ಮ್ಯಾನ್‌ಹೋಲ್‌ಗೆ ಇಳಿದು ಅಸ್ವಸ್ಥಗೊಂಡಿದ್ದ ಕಾರ್ಮಿಕ ಸಾವು 

Team Udayavani, Jun 2, 2017, 12:27 PM IST

ಮಹದೇವಪುರ: ವೈಟ್‌ಪೀಲ್ಡ್‌ ಪೊಲೀಸ್‌ ಠಾಣೆ ವ್ಯಾಪ್ತಿಯ ಜತ್ತಿ ದ್ವಾರಕಾಮಾಯಿ ವಿಲ್ಲಾದ ಮ್ಯಾನ್‌ಹೋಲ್‌ ಸ್ವಚ್ಚಗೊಳಿಸಲು ಇಳಿದು ತೀವ್ರ ಅಸ್ವಸ್ಥಗೊಂಡಿದ್ದ ವ್ಯಕ್ತಿಯೊಬ್ಬ ಗುರುವಾರ ಚಿಕಿತ್ಸೆ ಫ‌ಲಕಾರಿಯಾಗದೆ ಮೃತಪಟ್ಟಿದ್ದಾನೆ. ಮತ್ತೂಬ್ಬನ ಸ್ಥಿತಿ ಗಂಭೀರವಾಗಿದ್ದು ಆತನಿಗೆ ಚಿಕತ್ಸೆ ಮುಂದುವರಿದೆ. 

ಪೃಥ್ವಿರಾಜ್‌(24) ಮೃತ ಕಾರ್ಮಿಕ. ಈತ ಹೊಸಕೋಟೆ ತಾಲ್ಲೂಕಿನ ನಡುವತ್ತಿ ಗ್ರಾಮದವ ಎಂದು ಗುರುತಿಸಲಾಗಿದೆ. ವೈಟ್‌ಫೀಲ್ಡ್‌ನ ಇಸಿಸಿ ರಸ್ತೆಯಲ್ಲಿನ ಜತ್ತಿ ದ್ವಾರಕಾಮಾಯಿ ವಿಲ್ಲಾನಲ್ಲಿ ಮೇ 24ರಂದು ಮೂವರು ಕಾರ್ಮಿಕರು ಮ್ಯಾನ್‌ಹೋಲ್‌ಗಿಳಿದಿದ್ದರು. ಮೂವರಿಗೂ ಉಸಿರುಗಟ್ಟಿದ ಅನುಭವಾಗಿದ್ದು ಮೇಲೆ ಬರಲಾರದೆ ಸಿಲುಕಿಕೊಂಡಿದ್ದಾರೆ.

ಕಾರ್ಮಿಕರ ಚಿರಾಟ ಕೇಳಿ ಸ್ಥಳಕ್ಕೆ ಬಂದ ವಿಲ್ಲಾದ ಸಿಬ್ಬಂದಿಗಳು ಮೂವರನ್ನೂ ಹೊರತೆಗೆದು ಕೊಲಂಬಿಯಾ ಏಷಿಯಾ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಮೂವರ ಪೈಕಿ ಪೃಥ್ವಿರಾಜ್‌ ಎಂಬಾತ ಗುರುವಾರ ಮೃತಪಟ್ಟಿದ್ದು, ಮತ್ತೋರ್ವ ಕಾರ್ಮಿಕ ರಾಜು(17) ಸ್ಥಿತಿ ಚಿಂತಾಜನಕವಾಗಿದೆ. ದಿನೇಶ್‌ ಎಂಬಾತ ಪ್ರಾಣಾಪಾಯದಿಂದ ಪಾರಾಗಿದ್ದಾನೆ. ವೈಟ್‌ಫೀಲ್ಡ್‌ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.