿಶ್ಲೇಷಕ ತರಣ್‌ ಆಶಿಶ್‌ ತಿಳಿಸಿದ್ದಾರೆ. 

ಬ್ರಿಟಿಷ್‌ ಚಿತ್ರ ನಿರ್ಮಾಪಕ ಜೇಮ್ಸ್‌ ಅರ್‌ಸ್ಕೈನ್‌ ಚಿತ್ರಕಥೆ ಬರೆದು ನಿರ್ದೇಶಿಸಿರುವ ಈ ಸಾಕ್ಷ್ಯ ಕಥಾ ಚಿತ್ರವು ಎಲ್ಲ ವಯೋವರ್ಗದ ಸಚಿನ್‌ ಅಭಿಮಾನಿಗಳನ್ನು ಸೂಜಿಗಲ್ಲಿನಂತೆ ಚಿತ್ರಮಂದಿರಗಳತ್ತ ಸೆಳೆಯುತ್ತಿದೆ. 

ಚಿತ್ರದಲ್ಲಿ ಸಚಿನ್‌ ತೆಂಡುಲ್ಕರ್‌ ನಿಜ ಜೀವನದ ಹಲವು ಅತ್ಯಂತ ಆಪ್ತ ಘಟನೆಗಳು, ಸನ್ನಿವೇಶಗಳು ಇದ್ದು ಅವುಗಳನ್ನು ಕಲಾತ್ಮಕವಾಗಿ ಜೋಡಿಸಿಕೊಳ್ಳಲಾಗಿರುವುದರಿಂದ ನೋಡುಗರಿಗೆ ಅದು ಅಪ್ಯಾಯಮಾನವಾಗಿದೆ; ಪರಿಣಾಮಕಾರಿಯೂ ಆಗಿದೆ.

ಮಹಾರಾಷ್ಟ್ರ, ಒಡಿಶಾ, ಕೇರಳ ಮತ್ತು ಛತ್ತೀಸ್‌ಗಢದಲ್ಲಿ ಈ ಸಾಕ್ಷ್ಯ ಕಥಾ ಚಿತ್ರಕ್ಕೆ ತೆರಿಗೆ ವಿನಾಯಿತಿ ನೀಡಲಾಗಿದೆ.