ಮಮತಾ ಸರಕಾರ ಬ್ಯಾನ್‌ ಮಾಡಿಲ್ಲ; ಕೆಂಪು ದೀಪ ತೆಗೆಸಲ್ಲ: ಪ.ಬಂ. ಸಚಿವ

Team Udayavani, May 29, 2017, 3:25 PM IST

ಸಿಲಿಗುರಿ : “ರಾಜ್ಯದಲ್ಲಿರುವ ನಮ್ಮ ಸರಕಾರ ವಾಹನಗಳ ಮೇಲಿನ ಕೆಂಪು ದೀಪವನ್ನು ನಿಷೇಧಿಸಿಲ್ಲ; ಹಾಗಾಗಿ ನಾನು ನನ್ನ ವಾಹನದ ಮೇಲಿನ ಕೆಂಪು ದೀಪವನ್ನು ತೆಗೆಸುವುದಿಲ್ಲ’ ಎಂದು ಪಶ್ಚಿಮ ಬಂಗಾಲದ ಲೋಕೋಪಯೋಗಿ ಸಚಿವ ಆರೂಪ್‌ ಬಿಸ್ವಾಸ್‌ ಕೇಂದ್ರ ಸರಕಾರದ ನಿಷೇಧಕ್ಕೆ ಸಡ್ಡು ಹೊಡೆದಿದ್ದಾರೆ. 

ಕೇಂದ್ರ ಸರಕಾರ ಕಾನೂನು ಮತ್ತು ಸುವ್ಯವಸ್ಥೆಯನ್ನು ನೋಡಿಕೊಳ್ಳುವ ಪೊಲೀಸ್‌, ಸೇನೆ ಮತ್ತು ಅರೆ ಸೈನಿಕ ಪಡೆಗಳಿಗೆ ಸೇರಿದ ಭದ್ರತಾ ವಾಹನಗಳಿಗೆ ಮಾತ್ರವೇ ಕೆಂಪು, ನೀಲಿ ಹಾಗೂ ಬಿಳಿ ಬಣ್ಣದ ದೀಪಗಳನ್ನು ಹೊಂದಿರಲು ಅನುಮತಿ ನೀಡಿದೆ. ಉಳಿದಂತೆ ಯಾವುದೇ ವಾಹನಗಳ ಮೇಲೆ ಈ ರೀತಿಯ ದೀಪಗಳನ್ನು ಅಳವಡಿಸುವಂತಿಲ್ಲ.

ಮಮತಾ ಬ್ಯಾನರ್ಜಿ ಸರಕಾರ ಪಶ್ಚಿಮ ಬಂಗಾಲದಲ್ಲಿ  ಕೇಂದ್ರದ ಈ ನಿಷೇಧ ಕ್ರಮವನ್ನು ಜಾರಿಗೆ ತಂದಿಲ್ಲ; ಹಾಗಾಗಿ ನಾನು ನನ್ನ ವಾಹನದ ಮೇಲಿನ ಕೆಂಪು ದೀಪವನ್ನು ತೆಗೆಸುವುದಿಲ್ಲ ಎಂದು ಸಚಿವ ಆರೂಪ್‌ ಬಿಸ್ವಾಸ್‌ ಹೇಳಿದ್ದಾರೆ.

ಕೇಂದ್ರ ಸರಕಾರದ ನಿಷೇಧ ಕ್ರಮವು ಕೇಂದ್ರ ಸಚಿವರು, ಮುಖ್ಯಮಂತ್ರಿಗಳು, ರಾಜ್ಯ ಸಂಪುಟ ಸಚಿವರು, ಅಧಿಕಾರಶಾಹಿ ಮತ್ತು ಹೈಕೋರ್ಟ್‌ ಹಾಗೂ ಸುಪ್ರೀಂ ಕೋರ್ಟ್‌ ನ್ಯಾಯಾಧೀಶರಿಗೆ ಅನ್ವಯಿಸುತ್ತದೆ. ಆದರೆ ರಾಷ್ಟ್ರಪತಿ, ಉಪ ರಾಷ್ಟ್ರಪತಿ, ಪ್ರಧಾನಿ, ಭಾರತದ ವರಿಷ್ಠ ನ್ಯಾಯಮೂರ್ತಿ ಮತ್ತು ಲೋಕಸಭಾ ಸ್ಪೀಕರ್‌ ಅವರಿಗೆ ವಿನಾಯಿತಿ ಇದೆ.