ತಂಬಾಕು ಉತ್ಪನ್ನಗಳ ಸೇವನೆಯಿಂದ ಅಪಾಯ

Team Udayavani, Jun 1, 2017, 1:09 PM IST

ದಾವಣಗೆರೆ: ತಂಬಾಕು ಸೇವನೆ ಬೇಡವೇ ಬೇಡ, ತಂಬಾಕು ತಿಂತೀರಿ ಯಾಕೆ? ಕ್ಯಾನ್ಸರ್‌ ಬಂದೀತು ಜೋಕೆ, ಸೇದಬೇಡಿ, ಸೇದಬೇಡಿ ಬೀಡಿ-ಸಿಗರೇಟ್‌, ತಂಬಾಕು ಅಭಿವೃದ್ಧಿಗೆ ಅಪಾಯ, ತಂಬಾಕು ನಿಯಂತ್ರಣ ನಮ್ಮೆಲ್ಲರ ಜವಾಬ್ದಾರಿ, ಜೀವನ ಬೇಕು ತಂಬಾಕು ಬೇಡ, ತಂಬಾಕು ರಹಿತ ಜೀವನ ಆರೋಗ್ಯಕ್ಕೆ ಸೋಪಾನ…

ಹೀಗೆ ಹಲವು ಘೋಷವಾಕ್ಯಗಳಿದ್ದ ಜಾಗೃತಿ ಫಲಕ ಕೈಯಲ್ಲಿಡಿದು ನಗರದಲ್ಲಿ ಬುಧವಾರ ವಿಶ್ವ ತಂಬಾಕುರಹಿತ ದಿನಾಚರಣೆ ಜಾಥ ನಡೆಯಿತು. ಶುಶ್ರೂಷಕಿಯರು, ಆಶಾ ಕಾರ್ಯಕರ್ತರು ಹಾಗೂ ಆರೋಗ್ಯ ಇಲಾಖೆ ಸಿಬ್ಬಂದಿ ಮಹಿಳಾ ಮತ್ತು ಮಕ್ಕಳ ಆಸ್ಪತ್ರೆಯ ಆವರಣದಿಂದ ಜಾಥ ಆರಂಭಿಸಿ,

ನಗರದ ಪ್ರಮುಖ ಬೀದಿಯಲ್ಲಿ ಜಾಗೃತಿ ಮೂಡಿಸಿದರು. ಅಪರ ಜಿಲ್ಲಾಧಿಕಾರಿ ಪದ್ಮಾ ಬಸವಂತಪ್ಪ ಜಾಥಕ್ಕೆ ಚಾಲನೆ ನೀಡಿ, ತಂಬಾಕು ಸೇವನೆಯಿಂದ ವ್ಯಕ್ತಿಯ ವೈಯಕ್ತಿಕ ಆರೋಗ್ಯ ಹಾಳಾಗುವುದಲ್ಲದೆ, ಸಿಗರೇಟ್‌ -ಬೀಡಿ ಹೊಗೆ ಇತರರ ಆರೋಗ್ಯದ ಮೇಲೂ ಕೆಟ್ಟ ಪರಿಣಾಮ ಬೀರಲಿದೆ.

ತಂಬಾಕಿನ ಉತ್ಪನ್ನಗಳ ಸೇವನೆಯಿಂದ ಕ್ಯಾನ್ಸರ್‌ ಬರುತ್ತದೆ. ಈ ನಿಟ್ಟಿನಲ್ಲಿ ಜನರು ಜಾಗತರಾಗಿ ತಂಬಾಕಿನಿಂದ ದೂರ ಉಳಿಯಬೇಕೆಂದು ಕಿವಿಮಾತು ಹೇಳಿದರು. ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣಾಧಿಕಾರಿ ಡಾ| ತ್ರಿಪುಲಾಂಬ,

-ಜಿಲ್ಲಾ ಸರ್ವೇಕ್ಷಣಾಧಿಕಾರಿ ಡಾ| ಗಂಗಾಧರ್‌, ಜಿಲ್ಲಾ ಕ್ಷಯ ನಿಯಂತ್ರಣಾಧಿಕಾರಿ ಡಾ| ರಾಘವನ್‌, ಡಿಎಲ್‌ಓ ಡಾ| ಸರೋಜಾಬಾಯಿ, ಆಯುಷ್‌ ಅಧಿಕಾರಿ ಡಾ| ಸಿದ್ದೇಶ್‌, ತಾಲ್ಲೂಕು ವೈದ್ಯಾಧಿಕಾರಿ ಡಾ| ಮಂಜುನಾಥ ಪಾಟಿಲ್‌, ಡಾ| ಗೀತಾ, ಕ್ಷೇತ್ರ ಶಿಕ್ಷಣಾಕಾರಿ ಬಸವರಾಜಪ್ಪ ಜಾಥದಲ್ಲಿ ಹೆಜ್ಜೆ ಹಾಕಿದರು.