ಯಶಸ್ವೀ ಕಾರ್ಯಾಚರಣೆ: ಖಾದರ್‌ ಶ್ಲಾಘನೆ

Team Udayavani, Jun 5, 2017, 10:19 AM IST

ಪಣಂಬೂರು: ಬಾರ್ಜ್‌ನಲ್ಲಿದ್ದ ಎಲ್ಲರನ್ನು ಸುರಕ್ಷಿತವಾಗಿ ದಡಕ್ಕೆ ತರುವಲ್ಲಿ ಸಹಕರಿಸಿದ ಕೋಸ್ಟ್‌ಗಾರ್ಡ್‌ ಸಿಬಂದಿ, ಮುಳುಗು ತಜ್ಞರು, ಪೊಲೀಸರು, ಮೀನುಗಾರರನ್ನು ಸಚಿವ ಯು.ಟಿ. ಖಾದರ್‌ ಪತ್ರಿಕಾಗೋಷ್ಠಿಯಲ್ಲಿ ಶ್ಲಾಘಿಸಿದ್ದಾರೆ.

ಶನಿವಾರ ಮಧ್ಯಾಹ್ನ ಅವಘಡ ಸಂಭವಿಸಿ ದರೂ ಬಾರ್ಜ್‌ನ ಮುಖ್ಯಸ್ಥರು ಸಂಜೆ 5 ಗಂಟೆ ಬಳಿಕ ನಮಗೆ ಮಾಹಿತಿ ನೀಡಿದರು. ಪ್ರತಿಕೂಲ ಹವಾಮಾನದಿಂದಾಗಿ ಆ ಹೊತ್ತಿನಲ್ಲಿ ನಾಲ್ವರನ್ನು ಮಾತ್ರ ದಡಕ್ಕೆ ತರಲು ಸಾಧ್ಯವಾಯಿತು. ರವಿವಾರ ಬೆಳಗ್ಗೆ 5 ಗಂಟೆಗೆ ಕಾರ್ಯಾಚರಣೆ ಮರು ಪ್ರಾರಂಭಿಸಿ 12 ಗಂಟೆ ಒಳಗೆ ಎಲ್ಲರನ್ನೂ ತರಲು ಸಾಧ್ಯವಾಯಿತು. ಯಾವುದೇ ಅಹಿತಕರ ಘಟನೆ ನಡೆಯದ ಹಾಗೆ ಎಲ್ಲ ಕ್ರಮಗಳನ್ನು ಕೈಗೊಳ್ಳಲಾಗಿತ್ತು. ಅಗತ್ಯ ಬಿದ್ದರೆ ಗೋವಾದಿಂದ ಹೆಲಿಕಾಪ್ಟರ್‌ ಕೂಡ ತರಿಸುವ ಉದ್ದೇಶ ಇತ್ತು. ಯಶಸ್ವೀ ಕಾರ್ಯಾ ಚರಣೆಯಲ್ಲಿ ಸಹಕರಿಸಿದ ಎಲ್ಲರಿಗೂ ನಾನು ಚಿರಋಣಿಯಾಗಿರುತ್ತೇನೆ ಎಂದು ಸಚಿವರು ಹೇಳಿದರು.

ಪತ್ರಿಕಾಗೋಷ್ಠಿಯಲ್ಲಿ ಜಿಲ್ಲಾಧಿಕಾರಿ ಡಾ| ಜಗದೀಶ್‌, ಶಾಸಕ ಮೊದಿನ್‌ ಬಾವಾ, ಕೋಸ್ಟ್‌ ಗಾರ್ಡ್‌ ಡಿಐಜಿ ದಸಿಲಾ, ಪ್ರಾಜೆಕ್ಟ್ ನಿರ್ದೇಶಕ ರಮೇಶ್‌, ಕಮಾಂಡರ್‌ ಜೈಸ್ವಾಲ್‌ ಹಾಗೂ ಕಮಾಂಡರ್‌ ಗುಲ್ವಿಂದರ್‌ ಸಿಂಗ್‌ ಉಪಸ್ಥಿತರಿದ್ದರು.
ಇಲಾಖಾ  ತನಿಖೆ: ಕಡಲ್ಕೊರೆತ ತಡೆ ಕಾಮಗಾರಿ ನಡೆಸುತ್ತಿದ್ದ ದರ್ತಿ ಸಂಸ್ಥೆಯ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿರುವ ಸಚಿವ ಯು.ಟಿ. ಖಾದರ್‌ ಅವರು ಘಟನೆ ಕುರಿತು ಜಿಲ್ಲಾಧಿಕಾರಿಗಳು ಹಾಗೂ ಬಂದರು ಇಲಾಖೆಗೆ  ಪ್ರತ್ಯೇಕ ತನಿಖೆ ನಡೆಸಿ ವರದಿ ನೀಡಲಿದೆ ಎಂದರು.