ಭಾರತೀಯ ಸೇನಾನೆಲೆ ಧ್ವಂಸ;ಪಾಕ್ ನಿಂದ ಮತ್ತೊಂದು ನಕಲಿ ವಿಡಿಯೋ ರಿಲೀಸ್!

Team Udayavani, Jun 4, 2017, 1:59 PM IST

ಇಸ್ಲಾಮಾಬಾದ್: ಅಂತಾರಾಷ್ಟ್ರೀಯ ಗಡಿ ನಿಯಂತ್ರಣ ರೇಖೆ ಬಳಿ ಕದನ ವಿರಾಮ ಉಲ್ಲಂಘಿಸಿದ ಭಾರತೀಯ ಸೇನಾಪಡೆಯ ಐವರು ಯೋಧರನ್ನು ಹತ್ಯೆ ಮಾಡಿದ್ದೇವೆ ಎಂದು ಪಾಕ್ ಸೇನೆ ಹೇಳಿಕೊಂಡ ಬೆನ್ನಲ್ಲೇ ಭಾನುವಾರ ಭಾರತೀಯ ಸೇನಾ ನೆಲೆಗಳ ಮೇಲೆ ದಾಳಿ ನಡೆಸಿ ಧ್ವಂಸ ಮಾಡಿರುವುದಾಗಿ ಆರೋಪಿಸಿ ಪಾಕ್ ಸೇನೆ ವಿಡಿಯೋವೊಂದನ್ನು ಬಿಡುಗಡೆ ಮಾಡಿದೆ.

ಗಡಿಭಾಗದ ಟಟ್ಟಾ ಪಾನಿ ಸೆಕ್ಟರ್ ಬಳಿ ಭಾರತೀಯ ಸೇನಾಪಡೆ ಕದನ ವಿರಾಮ ಉಲ್ಲಂಘಿಸಿ ಅಪ್ರಚೋದಿತ ಗುಂಡಿನ ದಾಳಿ ನಡೆಸಿದ್ದಕ್ಕೆ ಪ್ರತಿಯಾಗಿ ಭಾರತೀಯ ಸೇನೆಯ ಐವರು ಯೋಧರನ್ನು ಹತ್ಯೆಗೈದಿರುವುದಾಗಿ ಪಾಕ್ ಹೇಳಿಕೊಂಡಿದ್ದು, ಇದೀಗ ಭಾರತೀಯ ಸೇನಾನೆಲೆ ಧ್ವಂಸ ಮಾಡಿರುವುದಾಗಿ  ಪಾಕ್ ಬಿಡುಗಡೆ ಮಾಡಿರುವ 27 ಸೆಕೆಂಡ್ ವಿಡಿಯೋದಲ್ಲಿ ಹೇಳಿಕೊಂಡಿದೆ.

ಪಾಕಿಸ್ತಾನದ ಸೇನಾ ವಕ್ತಾರ ಮೇಜರ್ ಜನರಲ್ ಆಸಿಫ್ ಗಫೂರ್ ಅವರು ಟ್ವಿಟರ್‍‍ನಲ್ಲಿ ಈ ವಿಡಿಯೊ ಟ್ವೀಟ್ ಮಾಡಿದ್ದಾರೆ. ಇತ್ತೀಚೆಗಷ್ಟೇ ಭಾರತೀಯ ಸೇನಾ ನೆಲೆ ಧ್ವಂಸಗೊಳಿಸಿರುವುದಾಗಿ ಆರೋಪಿಸಿ ಪಾಕ್ ವಿಡಿಯೋವನ್ನು ಬಿಡುಗಡೆ ಮಾಡಿತ್ತು, ಆದರೆ ಅದು ನಕಲಿ ವಿಡಿಯೋ ಎಂದು ಭಾರತೀಯ ಸೇನಾ ಸ್ಪಷ್ಟನೆ ನೀಡಿತ್ತು. ಈ ವಿಡಿಯೋ ಕೂಡಾ ನಕಲಿ ಎಂದು ಸೇನಾಪಡೆ ಮೂಲಗಳು ಹೇಳಿರುವುದಾಗಿ ಮಾಧ್ಯಮದ ವರದಿ ವಿವರಿಸಿದೆ.