ಬರ್ಲಿನ್‌ನಲ್ಲಿ ಪ್ರಧಾನಿ ನರೇಂದ್ರ ಮೋದಿ, ಪ್ರಿಯಾಂಕಾ ಚೋಪ್ರಾ ಭೇಟಿ

Team Udayavani, May 30, 2017, 4:00 PM IST

ಬರ್ಲಿನ್‌: ದಾದಾ ಸಾಹೇಬ್‌ ಫಾಲ್ಕೆ ಅಕಾಡೆಮಿ ಪ್ರಶಸ್ತಿಗೆ ಆಯ್ಕೆಯಾಗಿರುವ ಬಾಲಿವುಡ್‌ ನಟಿ ಪ್ರಿಯಾಂಕಾ ಚೋಪ್ರಾ ಬರ್ಲಿನ್‌ನಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಭೇಟಿಯಾಗಿದ್ದಾರೆ; ಮೋದಿ ಜತೆಗೆ ಕುಶಲೋಪರಿ ನಡೆಸುತ್ತಿರುವ ತನ್ನ ಫೋಟೋವನ್ನು ಆಕೆ ಇನ್‌ಸ್ಟಾಗ್ರಾಂನಲ್ಲಿ ಪೋಸ್ಟ್‌ ಮಾಡಿ ಸಂಭ್ರಮಿಸಿದ್ದಾರೆ. 

“ಇಂದು ಬೆಳಗ್ಗೆ ನಿಮ್ಮನ್ನು ಭೇಟಿಯಾಗುವುದಕ್ಕೆ ನನಗೆ ಸಮಯಾವಕಾಶ ನೀಡಿರುವುದಕ್ಕೆ ಧನ್ಯವಾದಗಳು. ನಾನೂ ನೀವೂ ಬರ್ಲಿನ್‌ನಲ್ಲಿ ಏಕಕಾಲದಲ್ಲಿದ್ದುಕೊಂಡು ಪರಸ್ಪರರನ್ನು ಭೇಟಿಯಾಗಿರುವುದು ನಿಜಕ್ಕೂ ಸಂತಸದ, ಕಾಕತಾಳೀಯ ಘಟನೆಯಾಗಿದೆ’ ಎಂದು ಪ್ರಿಯಾಂಕಾ ಬರೆದುಕೊಂಡಿದ್ದಾರೆ. 

ಬಾಲಿವುಡ್‌ನ‌ಲ್ಲಿ ಸಾಕಷ್ಟು ಹೆಸರು ಮಾಡಿ ಹಾಲಿವುಡ್‌ನ‌ಲ್ಲೂ ತಮ್ಮ ಚೊಚ್ಚಲ “Baywatch’ ಚಿತ್ರದ ಮೂಲಕ ಸುದ್ದಿ ಮಾಡುತ್ತಿರುವ ಪ್ರಿಯಾಂಕಾ ತಮ್ಮ ಹೊಸ ಚಿತ್ರದ ಪ್ರಚಾರಾರ್ಥವಾಗಿ ಪ್ರಕೃತ ಬರ್ಲಿನ್‌ನಲ್ಲಿದ್ದಾರೆ. ಇದೇ ವೇಳೆ ಪ್ರಧಾನಿ ಮೋದಿ ಕೂಡ ಆರು ದಿನಗಳ ನಾಲ್ಕು ರಾಷ್ಟ್ರಗಳ (ಜರ್ಮನಿ, ಸ್ಪೇನ್‌, ರಶ್ಯ ಮತ್ತು ಫ್ರಾನ್ಸ್‌) ಭೇಟಿಯಲ್ಲಿದ್ದು ಬರ್ಲಿನ್‌ನಲ್ಲಿರುವಾಗ ಪ್ರಿಯಾಂಕಾ ಅವರನ್ನು ಭೇಟಿಯಾಗಿದ್ದಾರೆ.

ಕ್ವಾಂಟಿಕೋ ಟಿವಿ ಧಾರಾವಾಹಿ ಮೂಲಕ ಪಾಶ್ಚಾತ್ಯ ದೇಶಗಳಲ್ಲಿ ಹೆಸರು ಮಾಡುತ್ತಿರುವ ಪ್ರಿಯಾಂಕಾ ಆಗೀಗ ಎಂಬಂತೆ ರತ್ನಗಂಬಳಿ ಸ್ವಾಗತದಲ್ಲಿ ಕಾಣಿಸಿಕೊಂಡು ಸುದ್ದಿಮಾಡುತ್ತಿದ್ದಾರೆ.