ಕಡು ಬಡ ವಿದ್ಯಾರ್ಥಿಗಳ ವ್ಯಾಸಂಗಕ್ಕೆ ಮೆಂಡಾ ಫೌಂಡೇಶನ್‌ ಸಂಜೀವಿನಿ

Team Udayavani, May 31, 2017, 3:16 PM IST

ಹುಬ್ಬಳ್ಳಿ: “ದೇಶ ವಿಭಜನೆಯಾದಾಗ ಬರಿಗೈಯಿಂದ ನಿರಾಶ್ರಿತವಾಗಿ ನಮ್ಮ ಕುಟುಂಬ ದೇಶಕ್ಕೆ ಬಂತು. ನಾನು ಸ್ಕಾಲರ್‌ ಶಿಪ್‌ ಹಣದಲ್ಲೇ ಓದಿದ ಆ ಕಷ್ಟದ ಸ್ಥಿತಿ ಹೇಳತೀರದು. ಅಂತಹ ಕಷ್ಟ ವಿದ್ಯಾರ್ಥಿಗಳಿಗೆ ಬಾರದಿರಲಿ ಎಂದು ಶೈಕ್ಷಣಿಕ ನೆರವಿಗಾಗಿ ವಾರ್ಷಿಕ 5 ಕೋಟಿ ರೂ. ವ್ಯಯಿಸುತ್ತಿರುವೆ. 

ಮುಂದಿನ ದಿನಗಳಲ್ಲಿ ಅತ್ಯುತ್ತಮ ಕೌಶಲ ಅಭಿವೃದ್ಧಿ ಕೇಂದ್ರ ಸ್ಥಾಪನೆ ಉದ್ದೇಶ ಹೊಂದಿದ್ದೇನೆ’ ಅಂದು ಒಂದೊಂದು ರೂಪಾಯಿಗೂ ಪರದಾಡಿದ್ದ ನನಗೆ, ಶೈಕ್ಷಣಿಕ ಹಂಬಲದ ಕಡು ಬಡ ಮಕ್ಕಳಿಗೆ ಆರ್ಥಿಕ ಹೊರೆ ಸಂಕಷ್ಟ ಎಂತಹದ್ದು ಎಂಬುದು ಸ್ಪಷ್ಟ ಪರಿಚಯವಿದೆ. ಇದಕ್ಕಾಗಿಯೇ ನನ್ನ ಕುಟುಂಬದ ಆರ್‌ಎನ್‌ರkುಡ್‌ ಕಾರ್ಪೋರೇಶನ್‌ನಿಂದ ಬರುವ ಆದಾಯವನ್ನು ಶೈಕ್ಷಣಿಕ ನೆರವಿಗೆ ಬಳಸುತ್ತಿರುವೆ.

ಇದು ಬೆಂಗಳೂರಿನ ಮೆಂಡಾ ಫೌಂಡೇಶನ್‌ ಮುಖ್ಯಸ್ಥ ಅರ್ಜುನ ಮೆಂಡಾ ಅವರ ಮನದಾಳದ ಮಾತು. ದೇಶ ವಿಭಜನೆ ಕಾಲಕ್ಕೆ ಪಾಕಿಸ್ತಾನದಿಂದ ಬಂದಿದ್ದು, ಶಿಕ್ಷಣಕ್ಕೆ ಪಟ್ಟ ಕಷ್ಟ, ಬೆಂಗಳೂರಿನಲ್ಲಿ ನೆಲೆ ನಿಂತು ಕಟ್ಟಡ ಉದ್ಯಮ ಕಟ್ಟಿದ್ದು, ಮೆಂಡಾ ಫೌಂಡೇಶನ್‌ ಸ್ಥಾಪನೆ ಹಾಗೂ ಅದರ ಉದ್ದೇಶ ಕುರಿತಾಗಿ ಅರ್ಜುನ ಮೆಂಡಾ “ಉದಯವಾಣಿ’ ಯೊಂದಿಗೆ ಮಾತನಾಡಿದರು.

ನಾ ಪಟ್ಟ ಕಷ್ಟವೇ ಸೇವೆಗೆ ಪ್ರೇರಣೆ: ಬಡತನ ಕಾರಣಕ್ಕೆ ಸ್ಕಾಲರ್‌ಶಿಪ್‌ ಹಣದಲ್ಲೇ ಓದು ಮುಂದುವರಿಸಿದ ನಾನು ನಂತರ ಐಐಟಿ ಖರಕ್‌ಪುರದಲ್ಲಿ ಪದವಿ ಪಡೆದೆ. 1967ರಲ್ಲಿ ಬೆಂಗಳೂರಿನಲ್ಲಿ ನಮ್ಮ ಕುಟುಂಬ ನೆಲೆ ನಿಂತಿತಲ್ಲದೆ, ಕಟ್ಟಡ ನಿರ್ಮಾಣ ಉದ್ಯಮದಲ್ಲಿ ತೊಡಗಿಕೊಂಡಿತು.

ವ್ಯಾಸಂಗಕ್ಕೆ ನಾನು ಪಟ್ಟ ಕಷ್ಟವೇ ಇಂದಿನ ಸಾಮಾಜಿಕ ಸೇವಾ ಕಾರ್ಯಕ್ಕೆ ಪ್ರೇರಣೆ. ಅದೆಷ್ಟೋ ಪ್ರತಿಭೆಗಳು ಕೇವಲ ಆರ್ಥಿಕ ಕಾರಣಕ್ಕಾಗಿ ಅರಳುವ ಮೊದಲೇ ಕಮರುತ್ತವೆ. ಇಂತಹ ಪ್ರತಿಭೆ ಅರಳಬೇಕು, ಇದರ ಲಾಭ ಸಮಾಜ- ದೇಶಕ್ಕೆ ದೊರೆಯಬೇಕೆಂಬ ಏಕೈಕ ಉದ್ದೇಶದಿಂದ ಮೆಂಡಾ ಫೌಂಡೇಶನ್‌ ಶೈಕ್ಷಣಿಕ ಸೇವಾ  ಕಾರ್ಯದಲ್ಲಿ ತೊಡಗಿದೆ.

1.6ಲಕ್ಷ ಮಕ್ಕಳಿಗೆ ಇ-ಶಾಲೆ ಸೌಲಭ್ಯ: ಇಂದಿನ ಮಕ್ಕಳಿಗೆ ಅದರಲ್ಲೂ ಹಿಂದುಳಿದ ಪ್ರದೇಶದ ವಿದ್ಯಾರ್ಥಿಗಳಿಗೆ ಇಂಗ್ಲಿಷ್‌, ಗಣಿತ ಹಾಗೂ ವಿಜ್ಞಾನ ಅತ್ಯಂತ ಕಠಿಣ ವಿಷಯಗಳಾಗಿದ್ದು, ಇವುಗಳ ಮನನಕ್ಕೆ ಇ-ಶಾಲೆ ಯೋಜನೆ ಆರಂಭಿಸಲಾಗಿದೆ. 5ರಿಂದ 10ನೇ ತರಗತಿವರೆಗಿನ ಮಕ್ಕಳಿಗೆ ಇ-ಶಾಲೆ ಸೌಲಭ್ಯ ದೊರೆಯುತ್ತಿದೆ. ಡಿಜಿಟಲ್‌ ನೆರವಿನೊಂದಿಗೆ ಮೂರು ವಿಷಯ ಮನದಟ್ಟು ಮಾಡಲಾಗುತ್ತಿದೆ.

 ಜತೆಗೆ ಕನ್ನಡ ಹಾಗೂ ಇಂಗ್ಲಿಷ್‌ ಸ್ಪೀಕಿಂಗ್‌ ಕೋರ್ಸ್‌ ಕಲಿಸಲಾಗುತ್ತಿದೆ. ಶಾಲೆಗೆ ಟಿ.ವಿ., ಪ್ರೊಜೆಕ್ಟರ್‌, ಸಾಫ್ಟ್ವೇರ್‌ ನೀಡಲಾಗುತ್ತದೆ. ಈಗಾಗಲೇ ಸುಮಾರು 900 ಶಾಲೆಗಳಲ್ಲಿ ಅಂದಾಜು 1.60ಲಕ್ಷ ಮಕ್ಕಳು ಇದರ ಪ್ರಯೋಜನ ಪಡೆಯುತ್ತಿದ್ದಾರೆ. ಸೆಲ್ಕೋ ಕಂಪೆನಿ ಸಾಮಾಜಿಕ ಸೇವಾ ಯೋಜನೆ ವಿಭಾಗದ ಸಹಯೋಗದೊಂದಿಗೆ ಇದನ್ನು ಕೈಗೊಳ್ಳಲಾಗುತ್ತಿದೆ. 

ಪ್ರತಿ ವರ್ಷ ಪಿಯುಸಿ, ಪದವಿ ಹಾಗೂ ಸ್ನಾತಕೋತ್ತರ ಇನ್ನಿತರ ವೃತ್ತಿ ಶಿಕ್ಷಣದ ಸುಮಾರು 750 ವಿದ್ಯಾರ್ಥಿಗಳಿಗೆ ಸ್ಕಾಲರ್‌ ಶಿಪ್‌ ನೀಡಲಾಗುತ್ತದೆ. ಶೈಕ್ಷಣಿಕ ಸೌಲಭ್ಯ ನೀಡಿಕೆಗೆ ಯೋಜನೆಯ ಶೇ.50ರಷ್ಟು ಪಾಲನ್ನು ಫೌಂಡೇಶನ್‌ ನೀಡುತ್ತದೆ. ಸಮುದಾಯದ ಸಕ್ರಿಯ ಪಾಲ್ಗೊಳ್ಳುವಿಕೆ ಹಾಗೂ ಯೋಜನೆಯ ಸಮರ್ಪಕ, ಗುಣಮಟ್ಟದ ಅನುಷ್ಠಾನ ನಿಟ್ಟಿನಲ್ಲಿ ಇಂತಹ ಕ್ರಮಕ್ಕೆ ಮುಂದಾಗಿದೆ. ಯಾರಿಗೆ ಅಗತ್ಯವಿದೆಯೋ, ಅವರ ಬೇಡಿಕೆ ಅರ್ಹತೆ ಆಧರಿಸಿ ನೆರವಿನ ಹಸ್ತ ಚಾಚಲಾಗುತ್ತದೆ. 

2 ಸಾವಿರ ಜನರಿಗೆ ಕೌಶಲ ತರಬೇತಿ: ಮುಂದಿನ ದಿನಗಳಲ್ಲಿ ರಾಜ್ಯದಲ್ಲಿ ಕೌಶಲ ಅಭಿವೃದ್ಧಿ ಕೇಂದ್ರಗಳನ್ನು ಆರಂಭಿಸುವ ಚಿಂತನೆ ಇದೆ. ಈಗಾಗಲೇ ಕಟ್ಟಡ ಉದ್ಯಮಕ್ಕೆ ಪೂರಕವಾಗಿ ವಿವಿಧ ವೃತ್ತಿಗಳ ಕೌಶಲ  ಅಭಿವೃದ್ಧಿ ನಿಟ್ಟಿನಲ್ಲಿ ಸುಮಾರು 2 ಸಾವಿರ ಜನರಿಗೆ ತರಬೇತಿ ನೀಡಲಾಗಿದೆ. 

ಗ್ರಾಮೀಣ ಹಾಗೂ ಹಿಂದುಳಿದ ಪ್ರದೇಶಗಳ ಜನರು ಮಹಾನಗರಗಳಿಗೆ ವಲಸೆ ಬರುತ್ತಿದ್ದು, ಅವರೆಲ್ಲ ಹೆಚ್ಚಾಗಿ ಕಟ್ಟಡ ಕಾಮಗಾರಿಗಳಲ್ಲೇ ತೊಡಗಿಕೊಳ್ಳುತ್ತಾರೆ. ಅವರಿಗ್ಯಾರಿಗೂ ವೃತ್ತಿ ಕೌಶಲ ಇರುವುದಿಲ್ಲ. ಇದನ್ನು ಮನಗಂಡು ಕೌಶಲಯುತ ಮಾನವ ಸಂಪನ್ಮೂಲ ರೂಪಿಸಲು ಫೌಂಡೇಶನ್‌ ಮುಂದಾಗಿದೆ ಎಂದರು. 

* ಅಮರೇಗೌಡ ಗೋನವಾರ